Kulumbaisha 102 - Baibo Busansulushi Bwa Libuku Ili

Mupailo wa muciindi ca mapensho

Mupailo wa cikula bwangu musankwa uli mumapensho, paciindi ndyaakatentuka akutula mapensho akwe kuli Lesa.

¹ NoBaami baLesa, amunyumfwe mupailo wangu, kulila kwangu kwakusenga lucafwo akushike kuli ndimwe.

² Mutamfutatili muciindi ndyeendi mumapensho, amuteye kutwi wanu kuli ndime. Na ndamulilila amufwambaane kunkumbula.

³ Inshiku shangu shileenda anga mbwiishi, shifuwa shangu shilapya anga ngumulilo.

⁴ Moyo wangu wapya anga mbwiisu buyumu. Ncakwiila akumoyo kutooshiya kulya.

⁵ Ceebo cakutongela kwangu, ndacaalabo mafuwa eenka.

⁶ Ndababo anga ndikubi lya muluyanga, Ncakwiila ndababo anga ngumwiina wa mumatongo.

⁷ Nshooni atulo sobwe, ndaba anga nkayuni kabete paciluli keenkabo.

⁸ Lilaya mukwipila balwani bangu kabansebaanya, abo bancelebula balasebensesha liina lyangu pakushingana.

⁹ Ceebo ndalya milota anga ncakulya, akunwa shisenkene aminsonshi

¹⁰ mukwiinga wa bukali bwanu bunene. Mwakambwesa akungwaala kulaale.

¹¹ Ncakwiila nshiku shangu shili anga ncimfule ca macolesha. Ee, ndaba anga mbwiisu buyumu.

¹² Sombi noBaami baLesa, muli Baami kwamuyayaya, bamumashalane boonse balaakumwiibaluka lyoonse.

¹³ Mulaakunyamuka akunyumfwila nkumbu pandabala inene ya Siyoni, mukwiinga ciindi cakwiilekelela cashikila. Ee, ciindi ceelete cashikila.

¹⁴ Basebenshi banu baliisuni nakubi kwaamba ayi yakanyonyoolwa. Ncakwiila baleenyumfwila nkumbu nakubi kwaamba ayi ngamatongobo.

¹⁵ Mishobo yoonse ilaakuloonda liina lya Mwaami Lesa. Bamaami boonse ba pacishi ca panshi balaakumulemeka.

¹⁶ Mwaami Lesa aakuyakulula Siyoni, ulaakuyubulula bulemu bwakwe.

¹⁷ Ulaakunyumfwa kusenga kwa bantu bakwe abo mbwaakafutatila, alimwi ulaakukutika mipailo yabo.

¹⁸ Ono ishi ashilembelwe lishalane licisa, kwaamba ayi abo batana kushalwa abalo bakalumbaishe Mwaami Lesa.

¹⁹ Balaakwaamba ayi, “Mwaami Lesa wakalangilisha panshi kuswa kumusena wakwe usalalite kwiculu. Ncakwiila kuswa kwiculu wakawaala meenso pacishi ca panshi.

²⁰ Wakanyumfwa kutongela kwa bakaili, Wakaangulula baabo bakapekwa milandu yakucaikwa.”

²¹ Aboobo liina lya Mwaami Lesa lilaakwaambilishikwa muSiyoni, ncakwiila lilaakulumbaishikwa mundabala inene ya Jelusalemu.

²² Ulaakulumbaishikwa bamumishobo abamumalelo baakubungana ayi balambile Mwaami Lesa.

²³ Mwaami Lesa wakantyoloola mushiso kaancilibo mwanike, wakafwiimpya nshiku sha buumi bwangu.

²⁴ Aboobo ndakaamba ayi, “NobaLesa bangu, buumi mutabusutuli kabuciya. Myaaka yanu ilayabo mumashalane oonse.

²⁵ Kumatalikilo mwakakaba lwiimbi lwa cishi ca panshi, alyalo liculu ngumulimo wa maansaanu.

²⁶ Sombi shoonse ishi shilaakumana, sombi mwebo mulaakucaala. Shoonse shilaakusansooka anga nshakufwala. Mulaakushisowa anga nshakufwala shifwite, lyalo shilaakushimingana.

²⁷ Sombi mwebo mulaakunoolibo mushobo womwi alimwi myaaka ya buumi bwanu teshi ikamane.

²⁸ Baana ba basebenshi banu balaakunookala kwakubula cakulisukama. Bamulunyungu lwabo balaakwikalilila pameenso anu.”