Kulumbaisha 101 - Baibo Busansulushi Bwa Libuku Ili

Mwaami mbwaakashomesha

Lwiimbo lwakwe Defedi.

¹ Ndaakwiimba shalusuno lwanu ashabululami, noBaami baLesa ndaakumwiimbila cakulumbaisha.

² Ndaakukonkela nshila shitacite kampenda. Ino mwebo mulaakwisa lili kuli ndime? Ndaakwikala muŋanda yangu kaantacite kampenda,

³ alimwi teshi nkasuminisheewo cintu cibiibi pameenso angu. Ndipatite micito ya bantu bafutatila Lesa. Ncakwiila tatunyumfwani abantu abo.

⁴ Teshi nkanyumfwaneewo abantu batashomeki. Teshi nkalisuminishewo kweenda munshila sha bubi.

⁵ Ndaakuumusha muntu woonse ufuya mubye mubushishi. Teshi nkalekeleewo muntu ulisumpula akulinyumfwa.

⁶ Sombi ndaakusuminisha bantu bashomeka mucishi, alimwi ndaakumusuminisha kwikala anebo. Uyo weenda cakubula kampenda ngweshi akansebensele.

⁷ Taaku muntu waamba shabubeshi weshi akekaale muŋanda yangu. Taaku muntu waamba nshaataciti weshi akekaale pafwaafwi anebo.

⁸ Bushiku abushiku ndaakunyonyoola bantu babiibi mucishi. Ee, ndaakulobya boonse bamucita shibi mundabala inene ya Mwaami Lesa.