Kulumbaisha 10 - Baibo Busansulushi Bwa Libuku Ili

Kupailila bamucita shibi ayi bapekwe mulandu

¹ Ceebonshi noBaami baLesa mulaboneka anga muli kulaale? Mulabonekelanshi anga muliyubite ndituba mumapensho?

² Bamucita shibi balalisumpula akunoopensha bakandu. Balabacatisha mutoose ntobabateya.

³ Ncakwiila bamucita shibi balalisumpula mulunkumbwa lwa myoyo yabo ibiibi. Balalumbaisha bantu balyabi, sombi balasebaanya liina lya Mwaami Lesa.

⁴ Bamucita shibi tababikiiko amaano kuMwaami Lesa ceebo cakulisumpula. Mukuyeeya kwabo balabona Mwaami Lesa ayi taacite ncito kuli mbabo.

⁵ Sombi balo balaswitilila mushintu shoonse. Aboobo milawo yakwe Lesa ili kulaale ambabo. Paceebo ceeco balwani babo boonse balababonabo anga ngukabwa wamucila.

⁶ Balalipamya ayi, “Nebo ndanooswitililabo lyoonse, ndanoosangalala lyoonse cakubula mapensho.”

⁷ Mumilomo yabo muliswitebo mashingo, bubeshi alimwi akukonga. Ee, kupilinganya abubi shilaswa mumilomo yabo.

⁸ Bamucita shibi balabelamina mumishi kwaamba ayi bacaye bantu batacite mulandu. Balasensa baabo mbobapingite mubushishi.

⁹ Balabelaminabo anga ninkalamu iyubite, kubelamina ayi bacate bantu bataaku mbobabete. Ncakwiila balabacatisha mutoose twabo akubatola kabaya cibakwelaanya.

¹⁰ Bantu abo bacatwa balababo anga ncintu capwayoolwa. Ncakwiila bakomwa kubantu bamucita shibi.

¹¹ Lyalo balalilishaanya ayi, “Lesa ndushinisho taatubikiteeko amaano. Washinshibata, aboobo teshi akatuboneewo!”

¹² NoBaami baLesa amupe mulandu bantu babiibi abo! Ncakwiila amwiibaluke akubona baabo batoopenga.

¹³ Ceebonshi bamucita shibi balanyansha liina lyakwe Lesa? Ceebonshi balalipamya ayi, “Lesa teshi akatupewo mulandu”?

¹⁴ Nakubi boobo mwebo nobaLesa mulabona mapensho amakatasho oonse. Lyoonse mulekala kamulibambite kucafwa. Bataaku mbobabete balalibika mumaansaanu, mukwiinga mwebo ndimwe mucafwa bapengete.

¹⁵ Amupotolole maansa bamucita shibi aba kwaamba ayi babule nkusu. Amubape mulandu pabubi bwabo kushikila batakabucitiiwo tubili.

¹⁶ Ono Mwaami Lesa, nguMwaami lyoonse alyoonse. Abo balambila balesa bamwi balaakuloba mucishi cakwe.

¹⁷ Mwebo nobaLesa mulanyumfwa mipailo ya bantu bali mumapensho. Mulabayumyayumya bantu abo akukutika kulila kwabo.

¹⁸ Ncakwiila muleemikanina bana banshiwa abaabo balyatililwa, kwaamba ayi muntubo uli mbuli bamwi boonse, acileeke kulengesha babye boowa.