Kulonga 6 - Baibo Busansulushi Bwa Libuku Ili

¹ Mpomunyaawo Mwaami Lesa wakaambila Mose ayi, “Ono utoobona nceshi ncite kumwaami Falawo. Ntoomukakatisha ayi aleke bantu bangu banooya. Ntoomukakatisha ayi abatande mucishi cakwe.”

Mose mbwaakayuminishikwa alimwi

² Lesa wakaambila Mose alimwi ayi, “Nebo ndime Mwaami Lesa.

³ Ndakaboneka kuli Abulaamu, Isaki alimwi aJakobo ayi ndime Lesa Shinkusu shoonse. Sombi nshikwe kuliyubulula kuli mbabo ayi banshiibe liina lyakwaamba ayi Mwaami Lesa.

⁴ Alimwi ndakapanganaabo ayi ndaakubapa cishi ca Kenani, umo mobakalinga kwikala anga mbaswamashi.

⁵ Ono matongooshi a bene Isilaeli abo bali mubusha kubene Ijipiti ndaanyumfwa. Aboobo ntooyanda kucita kweelana acipangano cangu.

⁶ Paceebo ceeci lwiita bene Isilaeli ayi, ‘Nebo ndime Mwaami Lesa, alimwi ndaakumufuna akumwaangulula mubusha mbomubeteemo kubene Ijipiti. Ndaakutambika lyaansa lyangu lya nkusu pali mbabo mukubapa mulandu unene abuumbi. Mwebo ndaakumupulusha.

⁷ Mpeeke mulaakuba bantu bangu, anebo ndaakuba Lesa wanu. Lyalo mulaakwishiba ayi ndime Mwaami Lesa, Lesa wanu na nkamwaangulule mubusha ubo mbomubeteemo mucishi ca Ijipiti.

⁸ Ndaakumutola kucishi ico ncendakashomesha cakulumbila kupa Abulaamu, Isaki alimwi aJakobo. Ono ndaakupa ndimwe kwaamba ayi cikabe cinenu cancinencine. Nebo ndime Mwaami Lesa.’ ”

⁹ Mose wakalwiita bene Isilaeli makani aya, sombi tabakwe kumunyumfwila, ceebo bakalinga kuungumene mumyoyo mukwiinga wa milimo iyumu ya busha njebakalinga kusebensa.

¹⁰ Lyalo Mwaami Lesa wakaambila Mose ayi,

¹¹ “Koya ukalwiite Falawo mwaami wa kuIjipiti ayi aleke bene Isilaeli basweemo mucishi cakwe.”

¹² Sombi Mose wakakumbula ayi, “Ono na bene Isilaeli tabakwe kunyumfwila, ino lakwe mwaami Falawo inga wanyumfwila buyani? Nebo ndi muntu utaambi kabotu.”

¹³ Lyalo Mwaami Lesa wakaambila Mose aAloni ayi, “Kamuya mukalwiite bene Isilaeli alimwi amwaami Falawo ayi nebo ndamulwiita ayi mukakushe bene Isilaeli mucishi ca Ijipiti.”

Bamashali bakulukulu bakwe Mose alimwi aAloni

¹⁴ Lubeni mwanaakwe Jakobo wakwiiya wakalinga kucite baana basankwa bone. Meenaabo ngaaya. Anoki, Palu, Esiloni alimwi aKami. Aba mbobakalinga bamashali bakulukulu ba mikowa yoonse iitwa meenaabo.

¹⁵ Simyoni wakalinga kucite baana bosanwe awomwi. Meenaabo ngaaya. Jemuwelo, Jamini, Oadi, Jakini, Sowa alimwi aShaulo mwaana musankwa wa mwanakashi mwine Kenani. Aba mbobakalinga bamashali bakulukulu ba mikowa yoonse iitwa meenaabo.

¹⁶ Alakwe Lefi wakalinga kucite baana basankwa botatwe. Meenaabo ngaaya. Geshoni, Koati alimwi aMelali. Aba mbobakalinga bamashali bakulukulu ba mikowa iitwa meenaabo. Lefi wakafwa kaacite myaaka ili 137.

¹⁷ Geshoni wakalinga kucite baana basankwa bobilo, abo bakalinga kwiitwa ayi Libini alimwi aShimeyi. Abalo aba bakaba abamulunyungu babo baanji.

¹⁸ Koati wakalinga kucite baana basankwa bone abo bakalinga kwiitwa ayi Amulamu, Isa, Ebuloni alimwi a Usiyelo. Koati wakafwa kaacita myaaka ili 133.

¹⁹ Melali alakwe wakalinga kucite baana basankwa bobilo. Meenaabo ngaaya. Maali alimwi aMushi. Aba mbobamushipani shakwe Lefi alimwi abamulunyungu babo.

²⁰ Ono Amulamu wakeeba Jokebedi ishinkashi, umo mwaakashalila Aloni alimwi aMose. Amulamu wakafwa kaacite myaaka ili 137.

²¹ Isa wakalinga kucite baana basankwa botatwe, abo bakalinga kwiitwa ayi Kola, Nefegi alimwi aSikili.

²² Alakwe Usiyelo wakalinga Kucite baana basankwa botatwe. Meenaabo ngaaya. Mishaelo, Elisafani alimwi aSitili.

²³ Aloni wakeeba mwanaakwe Aminadabu, Elisheba uyo wakalinga nankashi yakwe Naashoni. Wakashalilamo Nadabu, Abiyu, Eliyasa alimwi aItama.

²⁴ Kola lakwe wakalinga kucite baana basankwa botatwe abo bakalinga kwiitwa ayi Ase, Elikana alimwi aAbiyasafu. Aba bakalinga bamashali bakulukulu ba shipani shakwe Kola.

²⁵ Eliyasa mwanaakwe Aloni, womwi wa bana bakwe Putiyelo banakashi, uyo ngwaakashalilaamo Fineyasi. Aba mbobakalinga bamanene ba bamumaanda a bene Lefi kweelana ashipani shabo.

²⁶ Aloni alimwi aMose mbobaabo Mwaami Lesa mbwaakaambila ayi, “Amutanjilile mikowa ya bene Isilaeli kuswa muIjipiti.”

²⁷ Basankwa abo mbobakaambila Falawo mwaami wa mucishi ca Ijipiti ayi asuminishe bene Isilaeli kuswa mucishi cakwe.

Mwaami Lesa mbwaakalasha Mose aAloni

²⁸ Mwaami Lesa ndyaakalinga kwaamba aMose mucishi ca Ijipiti,

²⁹ wakaamba ayi, “Nebo ndime Mwaami Lesa. Ulwiite mwaami wa bene Ijipiti shoonse nsheshi nkulwiite.”

³⁰ Sombi Mose wakakumbula ayi, “Mulishi kwaamba ayi nebo nshaambi kabotu, ino mwaami inga wanyumfwila buyani?”