Kulonga 39 - Baibo Busansulushi Bwa Libuku Ili

Mbobakatunga shakufwala sha bapailishi

¹ Ono kuswa kubooya bwa mbelele buboneka anga ndiculu, bufubelafubela alimwi abusalalabo pyu, bakatunga shakufwala shibotu abuumbi kwaamba ayi bapailishi bakanoofwala pakusebensa muMusena Usalalite. Shakufwala shabupailishi isho bakatungila Aloni kweelana aMwaami Lesa mbwaakaambila Mose.

² Bakatunga efodi kuswa kubooya bwa mbelele buboneka anga ndiculu, bufubelafubela abusalalabo pyu, busalu bwa golodi, alimwi ansaalu ibotu iteshimite.

³ Mpeeke bakapampamika golodi akutimboola tuniininiini kwaamba ayi bakabike munsalu ibotu iteshimite alimwi amubooya bwa mbelele buboneka anga ndiculu, bufubelafubela alimwi abusalalabo pyu.

⁴ Bakabika amwakupusha ntambo mobilo pashifushi kuefodi mumbasu shoonse shobilo kwaamba ayi kacaangwa.

⁵ Bakabikaako alaamba wakatungwa kabotu wa shisani nshemunya isho kwaamba ayi shikanoonungenebo kweelana aMwaami Lesa mbwaakaambila Mose.

⁶ Bakabwesa mabwe eetwa ayi onikisi akwaabika mushakubikaamo sha golodi. Bakalembawo kabotu meena a bana bakwe Jakobo basankwa bali likumi abobilo.

⁷ Kuswawaawo bakaabika pamwakupusha ntambo pashifushi mwa efodi kwaamba ayi anokwiimikanina mikowa ya bene Isilaeli ili likumi ayobilo, kweelana aMwaami Lesa mbwaakaambila Mose.

Mbobakatunga shakufwala sha pacaamba

⁸ Ono bakatunga cakufwala pacaamba kushintu sheenka shili mbuli sha efodi alimwi ashakubotesha shikoshenye.

⁹ Cakufwala ici cakalinga kunokweelenebo mumbasu shoonse alimwi cipetetwe lyobilo, mumbasu shoonse cakaba masentimita ali 22.

¹⁰ Pali ncico, bakabikaawo mindando ya mabwe amakwebo yone. Mumundando wakutaanguna bakabikaamo mabwe eetwa ayi lubi, topasi alimwi agaaneti.

¹¹ Mumundando wabili mwakaya mabwe eetwa ayi emalodi, safaya alimwi dayimondi.

¹² Mumundando watatu bakabikaamo mabwe eetwa ayi tekoisi, ageti alimwi aamefisiti

¹³ Mumundando wane mwakaya mabwe eetwa ayi belilu, kanelyani alimwi ajasipa. Mabwe amakwebo aya akabikwa mushakubikaamo sha golodi.

¹⁴ Palibwe lyomwi alyomwi lya mabwe ayo ali likumi aobilo, pakalembwa liina lyomwi lya mwanaakwe Jakobo musankwa, kwaamba ayi eemikanine mikowa ya bene Isilaeli.

¹⁵ Ono pacakufwala pacaamba, bakapangilaawo ncetani sha golodi wiine wiine shakupyata anga njimyaando.

¹⁶ Bakapanga shakukobekaamo sha golodi shobilo, akwaacatanya peculu lya makonko a cakufwala ca pacaamba,

¹⁷ alimwi akwaanga ncetani shobilo isho mushakukobekaamo shobilo isho.

¹⁸ Akwalo kweela ncetani shobilo shimwi isho, bakaangaako shakukobekaamo shobilo sha paefodi ayi bacatanye amwakupusha pashifushi kumeenso a efodi.

¹⁹ Kuswawaawo bakapanga shakukobekaamo sha golodi shobilo akushicatanya kumakonko a panshi lya cakufwala pacaamba, ono mukati ka mupeto pafwaafwi aefodi.

²⁰ Mpeeke bakapanga shakukobekaamo ashimwi shobilo sha golodi akushicatanya panshi lya mwakupusha mobilo pashifushi kumeenso a efodi, pafwaafwi a mupeto alimwi peculu lya laamba ngobakatunga kabotu.

²¹ Kweelana aMwaami Lesa mbwaakaambila Mose, bakaanga mushakukobekaamo a cakufwala pacaamba kushakukobekaamo sha efodi akasani kaboneka anga ndiculu kwaamba ayi cakufwala pacaamba cinookala peculu lya laamba cakubula kusensuluka.

Mbobakatunga shakufwala shimwi shabapailishi

²² Anu mungaanjo wakufwala mukati lya efodi bakautunga abooya bwa mbelele buboneka anga ndiculu.

²³ Wakaba abulyango bwakwinjishamo mutwi, ubo bwakatungwa akamupeto kakukasha kukwaamuka.

²⁴ Alimwi bakatungilaako shili anga nshisepo shiitwa ayi pomegilaneti a booya bwa mbelele buboneka anga ndiculu, bufubelafubela alimwi abusalalabo pyu ansaalu shibotu shiteshimite kumupeto wa panshi wa mungaanjo.

²⁵ Kuswawaawo bakapanga tumilangu twa golodi wiine wiine akutubika kumupeto pakati lya mapomegilaneti.

²⁶ Tumilangu twa golodi uto alimwi apomegilaneti, twakabambana apa kamulangu panembo pomegilaneti, kushinguluka mupeto wa mungaanjo wakufwala pakucita mulimo wa bupailishi, kweelana aMwaami Lesa mbwaakaambila Mose.

²⁷ Mpeeke bakatunga minjila yakwe Aloni abana bakwe basankwa,

²⁸ Cisani cakufwala kumutwi, tusooti, tuputula twamukati twa cisani citeshimite,

²⁹ alimwi alaamba wa cisani cibotu citeshimite abooya bwa mbelele buboneka anga ndiculu, bufubelafubela alimwi abusalalabo pyu. Pakalinga kutungitwe ashakubotesha, kweelana aMwaami Lesa mbwaakaambila Mose.

³⁰ Bakapanga akeela kapampamene ka golodi wiine wiine ayi kabe keshibilo kasalalite ka kulibenga, akulembaawo ayi “Wakabengwa ku Mwaami Lesa.”

³¹ Mpeeke bakakaanga kunembo lya cisani cakufwala kumutwi acisani ciboneka anga ndiculu, kweelana aMwaami Lesa mbwaakaambila Mose.

Kumanisha kwa milimo

³² Anu milimo yoonse yakuyaka Tente ya Cipangano yakamana. Bene Isilaeli bakapanga shoonse kweelana aMwaami Lesa mbwaakaambila Mose.

³³ Bantu bakaletela Mose Tente alimwi ashintu sha njiyo shoonse, shakukobekesha, shintu shamakonko one, mbaalo, shisamu, shapanshi sha njiyo,

³⁴ cakufwekaawo ca cipaya ca mbelele isankwa cakaalulwa cisalala, cakufwekaawo ca cipaya cibotu citeshimite, cisani cakushitilisha,

³⁵ Libokoshi lya Cipangano umo mwakalinga mabwe obilo apampamene, shisamu shakunyamwisha sha ndilyo alimwi acifwekesho ca nkumbu ca ndilyo.

³⁶ Bakaleta tebulu alimwi ashintu sha njiyo shoonse, alimwi ashimaande shipekwa kuli Lesa,

³⁷ cakubikawo malampi ca golodi wiine wiine, shintu sha ncico shoonse alimwi amafuta amumalampi,

³⁸ cipaililo ca golodi, mafuta akunanika, tununkila kabotu alimwi acisani cakushitilisha kumulyango wa Tente.

³⁹ Lyalo bakaleta cipaililo ca bulonse alimwi acili anga nguseefwa ca bulonse ca ncico, shisamu shakunyamwisha ashintu sha nshisho shoonse, mbale ifongomene yakusambilaamo alimwi acapanshi ca njiyo,

⁴⁰ alimwi ashisani shakubika kulushito, shisamu ashapanshi sha nshisho, cisani cakushitilisha kumulyango wa lushito alimwi antaambo sha ncico, mpoopo shaTente alimwi ashintu shoonse shakusebensesha muTente.

⁴¹ Cakweelaako bakaleta shakufwala shibotu abuumbi isho sheelete kufwala bapailishi muMusena Usalalite, nkokwaamba ayi shakufwala shisalalite shakwe Aloni mupailishi alimwi abana bakwe basankwa.

⁴² Bene Isilaeli bakacita milimo yoonse kweelana aMwaami Lesa mbwaakaambila Mose.

⁴³ Lyalo Mose wakeendaamo moonse akubona kwaamba ayi shoonse bashipanga kweelana abwakaamba Mwaami Lesa. Mpeeke Mose wakabapa coolwe.