Kulonga 36 - Baibo Busansulushi Bwa Libuku Ili

¹ “Anu Besalelo, Oolyabu alimwi abamwi boonse bacishi milimo abo Mwaami Lesa mbwaakapa lushibo alimwi abusongo bwa pamilimo, abo bacishi kupanga shintu shoonse shiyandika pakuyaka Tente isalalite, balyeelete kupanga shintu shoonse kweelana abwakaamba Mwaami Lesa.”

Bantu mbobakaleta shipo shiinji

² Mpeeke Mose wakeeta Besalelo, Oolyabu alimwi abasankwa bamwi boonse bacishi milimo abo Mwaami Lesa mbwaakapa maano alimwi bakalinga kulibambite kucafwa, akubalwiita ayi batalike kuyaka.

³ Mose wakabapa shipo shoonse isho bene Isilaeli nshebakaleta ayi bayakishe Tente isalalite. Sombi bene Isilaeli bakatolelela kuleta shipo kuli Mose bwaca abwaca.

⁴ Lyalo basankwa bacishi milimo abo bakalinga kusebensa mulimo uyo bakaya

⁵ kuli Mose mukumulwiita ayi, “Bantu batooleta shintu shiinji kwiinda sheesho shiyandika pamulimo uyo Mwaami Lesa ngwaakaamba ayi ucitwe.”

⁶ Paceebo ceeci Mose wakatuma nkombe iyo yakaambilishikwa mumisumba yoonse ayi taaku muntu weelete kunoocitola shipo sha kuTente isalalite. Aboobo bantu boonse bakacileka kutola shipo ashimwi,

⁷ mukwiinga isho shakaletwa kale shakalinga shiinji kwiinda sheesho shakalinga kuyandika kumanisha mulimo woonse.

Kupanga Tente ya Cipangano

⁸ Ono bacishi milimo boonse pakati ka basebenshi bamwi boonse bakapanga Tente ya Cipangano. Bakapangisha shisani shibotu shiteshimite shili likumi, apo pakalinga kutungitwe booya bwa mbelele buboneka anga ndiculu, bufubelafubela abusalalabo pyu. Pakalinga kutungitwe ashintu shicite mapapaminwa shiitwa ayi bakelebu.

⁹ Shisani shoonse shakalinga kweelenebo mubulaamfu amubufwaafwi. Shakalinga mamita ali 12 mubulaamfu amamita ali 2 mubufwaafwi.

¹⁰ Kuswawaawo bakanunganya shisani shili shosanwe kwaamba ayi cikabe cisani comwi, ashalo shimwi shili shosanwe bakashicita mbomunya ubo.

¹¹ Kweela kwa lubasu lomwi lwa cisani cinene bakatungilaako mwakukobeka acisani camushobo wa liculu. Bakacita bweenka akucisani cinene cimwi.

¹² Mucisani cakutaanguna ico cakununga, bakatungilaako mwakukobeka muli makumi osanwe, akwalo kucisani cakununga cabili, bakatungilaako mwakukobeka muli makumi osanwe bweenka mbuli citaanshi.

¹³ Alimwi bakapanga shakukobekesha sha golodi shili makumi osanwe shakucatanishishako shisani shobilo ishi ayi cibe comwi.

¹⁴ Lyalo bakapanga acakufweka Tente ca shisani sha booya bwa mpongo shili likumi alimwi acomwi.

¹⁵ Shoonse shakalinga kunokweelenebo, shakalinga mamita ali 13 mubulaamfu alimwi mamita ali 2 mubufwaafwi.

¹⁶ Kuswawaawo bakatunga shisani shosanwe kwaamba ayi cibe comwi, ashalo shili shosanwe acomwi shakaba cisani comwi.

¹⁷ Bakabika mwakukobeka muli makumi osanwe kweela kwa cisani cakweelaako kuceeco citaanshi, alimwi amwakukobeka muli makumi osanwe kweela kwa cisani cakweelaako kuceeco cabili.

¹⁸ Mpeeke bakapanga shakukobekesha sha bulonse shili makumi osanwe akwinjisha sha mwakukobeka umo kwaamba ayi shisani shobilo isho shibe cakufweka paTente comwi.

¹⁹ Ono bakapanga shakufweka paTente ya Cipangano ashimwi shobilo. Cimwi cakaba ca cipaya ca mbelele isankwa ncibakaalula kuba cisalala, acalo cimwi ca cipaya cibotu.

²⁰ Lyalo bakapanga shintu shamakonko one sha cisamu ca mulombe ayi shibe sha kuTente iyo.

²¹ Shintu isho shoonse shakalinga mamita ali 4 mubulaamfu alimwi amasentimita ali 66 mubufwaafwi,

²² alimwi bakapanga shakwiimikaninaako shobilo. Shamakonko one shoonse isho shakalinga kucite shakwiimikaninaako isho.

²³ Kulubasu lwa kumalenge bakabikaako shamakonko one shili makumi obilo,

²⁴ alimwi ashapanshi sha nshisho sha silifa shili makumi one, nkokwaamba ayi pacamakonko one comwi pakaba shapanshi shobilo, comwi acomwi panshi lya cakwiimikaninaako comwi acomwi.

²⁵ Kulubasu lwa kumatwa lya Tente akwalo bakabikaako shamakonko shili makumi obilo,

²⁶ alimwi ashapanshi sha silifa shili makumi one, nkokwaamba ayi shapanshi shobilo pacamakonko comwi.

²⁷ Ono kwisule lya Tente ya Cipangano kulubasu lwa kumbo bakabikaako shamakonko shosanwe acomwi,

²⁸ alimwi ashamakonko shobilo shamumakonko a Tente.

²⁹ Shintu shamakonko one shamumakonko a Tente isho, shakalinga kunungilwa panshi akuya mukucatanishikwa apeculu. Shamakonko shobilo isho shakalinga kupanga makonko obilo a Tente shakaba mbomunya ubo.

³⁰ Nkokwaamba ayi kwakaba shamakonko one shili shosanwe ashotatwe alimwi ashapanshi sha nshisho sha silifa shili likumi ashosanwe acomwi isho shakaba shobilo pacamakonko comwi.

³¹ Kuboolaawo bakapanga mbalo shili likumi ashosanwe sha cisamu ca mulombe. Mbaalo shosanwe shakaba kushamakonko sha kulubasu lomwi lwa Tente ya Cipangano.

³² Shimwi shosanwe shakaba sha kulubasu lumwi, ashalo shosanwe shimwi shakaba kushamakonko sha kulubasu lwa kumbo, nkokwaamba ayi kwisule lya Tente.

³³ Mbaalo ya pakati ka shamakonko yalo yakalinga kuswa kweela akweela lya Tente.

³⁴ Shamakonko isho bakashinanika golodi alimwi akupanga nkobeko sha golodi akushicatanisha ashamakonko one kwaamba ayi shicate mbalo, isho shakananikwa golodi ashalo.

³⁵ Bakatunga cisani cakushitilisha citeshimite cibotu, citungitwe abooya bwa mbelele buboneka anga ndiculu, bufubelafubela alimwi abusalalabo pyu. Bakatungilaawo ashintu shicite mapapaminwa shiitwa ayi bakelebu.

³⁶ Bakapanga ashisamu shone sha cisamu ca mulombe shakucata cisani cakushitilisha, akushinanika golodi alimwi akushibika shakukobekesha sha golodi. Lyalo bakapanga ashapanshi shone sha silifa shakucata shisamu.

³⁷ Apalo pamulyango wa Tente bakatungilaawo cisani cakushitilisha ca nsalu iteshimite ibotu, itungitwe abooya bwa mbelele bwa mushobo wa liculu, bufubelafubela alimwi abusalalabo pyu, alimwi bakatungilaawo shimwi shakwiibotesha.

³⁸ Cisani cakushitilisha ici, bakacipangila shisamu shosanwe isho nshebakabikako shakukobekesha. Peculu panshisho alimwi apatusamu tucinjibikitwe bakananikaawo golodi. Lyalo bakashipangila shapanshi shosanwe sha bulonse.