Kulonga 34 - Baibo Busansulushi Bwa Libuku Ili

Mabwe apampamene abili

¹ Mwaami Lesa wakaambila Mose ayi, “Besa mabwe obilo apampamene mbuli ataanshi alya, lyalo ndyeshi nembewo maswi eenka alya akalinga pamabwe ataanshi ayo ngowakapwaya.

² Ciilo macuunsa ukalibambile akunyamuka kwisa peculu lya Kalundu ka Sinayi mukukumana anebo.

³ Taaku nabi womwi ngoweelete kwisaakwe nabi weelete kuboneka pamusena uli woonse pakalundu. Alimwi taaku mbelele nabi ŋombe sheelete kunoolya mweela kalundu.”

⁴ Aboobo Mose wakabesa mabwe apampamene obilo akuyaawo kuKalundu ka Sinayi pabushiku bwakaboolaawo macuunsacuunsa, kweelana abwakamwaambila Mwaami Lesa.

⁵ Mpomunyaawo Mwaami Lesa wakaseluka mulikumbi akwiimikana aMose, akulibanda liina lisalalite ayi Mwaami Lesa.

⁶ Lyalo Mwaami Lesa wakeenda kunembo lyakwe Mose, akoolobesha ayi, “Nebo neMwaami Lesa ndime Lesa uswite lulekelelo ankuumbu, utafwambaani kukalala, ubonesha lusuno lunene alimwi ushomeka.

⁷ Ndalama cipangano cangu kumashalane ali shuulu ashuulu, alimwi akulekelela bantu pabubi ashibiibi shabo. Sombi teshi nkaalilwe kupa mulandu baana alimwi abameeshikulu babo, kushikila akulishalane lyatatu alyane, ceebo ca shibiibi sha bamashali babo.”

⁸ Mpeeke Mose wakeendililabo kufukama cakushisha ciwa panshi akulambila.

⁹ Wakaamba ayi, “NoBaami baLesa, na ncakwiila mulikondetwe muli ndime, ndamusenga ayi muye aswebo. Bantu aba mbeshicimpamya, sombi mutulekelele pabubi bwesu alimwi ashibiibi shesu akututambula ayi tube bantu banu.”

Cipangano mbocakabushikwa

¹⁰ Mwaami Lesa wakaambila Mose ayi, “Ono bulya ntoopangana abene Isilaeli. Ndaakucita shintu shinene pameenso abo, isho shitana kucitikwaawo pakati ka mishobo imwi mucishi coonse ca panshi. Bantu boonse balaakubona shintu shikankamika isho nebo neMwaami Lesa nsheenga ndamucitila.

¹¹ Munookonkela milawo yoonse njeshi mwaambile sunu. Ndaakutanda bene Amoli, bene Kenani, bene Iti, bene Pelisi, bene Ifi alimwi abene Jebusi kunembo lyanu.

¹² Mutakeeleshi kupanga cipangano abantu ba mucishi ico ncemutooyaamo, mukwiinga inga kaba koose kuli ndimwe.

¹³ Sombi mukamwayulule shipaililo shabo, mukanyonyoole mabwe ngobakeemika pamisena yakulambililaawo alimwi akutimbula shikoshanyo shakwe Ashela, lesa wabo mwanakashi wakubesa.

¹⁴ “Tamweelete kulambila lesa umwi, ceebo nebo neMwaami Lesa, ndishibusuba.

¹⁵ Mutakeeleshi kupanga cipangano abantu ba mucishi ico, mukwiinga pakunoolambila balesa babo alimwi akubabengela milambu, balaakumutamba amwebo. Paceebo ceeci mulaakulya nshebabenga kubalesa babo.

¹⁶ Ono bana banu inga baakweeba banakashi baswamashi abo beenga babakusha kuli ndime, akutalika kulambila balesa babo.

¹⁷ “Tamweelete kupanga balesa basheela alimwi akunoobalambila.

¹⁸ “Mulyeelete kulama bushiku bwakusekelela kulya cimaande. Kweelana ambondakamwaambila, mukanoolya cimaande kwa nshiku shili shosanwe ashobilo mumweenshi wa Abibu, ceebo ngomweenshi ngomwakaswa mucishi ca Ijipiti.

¹⁹ “Woonse mwaana musankwa wakwiiya ngwaangu pantu pomwi abaana basankwa bakwiiya ba shifubwa boonse,

²⁰ Sombi mulyeelete kulubula mwanaambongolo wakwiiya kwiinda mukubengelawo mwanaambelele pamusena wa njiyo. Na mwabula kumulubula, mulyeelete kumutyola nshingo. Bana banu basankwa bakwiiya boonse mukanoobalubula. “Taaku muntu weelete kwisa kuli ndime kaatacite mulambu.

²¹ “Mulicite nshiku shosanwe alimwi abomwi isho nshemweelete kusebensa milimo yanu, sombi pabushiku bwasanu ashobilo, tamweelete kusebensa, nabibo ciindi cakulima alimwi acakutebula.

²² “Ono mulyeelete kulama bushiku bwakusekelela kutebula, paciindi ico ndyemutalika kutebula shishango shanu shitaanshi sha witi, alimwi akulama ciindi cakusekelela kwa Shimpaka ciindi ca cilimo na mwamana kuyobolola shisepo shanu.

²³ “Anu basankwa banu boonse bamanene balyeelete kwisa mukulambila ndime neMwaami Lesa, Lesa wa bene Isilaeli, mankanda otatwe mumwaaka.

²⁴ Na nkamane kutanda mishobo iyo kunembo lyanu alimwi akukomenyako cishi canu, taaku nabi womwi ngweshi akeeleshe kukoma cishi canu paciindi cakusekelela uko kucitwa mankanda otatwe.

²⁵ “Pakubenga munyama ayi ngumulambu kuli ndime, tamweelete kubenga shinkwa. Alimwi mutakeeleshi kushiyako cipansha ca nyama yakacaikwa pabushiku bwa Pasika bwakwiibaluka kusotokela nabi comwi ayi cikalikwe ciilo.

²⁶ “Lyoonse pamwaaka, mukanooleta shakulya shanu isho nsheenga mwataanguna kutebula kuŋanda ya Mwaami Lesa. “Mutateleki kana ka mpongo mumukupa wa banyina.”

²⁷ Lyalo Mwaami Lesa wakaambila Mose ayi, “Lemba maswi oonse aya mukwiinga cipangano cesu awebo alimwi a bene Isilaeli cili pamaswi ngomunya aya.”

²⁸ Mpeeke Mose wakekala kweenka uko aMwaami Lesa kwanshiku shili makumi one, nkokwaamba ayi malumwi amashiku, kaatali nabi kunwa cintu nabi comwi. Wakalemba maswi a cipangano ayo pamabwe apampamene. Maswi ngaakalemba njiMilawo ili Likumi.

Mose mbwaakaseluka paKalundu ka Sinayi

²⁹ Mose ndyaakaseluka paKalundu ka Sinayi kaayumwite mabwe obilo apampamene pakalinga kulembetwe Milawo ili Likumi, ciwa cakwe cakalinga kubala ceebo wakalinga kwaamba aMwaami Lesa. Nacibi boobo, mwiine taakalinga kwishi.

³⁰ Ono Aloni alimwi abantu bamwi boonse ndibakalangilisha Mose akubona ayi ciwa cakwe citoobala, bakaloonda kumushika pafwaafwi.

³¹ Sombi Mose wakabeeta, lyalo Aloni alimwi abamatanjilili boonse ba bene Isilaeli bakaya kuli nguwe, alakwe wakatalika kwaambaabo.

³² Kuswawaawo boonse bene Isilaeli bakabungana kuli nguwe, lyalo wakabalwiita milawo yoonse yakamupa Mwaami Lesa paKalundu ka Sinayi.

³³ Mose ndyaakamana kwaambaabo, wakalifweka cisani kumeenso.

³⁴ Lyoonse Mose ndyaakalinga kwinjila muTente ya Cipangano mukwaamba aMwaami Lesa, wakalinga kulifwekula cisani kumeenso. Ono na waswaamo, wakalinga kulwiita bene Isilaeli shoonse Mwaami Lesa nshaakalinga kumulwiita.

³⁵ Abalo bantu ndibakalinga kubona ayi ciwa cakwe citoobala, wakalinga kucibooshaawo cisani kushikila ciindi ico ncaakalinga kuya mukwaamba aMwaami Lesa.