Kulonga 33 - Baibo Busansulushi Bwa Libuku Ili

Bene Isilaeli mbobakaswa kuKalundu ka Sinayi

¹ Mpeeke Mwaami Lesa wakaambila Mose ayi, “Webo alimwi abantu mbowakakusha mucishi ca Ijipiti, musweeko kumusena uno, muye kucishi ico ncendakashomesha Abulaamu, Isaki, Jakobo alimwi abamulunyungu lwabo.

² Ndaakutuma munjelo ayi akamutanjilile, alimwi mucishi ico ndaakutandamo bene Kenani, bene Amoli, bene Iti, bene Pelisi, bene Ifi alimwi abene Jebusi.

³ Mutooya kucishi ico muli bubile abulongo bubotu. Sombi nebo neenka teshi njaanu, mukwiinga muli bantu beshicimpamya, aboobo inga ndaakumunyonyoola munshila.”

⁴ Ono bantu ndibakanyumfwa boobo, bakatalika kuungumana alimwi bakacileka akufwala shakulibotesha shili anga ngamakosa.

⁵ Ceebo Mwaami Lesa wakaambila Mose ayi, “Ulwiite bene Isilaeli maswi angu ayi, ‘Muli bantu beshicimpamya. Na ndayaanu kwaciindi ciniinibo, inga ndamunyonyoola cakumaninina. Ono amufuule shakulibotesha shanu, nebo ntooshiba cakucita pali ndimwe.’ ”

⁶ Aboobo ndibakaswa paKalundu ka Sinayi, bene Isilaeli bakacileka kufwala shakulibotesha shabo.

Tente ya Cipangano

⁷ Ono lyoonse na bene Isilaeli batooyaka misumba, Mose wakalinga kuyaka Tente isalalite pamusena utalamukite amisumba. Yakalinga kwiitwa ayi “Tente ya Cipangano.” Na kuli muntu usuni kwiipusha kuMwaami Lesa, wakalinga kuya nkomunya uko.

⁸ Lyoonse na Mose wayaako uko, bantu bakalinga kwiimikana pamilyango ya misumba yabo akunokweebela Mose kushikila weenjila muTente ya Cipangano.

⁹ Lyalo na weenjila, licincilo lya likumbi lyakalinga kuswa kwiculu akwiimikana pamulyango wa Tente iyo. Mpeeke Mwaami Lesa wakalinga kwaamba aMose.

¹⁰ Ono bantu kulilabo na licincilo lya likumbi balibona pamulyango wa Tente, boonse bakalinga kunyamuka akukotamina Mwaami Lesa, womwi awomwi kaaimfwi kumulyango wa musumba wakwe.

¹¹ Nkokwaamba ayi Mwaami Lesa wakalinga kubandika aMose, bweenka mbuli muntu mbwaamba amubye. Pesule, mose wakalinga kuboola kumusumba. Sombi Joshuwa mwanaakwe Nani uyo wakalinga shikumucafwa, wakalinga kwikalabo muTente ya Cipangano iyo.

Mwaami Lesa mbwaakalasha bene Isilaeli kuba bantu bakwe

¹² Mpomunyaawo Mose wakaambila Mwaami Lesa ayi, “Ncakwiila mwandwiita ayi ntanjilile bantu aba kucishi ico, sombi tamuna kundwiita wooyo ngweshi muntumaakwe. Mwaamba ayi mulinshi kabotu alimwi ayi mulikondetwe mumilimo yangu.

¹³ Ono na mbocibete ubo, amundwiite nshila shanu, kwaamba ayi noomusebensela akutolelela kumusangalasha. Mwiibaluke alimwi ayi mwakasala mushobo uyu kuba waanu.”

¹⁴ Mwaami Lesa wakakumbula ayi, “Ndaakuya amwebo alimwi ndaakumupa nkusu shakukoma.”

¹⁵ Lyalo Mose wakaamba ayi, “Na mukabule kuya aswebo, mutatusuminishi kuswa pamusena uno.

¹⁶ Ino bantu bamwi inga beshiba buyani ayi mulikondetwe mubantu banu alimwi anebo na mukabule kuya aswebo? Mukwiinga na mukaye aswebo, bantu boonse mucishi ca panshi balaakwishiba ayi tulipusene ambabo.”

¹⁷ Mpeeke Mwaami Lesa wakaambila Mose ayi, “Ndaakucita kweelana ambowasenga ceebo ndikwishi kabotu alimwi ndikondetwe muli ndiwe.”

¹⁸ Lyalo Mose wakaamba ayi, “Ndamusenga ayi mumboneshe bulemu bwanu.”

¹⁹ Mwaami Lesa wakumbula ayi, “Ntoolengesha ayi bulemu bwangu boonse bwiinde panembo lyako, alimwi ntoobanda pameenso ako liina lyangu lisalalite ayi Mwaami Lesa. Nebo ndime Mwaami Lesa alimwi ndabonesha lulekelelo alimwi ankuumbu kubaabo mboonsuni.

²⁰ Teshi nkuboneshe ciwa cangu, ceebo taaku weenga wambona akutolelela kuba muumi,

²¹ sombi kuno kufwaafwi anebo nkooli musena palibwe, apo mpweenga weemikana.

²² Ono na bulemu bwangu bunokwiinda, ntookubika mucimfwengo ca mulibwe, akukufweka lyaansa lyangu kushikila nyinde.

²³ Lyalo ntookushawo lyaansa lyangu, mpeeke utoombonabo kwisule, kuteshi kuciwa cangu, sobwe.”