Kulonga 32 - Baibo Busansulushi Bwa Libuku Ili

Mucende mwaana wa golodi

¹ Ono bantu ndibakabona ayi Mose wacelwa kuswa pakalundu, bakabungana kuli Aloni akumwaambila ayi, “Swebo tatwishi cacitika kuli Mose uyo wakatukusha mucishi ca Ijipiti. Paceebo ceeci tupangile lesa weshi atutanjilile.”

² Alakwe aloni wakabaambila ayi, “Amufuule masikiyo a golodi ayo afwete bamakaanu, bana banu basankwa alimwi abanakashi, mundetele.”

³ Aboobo bantu boonse bakafuula masikiyo abo a golodi, akwaaleta kuli Aloni.

⁴ Mpeeke wakabwesa masikiyo ayo, waasungulula akutila golodi mucikombola alimwi akupanga mucende mwaana wa golodi. Lyalo bantu bakaamba ayi, “Nobene Isilaeli, uyu ngolesa wesu, uyo wakatukusha mucishi ca Ijipiti!”

⁵ Mpomunyaawo Aloni ndyaakabona boobo, wakayaka cipaililo kunembo lya muceende mwaana wa golodi akwaambilisha ayi, “Ciilo kulaakuba kusekelela kwakulemeka Mwaami Lesa”

⁶ Ingayi bushiku bwakaboolaawo macuunsacuunsa bantu bakabenga milambu yakutenta alimwi amilambu ya bwanabwankashi. Mpomunyaawo bantu bakekala panshi akutalika kulya akusekelela, uko kwakesa mukuba kwa bucakolwa bupusenepusene alimwi akucita bufuule.

⁷ Mpeeke Mwaami Lesa wakaambila Mose ayi, “Seluka onoono ceebo bantu bako abo mbowakakusha mucishi ca Ijipiti, babisha alimwi akunsuula.

⁸ Baswa kale munshila iyo njendakabalwiita ayi banookonkela. Basungulula golodi akupanga mucende mwaana wa golodi. Bamulambila alimwi akubenga milambu kuli nguwe. Batokwaamba ayi, ‘Nobene Isilaeli, uyu ngolesa wesu, uyo wakatukusha muIjipiti!’ ”

⁹ Lyalo Mwaami Lesa wakaambila Mose ayi, “Bushicimpamya bwa bantu aba ndishi mbobubete.

¹⁰ Ono uteeleshi kunkasha. Ndakalala abuumbi ceebo ca bantu abo, aboobo ntoobanyonyoola. Kuswawaawo ndaakulengesha webo alimwi abamulunyungu lwako kuba mushobo unene abuumbi.”

¹¹ Sombi Mose wakakombelela Mwaami Lesa, Lesa wakwe akwaamba ayi, “NoBaami baLesa, ino inga mwakalalila buyani boobo bantu banu, abo mbomwakafuna kuswa mucishi ca Ijipiti kwiinda munkusu shanu shiindaawo?

¹² Ceebonshi mulisuni bene Ijipiti baambe ayi, ‘Wakakusha bantu bakwe kuswa mucishi ca Ijipiti kwaamba ayi abacailebo limwi mutulundu akubanyonyoola cakumaninina.’ Mutakalali, amupilule miyeeyo yanu, mutaleti makatasho pabantu banu.

¹³ Amwiibaluke basebenshi banu bene Abulaamu, Isaki alimwi aJakobo. Mwiibaluke cipangano ico ncemwakabakonkomesha ayi mulaakubapa bamulunyungu baanji mbuli nyenyeenshi mwiculu, alimwi ayi mulaakupa bamulunyungu babo cishi coonse ico ncemwakashomesha ayi cilaakunoolibo cinebo lyoonse alyoonse.”

¹⁴ Aboobo Mwaami Lesa wakapilula miyeeyo yakwe, mpeeke wakacileka kuleta makatasho pabantu bakwe ayo ngaakalinga aamba.

¹⁵ Mose wakaseluka pakalundu akuboolela, kaacite mabwe obilo apampamene apo pakalinga kulembetwe milawo kumbasu shoonse shobilo.

¹⁶ Lesa mwiine ngowakapanga mabwe apampamene aya akulembawo milawo.

¹⁷ Mpomunyaawo Joshuwa wakanyumfwa ciyobeyobe ca bantu, akwaambila Mose ayi, “Ntoonyumfwa ciyobeyobe cili anga nca nkondo kumisumba.”

¹⁸ Lakwe Mose wakakumbula ayi, “Ciyobeyobe ico tacitoonyumfwika anga nca bantu bakoma nabi kulila kwa bantu bakomwa. Nciyobeyobe ca bantu batokwiimba.”

¹⁹ Ono Mose ndyaakashika pafwaafwi amisumba akubona mucende mwaana alimwi abantu bakalinga kushana, wakakalala abuumbi. Mpomunyaawo panshi lya kalundu, mabwe apampamene ayo ngaakalinga kucite wakaawaala panshi, akupwaika.

²⁰ Kuswawaawo wakabwesa mucende mwaana uyo ngobakapanga akumusungulula, wamupelapela waboolabo anga mbusu alimwi akubusanseela pamaanshi, mpeeke wakakakatisha bene Isilaeli ayi banwe.

²¹ Lyalo wakeepusha Aloni ayi, “Ino bantu aba bakucita buyani, cakwaamba ayi ubaleeke bacite cibiibi ca mushobo wooyu?”

²² Aloni wakakumbula ayi, “Mutankalalili nkambo. Mwebo mulishi bantu aba mbobasuminite kucita cibiibi.

²³ Nebo bakandwiita ayi, ‘Swebo tatwishi cacitika kuli Mose uyo wakatukusha mucishi ca Ijipiti. Paceebo ceeci tupangile lesa weshi atutanjilile.’

²⁴ Anebo ndakabasenga ayi bandetele masikiyo abo a golodi, mpeeke abo bakalinga kucite, bakafuula akumpa. Mpomunyaawo ndakaawaala mumulilo, lyalo mwakaswa mucende mwaana uyu!”

²⁵ Mose wakabona ayi Aloni wakabaleka bantu ayi bacite bubi akulilensha nsoni pameenso a balwani babo.

²⁶ Paceebo ceeci wakeemikana pamwinjililo wa mumisumba akwaamba ayi, “Uyo woonse uli kulubasu lwa Mwaami Lesa, ese kokuno!” Mpeeke bene Lefi boonse bakabungana kuli nguwe.

²⁷ Lyalo wakabaambila ayi, “Mwaami Lesa, Lesa wa bene Isilaeli waambila ndimwe noonse ayi mubwese mipeeni yanu muye moonse mumisumba kuswa kumwinjililo uyu kushikila akuumwi. Munooya cicaya bamakwabanu, babyaanu alimwi abeshikamukobonyinaanu.”

²⁸ Bene Lefi bakanyumfwila akucaya bantu bali mpashi shuulu shotatwe pabushiku ubo.

²⁹ Mpomunyaawo Mose wakaambila bene Lefi ayi “Sunu mwalibenga kuMwaami Lesa nobeene ayi muli bapailishi beshikumusebensela kwiinda mukucaya bana banu basankwa alimwi abamakwabanu, aboobo Mwaami Lesa wamupa coolwe.”

³⁰ Pabushiku bwakaboolaawo, Mose wakaambila bantu ayi, “Mwacita cibiibi ciyoosha. Sombi bulya ntooya pakalundu alimwi kuMwaami Lesa, mpashi inga wanyumfwila akumulekelela cibiibi canu.”

³¹ Lyalo Mose wakaboolela kuMwaami Lesa akwaamba ayi, “Bantu aba bacita cibiibi ciyoosha. Bakapanga lesa wa golodi akumulambila.

³² Ndakombelela amubalekelele. Sombi na mubule kubalekelela, mukushe liina lyangu mulibuku umo momwakalemba meena a bantu banu.”

³³ Alakwe Mwaami Lesa wakamukumbula ayi, “Ngameena a bantu abo bambishisha ngweshi nkakushe mulibuku lyangu.

³⁴ Ono koya, tanjilila bantu kuya kumusena uyo ngondakakulwiitaawo. Wiibaluke ayi munjelo wangu ulaakukutanjilila, sombi ciindi cilaakushikila ndyeshi nkape bantu mulandu pacibiibi cabo.”

³⁵ Mpeeke Mwaami Lesa wakatuma bulwashi pabantu, mukwiinga bakalengesha ayi Aloni apange mucende mwaana wa golodi.