Kulonga 31 - Baibo Busansulushi Bwa Libuku Ili

Bacishi kuyaka Tente ya Cipangano

¹ Mpomunyaawo Mwaami Lesa wakaambila Mose ayi,

² “Ndasala Besalelo mwanaakwe Uli, mushikulu wakwe Elu wa mumukowa wakwe Juda,

³ alimwi ndamwisusha Mushimu wangu. Ndamupa lushibo, maano alimwi abusongo bwa pabuyaki buli boonse.

⁴ Nkokwaamba ayi busongo bwakuyeeyela bweenga bwaba cintu cibotu akucipanga agolodi, silifa, alimwi abulonse.

⁵ Ndamupa abusongo bwakutimbula kabotu mabwe alimwi akwaabamba mpwaaelete, kubesa shisamu, alimwi akucita milimo imwi yoonse ya buyaki.

⁶ Ndasala aOolyabu mwanaakwe Ayisamaki, wa mumukowa wakwe Dani kwaamba ayi asebense aBesalelo. Alimwi ndapa busongo bunene kubacishi milimo boonse, kwaamba ayi bapange cili coonse ncendaamba

⁷ mbuli Tente ya Cipangano, Libokoshi lya Cipangano, cifwekesho ca nkumbu alimwi ashakubotesha shoonse sha muTente.

⁸ Nkokwaamba ayi tebulu ashintu sha njiyo, cakubikawo malampi ca golodi wiine wiine ashintu sha ncico, cipaililo cakutentelawo tununkila kabotu,

⁹ cipaililo cakubengelawo milambu yakutenta ashintu sha ncico, mbale ifongomene yakusambilaamo alimwi acapanshi ca ncico,

¹⁰ shakufwala shabulemu shisalalite shakwe Aloni alimwi abana bakwe isho shakunoofwala na batoosebensa mulimo wa bupailishi,

¹¹ mafuta akunanika, alimwi atununkila kabotu twa muMusena Usalalite. Pakupanga shintu shoonse ishi, balyeelete kupanga kweelana ambondakakwaambila.”

Bushiku bwakookesha bwa Cibelu

¹² Mpeeke Mwaami Lesa wakaambila Mose

¹³ ayi akalwiite bene Isilaeli ayi, “Kamulama nshiku shangu shakookesha sha Shibelu, mukwiinga nkeshibilo ka myaaka yoonse pakati pali ndimwe anebo, kwaamba ayi nebo neMwaami Lesa ndamulengesha kuba bantu bangu.

¹⁴ Mulyeelete kulama bushiku bwakookesha mukwiinga bulisalalite. Uyo woonse ngweshi akabule kulama bushiku ubo akunoosebensa pali mbubo, uyo ulyeelete kucaikwa.

¹⁵ Mulicite nshiku shosanwe abomwi nshemweelete kusebensa milimo yanu, sombi bushiku bwasanu ashobilo, mbushiku bwangu ubo busalalite kuli ndime neMwaami Lesa. Uyo woonse weenga wasebensa mulimo uli woonse pabushiku ubo, ulyeelete kucaikwa.

¹⁶ Anu bene Isilaeli balyeelete kulama bushiku ubo ayi nkeshibilo ka Cipangano.

¹⁷ Bushiku ubo nkeshibilo ka nshiku shoonse pakati kabene Isilaeli alimwi anebo, ceebo nebo neMwaami Lesa ndakalenga liculu alimwi acishi ca panshi munshiku shosanwe abomwi, ono pabushiku bwasanu ashobilo, ndakacileka kusebensa akookesha.”

¹⁸ Ono Lesa ndyaakamana kulwiita Mose paKalundu ka Sinayi, wakamupa mabwe obilo apampamene alya, apo Lesa mwiine mpwaakalemba milawo.