Kulonga 29 - Baibo Busansulushi Bwa Libuku Ili

Milawo yakubenga Aloni alimwi abana bakwe basankwa pabupailishi

¹ “Ono mbweshi ukacite kuli Aloni alimwi abana bakwe basankwa pakubabenga ayi bansebensele mulimo wa bupailishi mbulya. Ukabwese mucende mwaana alimwi ambelele shisankwa shobilo shitacite kampenda kali koonse.

² Ukasebenseshe fulaulo ubotu abuumbi wa witi, sombi utacite cimena, akupanga shimaande shimwi shakusenkanya amafuta a olifi, shimwi shitakabi amafuta, ashalo shimwi shipampamene shinanikitwe mafuta.

³ Kuswawaawo ukashibike mumutaanga akushibenga kuli ndime pakunoobenga milambu ya mucende alimwi ambelele shisankwa shobilo.

⁴ “Mpeeke ukalete Aloni alimwi abana bakwe basankwa kumulyango wa Tente ya Cipangano akubalwiita ayi balisalashe amaanshi.

⁵ Lyalo ukafwalike Aloni shakufwala sha bupailishi, nkokwaamba ayi mwinjila, mungaanjo wa mukati lya efodi, efodi, cakufwala ca pacaamba, alimwi alaamba.

⁶ Ukamufwalike cisani ca kumutwi akwaangawo keshibilo kasalalite kakubengwa kalembetwe ayi ‘Wakabengwa kuMwaami Lesa.’

⁷ Ndyeshi ukabwese mafuta, ukamutilile pamutwi akumunanika.

⁸ “Alimwi ukalete bana bakwe basankwa akubafwalika minjila,

⁹ balaamba mumakome alimwi ashisooti kumitwi. Ubo mboweelete kubenga Aloni alimwi abana bakwe basankwa. Balo, pantu pomwi abamulunyungu lwabo balyeelete kunsebensela mulimo wa bupailishi lyoonsebo.

¹⁰ “Lyalo ukalete mucende kunembo lya Tente ya Cipangano akulwiita Aloni alimwi abana bakwe basankwa ayi babike maansaabo pamutwi wa nguwo.

¹¹ Ukamucaile pameenso angu pamulyango wa Tente ya Cipangano.

¹² Alimwi ukabwese bulowa bumwi bwa mucende, ukasumpemo munwe akunanika shintu shili anga ngameeca sha kucipaililo. Lyalo bulowa boonse mbweshi bukacaaleewo ukabutile pacapanshi ca cipaililo.

¹³ Kuswawaawo ukabwese mafuta oonse afweka shamukati, cipansha cibotu ca kulini, alimwi ansa shobilo amafuta a nshisho, akushitentela pacipaililo ayi ngumulambu kuli ndime.

¹⁴ Sombi nyama, cipaya alimwi amala a mucende, mukashitentele pansengwe lya misumba. Uyu ngumulambu wakukusha shibiibi sha bapailishi.

¹⁵ “Mpeeke ukabwese mbelele yomwi isankwa, akulwiita aloni alimwi abana bakwe basankwa ayi babike maansaabo pamutwi wa njiyo.

¹⁶ Ukeecaaye, akubwesa bulowa bwa njiyo alimwi akubusanseela mumbasu shoonse shone sha cipaililo.

¹⁷ Ukatimboole mbelele isankwa iyo mushipansha shipansha. Ukasaanshe shamukati amyeendo ya njiyo ya kwisule, akushibika pamutwi alimwi ashipansha shimwi.

¹⁸ Mpomunyaawo ukatente mbelele yoonse iyo pacipaililo ayi ngumulambu wakutenta. Bweema bwa mulambu uyo, bulansangalasha.

¹⁹ “Lyalo ukabwese mbelele imwi isankwa iyo isebenseshekwa pakubenga, akulwiita Aloni alimwi abana bakwe basankwa ayi babike maansaabo pamutwi wa njiyo.

²⁰ Ukeecaaye, akubwesa bulowa bwa njiyo bumwi akunanika Aloni alimwi abana bakwe basankwa kumatwi a kululyo, kuminwe inene ya kumaansa a kululyo alimwi akushikumo shinene sha kumyeendo ya kululyo. Bulowa boonse bweshi bukacaaleewo, ukabusanseele mumbasu shoonse shone sha cipaililo.

²¹ Lyalo ukabwese bulowa bumwi buli pacipaililo amafuta a olifi amwi akusanseela pali Aloni ashakufwala shakwe, alimwi apabana bakwe basankwa ashakufwala shabo. Mpeeke Aloni, bana bakwe alimwi ashakufwala shabo, shilaakubengwa kuli ndime.

²² “Ukatimbuleko mafuta a mbelele isankwa iyo, mucila ucite mafuta uyo, mafuta afweka pashamukati, cipansha cibotu ca kulini, insa shoonse shobilo amafuta a nshisho alimwi alibelo lya kululyo.

²³ Ono mumutaanga wa shimaande uyo wakapekwa kuli ndime, ukushemo cimaande comwi comwi kumishobo yoonse. Nkokwaamba ayi, cimaande cisenkene amafuta a olifi, citacite mafuta alimwi acimwi cipampamene.

²⁴ Shakulya shoonse ishi ukape Aloni alimwi abana bakwe basankwa, alimwi akubalwiita ayi bakashibenge kuli ndime ayi ncipo ca cakutambeeka.

²⁵ Kuswawaawo ukabanyaaye akushitentela pacipaililo, peculu lya mulambu wakutenta. Bweema bwa mulambu uyo bulansangalasha.

²⁶ “Lyalo ukabwese ntiti ya mbelele akwiibenga kuli ndime ayi ncipo cakutambeeka. Cipansha ici ca mbelele iyi cilaakunooli caako.

²⁷ “Kuswawaawo na muntu wabikwa pabupailishi, ntiti iyo alimwi alibelo lya mbelele isho shitoosebenseshekwa pamulimo wakubikwa pabupailishi, shilyeelete kubengwa kuli ndime ayi ncipo cakutambeeka akubikwa palubasu ayi ncabapailishi.

²⁸ Uyu ulaakunooli mulawo wangu wa nshiku shoonse ayi na bantu bangu batoopa cipo ca bwanabwankashi, ntiti alimwi alibelo nsha bapailishi. Ico ncipo bantu nceshi bakanoopa ndime neMwaami Lesa.

²⁹ “Mpomunyaawo shakufwala sha bupailishi shakwe Aloni shilaakupekwa kubamulunyungu lwakwe basankwa na akafwe, kwaamba ayi bakanoofwala pakubikwa pabupailishi.

³⁰ Ono mwaana musankwa uyo weshi akapyane Aloni baishi pabupailishi akwinjila muTente ya Cipangano kwaamba ayi asebensele muMusena Usalalite, ulyeelete kufwala shakufwala ishi sha bupailishi kwanshiku shosanwe ashobilo.

³¹ “Lyalo ukabwese nyama ya mbelele isankwa iyo isebenseshekwa pakubika Aloni alimwi abana bakwe basankwa pabupailishi, akwitelekela muMusena Usalalite.

³² Pamulyango wa Tente ya Cipangano, Aloni alimwi abana bakwe basankwa balyeelete kulya nyama iyo, pantu pomwi ashimaande shakacaala mumutaanga.

³³ Balyeelete kulya sheesho shakasebenseshekwa pakulekelelwa shibiibi shabo ndibakabikwa pabupailishi. Bapailishi beenkabo mbobeelete kulya, ceebo cakulya ici cilisalalite.

³⁴ Na nyama imwi nabi cimaande cimwi shabula kulikwa kushikila akuciindi ca macuunsa, shilyeelete kutentwa. Tasheelete kulikwa ceebo shilisalalite.

³⁵ “Ulyeelete kucita shoonse shiyandika pakubikwa Aloni alimwi abana bakwe basankwa pabupailishi. Ulyeelete kutola nshiku shosanwe ashobilo, akucita kweelana ambondakakwaambila.

³⁶ Pabushiku bomwi abomwi, ulyeelete kubenga mucende womwi ayi ngumulambu wakulekelela shibiibi. Mulambu uyo ulaakusalasha cipaililo. Pesule, ukacinanike mafuta a olifi ayi ucisalashe.

³⁷ Ukanoocita mbomunya ubo kwanshiku shosanwe ashobilo shoonse. Lyalo cipaililo cilaakunoosalalite abuumbi, alimwi cintu cili coonse ceenga cakumyaako cilaakucisikwa ceebo cipaililo cilisalalite.

Milambu ya nshiku shoonse

³⁸ “Anu lyoonsebo pabushiku, ukanoobenga mulambu pacipaililo wa bana ba mbelele bobilo bacite mwaaka womwi.

³⁹ Mwanaambelele umwi akanoobengwa macuunsa alakwe umwi macolesha.

⁴⁰ Ono pakubenga mwanaambelele wakutaanguna, ukanootenta akilogilamu yomwi ya fulaulo wa witi upelekete, usenkene alita yomwi ya mafuta a olifi eene eene alimwi alita yomwi ya waini ayi ncipo ca cakunwa.

⁴¹ Alakwe mwanaambelele umwi ukamubenge macolesha akutenta fulaulo, mafuta a olifi alimwi awaini. Shoonse shikanokweelene bweenka mbuli sha macuunsa ayi ncipo ca shakulya kuli ndime neMwaami Lesa. Bweema bwa nshisho bulansangalasha.

⁴² Inshiku shoonse mulambu wakutenta uyu, nkokwaamba ayi bana ba mbelele ashipo shoonse isho, ulyeelete kubengwa kunembo lyangu pamulyango wa Tente ya Cipangano. Uko nkweshi nkanookumanina abantu bangu akunokwaamba awebo.

⁴³ Uko nkomunya, ndaakunookumana abene Isilaeli alimwi bulemu bwangu bulaakusalasha musena uyo.

⁴⁴ Ndaakusalasha Tente, cipaililo, Aloni alimwi abana bakwe basankwa ayi bakansebensele mulimo wa bupailishi.

⁴⁵ Lyalo ndaakwikala pakati ka bene Isilaeli akuba Lesa wabo.

⁴⁶ Abalo balaakwishiba ayi ndime Mwaami Lesa wabo uyo wakabakusha mucishi ca Ijipiti kwaamba ayi nkekale pakati kabo. Nebo ndime Mwaami Lesa, Lesa wabo.