Kulonga 28 - Baibo Busansulushi Bwa Libuku Ili

Cakufwala ca bupailishi

¹ “Ono ita Aloni mukwanu alimwi abana bakwe basankwa, Nadabu, Abiyu, Eliyasa alimwi aItama. Ubapatule kuswa mubene Isilaeli kwaamba ayi bakansebensele mulimo wa bupailishi.

² Mukwanu Aloni akatungilwe shakufwala sha bupailishi, isho sheenga shamuletela bulemu alimwi abubotu.

³ Ono ukeete bacite buuya bwakutunga, boonse abo mbondakapa busongo, akubalwiita kutunga shakufwala shakwe Aloni kwaamba ayi mukamusalashe akanonsebensela mulimo wa bupailishi.

⁴ Ukabalwiite ayi bakatunge cakufwala ca pacaamba, cakufwala ca bupailishi ciitwa ayi efodi, mungaanjo, amwinjila utungitwewo shintu shimwi shakubotesha, cakufwala ca kumutwi alimwi alaamba. Shakufwala ishi sha bupailishi balyeelete kutungila Aloni alimwi abana bakwe basankwa ayi bakansebensele mulimo wa bupailishi.

⁵ Beshikutunga abo balyeelete kusebensesha booya bwa mbelele buboneka anga ndiculu, bufubelafubela alimwi abusalalabo pyu. Balyeelete kusebensesha busalu bwa golodi alimwi ansaalu shibotu shiteshimite.

⁶ “Alimwi bakatunge cakufwala ca bupailishi ciitwa ayi efodi ca booya bwa mbelele buboneka anga ndiculu, bufubelafubela, busalalabo pyu, busalu bwa golodi alimwi ansaalu ibotu iteshimite. Cakufwala ico coonse cilyeelete kutungwa ashimwi shintu shakubotesha.

⁷ Cilyeelete kuba amwakupusha ntambo mobilo pashifushi mumbasu shoonse shobilo kwaamba ayi kacaangwa.

⁸ Kucakufwala ico kukatungilwe alaamba utungitwe kabotu wa shisani nshemunya ishi kwaamba ayi cikanoonungenebo.

⁹ Ukabwese mabwe obilo eetwa ayi onikisi akulembawo meena a bana bakwe Jakobo basankwa bali likumi abobilo.

¹⁰ Kweelana bweenka mbobakashalwa. Nkokwaamba ayi palibwe lyomwi palyeelete kuba meena osanwe alyomwi, apalo pamwi osanwe alyomwi.

¹¹ Ukabone muntu ucishi kupanga sheela ayi akalembe meena a bana bakwe Jakobo basankwa pamabwe obilo aya, akwaananika golodi.

¹² Kuswawaawo ukaabike pashakupushamo ntambo paefodi kwaamba ayi akanokwiimikanina mikowa ili likumi ayobilo ya bene Isilaeli. Munshila iyo, Aloni ulaakunyamuna meenaabo pashifushi shakwe, ayi nebo neMwaami Lesa nkanoyeeyabo bantu bangu lyoonse.

¹³ Ukapange shakukobekaamo sha golodi shobilo,

¹⁴ alimwi ancetani shobilo sha golodi wiine wiine, shipyatitwe anga njimyaando, akukakobeka kusheesho shakukobekaamo.

Cakufwala ca pacaamba

¹⁵ “Ono kukatungwe acakufwala pacaamba ca mupailishi munene ayi anoocisebensesha mukwishiba kuyanda kwangu nebo neLesa. Acalo cilyeelete kutungwa kushintu sheenka shili mbuli sha efodi alimwi ashakubotesha shikoshenye.

¹⁶ Cakufwala ici cilyeelete kunokweelenebo mumbasu shoonse alimwi cipetetwe lyobilo mumbasu shoonse cikabe masentimita ali 22.

¹⁷ Pali ncico, ukabikewo mindando ya mabwe amakwebo yone. Mumundando wakutaanguna ukabikemo mabwe eetwa ayi lubi, topasi alimwi agaaneti.

¹⁸ Mumundando wabili mukaye mabwe eetwa ayi emalodi, safaya alimwi dayimondi.

¹⁹ Mumundando watatu ukabikemo mabwe eetwa ayi tekoisi, ageti alimwi aamefisiti

²⁰ Mumundando wane mukaye mabwe eetwa ayi belilu, kanelyani alimwi ajasipa. Mabwe amakwebo aya alyeelete kubikwa mushakubikaamo sha golodi.

²¹ Palibwe lyomwi alyomwi lya mabwe ayo ali likumi aobilo, palyeelete kulembwa liina lyomwi lya mwanaakwe Jakobo musankwa, kwaamba ayi eemikanine mikowa ya bene Isilaeli.

²² Ono pacakufwala pacaamba, ukapangilewo ncetani sha golodi wiine wiine shakupyata anga njimyaando.

²³ Ukapange shakukobekaamo sha golodi shobilo, akwaacatanya peculu lya makonko a cakufwala ca pacaamba,

²⁴ alimwi akwaanga ncetani shobilo isho mushakukobekaamo shobilo isho.

²⁵ Akwalo kweela ncetani shobilo shimwi isho, kukaangwe shakukobekaamo shobilo sha paefodi ayi ukeecatanye amwakupusha pashifushi kumeenso a efodi.

²⁶ Kuswawaawo ukapange shakukobekaamo sha golodi shobilo akushicatanya kumakonko a panshi lya cakufwala pacaamba, ono mukati ka mupeto pafwaafwi aefodi.

²⁷ Mpeeke ukapange shakukobekaamo ashimwi shobilo sha golodi akushicatanya panshi lya mwakupusha mobilo pashifushi kumeenso a efodi, pafwaafwi a mupeto alimwi peculu lya laamba utungitwe kabotu.

²⁸ Ono ndyeshi ukaange shakukobekaamo a cakufwala ca pacaamba kushakukobekaamo sha efodi akasani ka mushobo wa liculu, kwaamba ayi cakufwala ca pacaamba cikanookala peculu lya laamba, cakubula kusensuluka.

²⁹ “Ono na Aloni weenjila muMusena Usalalite, ulaakunoofwala cakufwala ca pacaamba ico cilembetwewo meena a mikowa ya bene Isilaeli, ayi nebo neMwaami Lesa nkanokwiibaluka bantu bangu lyoonsebo.

³⁰ Mucakufwala ca pacaamba ico, ukabikeko Ulimu alimwi aTumimu, kwaamba ayi Aloni akanooshinyamuna pakwisa pameenso angu. Mushiindi sha mbuli sheeshi, lyoonse ulyeelete kufwala cakufwala ico, kwaamba ayi akanooshiba kuyanda kwangu pabene Isilaeli.

Shakufwala shimwi sha bupailishi

³¹ “Anu mungaanjo wakufwala mukati lya efodi ulyeeletebo kutungwa abooya bwa mbelele buboneka anga ndiculu.

³² Ulyeelete kuba abulyango bwakwinjishamo mutwi, ubo bweelete kutungwa akamupeto kakukasha kukwaamuka.

³³ Alimwi ukatungileko shili anga nshisepo shiitwa ayi pomegilaneti a booya bwa mbelele buboneka anga ndiculu, bufubelafubela alimwi abusalalabo pyu kumupeto wa panshi wa mungaanjo. Pakati lya mapomegilaneti, ukabikewo tumilangu twa golodi.

³⁴ Tumilangu twa golodi uto alimwi apomegilaneti, shilyeelete kubambana, apa kamulangu panembo pomegilaneti, kushinguluka mupeto wa mungaanjo.

³⁵ Aloni ulyeelete kufwala mungaanjo uyu pakunoosebensa mulimo wabupailishi. Na wesa pameenso angu muMusena Usalalite nabi pakunooswa, tumilangu tulaakunoonyumfwika kulila. Aboobo teshi akacaikwe.

³⁶ “Ukapange keela kapampamene ka golodi wiine wiine, akulembaawo ayi, ‘Wakabengwa kuMwaami Lesa.’

³⁷ Keela ako kakaangwe kunembo lya cisani cakufwala kumutwi acisani ciboneka anga ndiculu.

³⁸ Aloni ulyeelete kunookafwala pankumo, kwaamba ayi nebo neMwaami Lesa nkanootambula shipo shoonse bene Isilaeli nsheenga babenga kuli ndime, nabi bantu babisha pakupa shipo isho.

³⁹ “Ukatunge mwinjila wakwe Aloni kuswa kucisani cibotu citeshimite, cisani cibotu citeshimite ca kumutwi alimwi alaamba wakatungwaawo shakubotesha.

⁴⁰ “Ukatunge aminjila, balaamba alimwi ashisani sha kumutwi sha bana bakwe Aloni basankwa, kwaamba ayi bakanooboneka cabulemu alimwi abubotu.

⁴¹ Shakufwala ishi ukafwalike mukwanu Aloni alimwi abana bakwe basankwa. Kuswawaawo ukabananike mafuta a olifi, akubabenga kuli ndime ayi bakansebensele mulimo wa bupailishi.

⁴² Ukabatungile atuputula twamukati twa cisani citeshimite, tuswa mubukome kweela mumabelo kuloondesha kuba matakosha.

⁴³ Anu Aloni alimwi abana bakwe basankwa balyeelete kunoofwala shakufwala ishi lyoonsebo na benjila muTente ya Cipangano, nabi kuya kucipaililo mukusebensa mulimo wa bupailishi muMusena Usalalite, kwaamba ayi bakabule kucaikwa ceebo cakuba mubilibo. Uyu ngumulawo weshi ukabule kumana kuli Aloni alimwi abamulunyungu lwakwe.