Kulonga 27 - Baibo Busansulushi Bwa Libuku Ili

Cipaililo

¹ “Ukapange cipaililo ca cisamu ca mulombe, cilyeelete kuba ca makonko one alimwi mumbasu shoonse cilyeelete kuba masentimita 220 sombi kuya mwiculu amasentimita 130.

² Peculu lya makonko one oonse, ulyeelete kupangilamo shintu shili anga ngameeca. Shilyeelete kunoocatenebo acipaililo, alimwi coonsebo ukacinanike bulonse.

³ Ukapange shikaye shakuyolelawo milota, mafosholo, mbale shifongomene, shakusubushako nyama alimwi ashikaye shakubikawo mulilo. Shoonse ishi shilyeelete kuba sha bulonse.

⁴ Kuswawaawo ukapange cili anga nguseefwa ca bulonse, ukabikeemo ashakukobekesha sha bulonse mumakonko oonse a ncico.

⁵ Cintu ico cili anga nguseefwa ukacibike panshi lya mukuti wa cipaililo kwaamba ayi cishike pakati lya cipaililo.

⁶ Ukapange alimwi ashisamu shakunyamwishaako sha cisamu ca mulombe akushinanika bulonse.

⁷ Kuswawaawo pakunyamuna, ukashinjishe mushakukobekesha shoonse shone ayi shikabe kumbasu shobilo sha cipaililo.

⁸ Cipaililo ici cilyeelete kuba ca mapulanga, alimwi alupako mukati. Ukapange kweelana ambondakamubonesha pakalundu.

Lubansa lwa Tente ya Cipangano

⁹ “Ono kuTente ya Cipangano, ukabikeko shisani shibotu shiteshimite kulushito. Kulubasu lwa kumalenge, shisani ishi shilyeelete kuba mamita ali 44 mubulaamfu.

¹⁰ Shisani ishi shikacate kusheela sha bulonse shili makumi obilo. Sheela isho shilyeelete kunooli mushapanshi sha bulonse shili makumi obilo, alimwi ashakukobekesha atweela sheelete kupangwa kuswa kusilifa.

¹¹ Akwalo kulubasu lwa kumatwa kulyeelete kuba mamita ali 44 mubulaamfu, sheela sha bulonse shili makumi obilo, shapanshi sha bulonse shili makumi obilo, shakukobekesha alimwi atweela sheelete kupangwa kuswa kusilifa.

¹² Kulubasu lwa kumbo, kulyeelete kuba shisani mamita ali 22 mubulaamfu alimwi asheela shili likumi ashapanshi likumi.

¹³ Ono kulubasu lwa kwicwe uko kuli mulyango, akwalo kulyeelete kuba mamita ali 22 mubufwaafwi.

^14-15 Kulubasu lwa mulyango koonse kulyeelete kuba shisani shakushitilisha shili masentimita ali 660 mubulaamfu pantu pomwi asheela shotatwe alimwi ashapanshi shotatwe.

¹⁶ Ono pamulyango peene, palyeelete kuba cisani cakushitilisha ca nsalu iteshimite ibotu cili mamita ali 9 mubulaamfu apo patungitwe booya bwa mbelele buboneka anga ndiculu, bufubelafubela alimwi abusalalabo pyu, alimwi patungitwe ashimwi shintu shakubotesha. Shilyeelete kunoocatite kusheela shone shili mushapanshi shone.

¹⁷ Shoonse sheela shishingulukite lubansa ulo shilyeelete kunoocatene atweela twa silifa, alimwi ashakukobekesha sha ntuto shilyeelete kuba sha silifa ashapanshi sha bulonse.

¹⁸ Lubansa ulo lulyeelete kuba mamita ali 44 mubulaamfu, mamita ali 22 mubufwaafwi alimwi amasentimita ali 220 kuya mwiculu. Shisani shakushitilisha shilyeelete kutungwa kunsalu iteshimite ibotu ashapanshi sha bulonse.

¹⁹ Shoonse shintu shisebensa muTente ya Cipangano alimwi ampoopo sha kulushito shilyeelete kuba sha bulonse.

Kulama lilampi

²⁰ “Ono ulwiite bene Isilaeli ayi bakakuletele mafuta a olifi ayo abotu abuumbi a mulilampi, kwaamba ayi likanoonyaka macolesha lyoonsebo.

²¹ Aloni alimwi abana bakwe basankwa balyeelete kubika lilampi muTente ya Cipangano, pansengwe lwa cisani ico cili kunembo lya Libokoshi lya Cipangano. Nkokwaamba ayi lilampi ili lilyeelete kunyaka pameenso angu mpomunyaawo kuswa macolesha kushikila amacuunsa. Bene Isilaeli alimwi abamulunyungu lwabo balyeelete kunoolama mulawo uyu lyoonsebo.