Kulonga 24 - Baibo Busansulushi Bwa Libuku Ili

Cipangano mbocakapangwa

¹ Mpomunyaawo Mwaami Lesa wakaambila Mose ayi, “Mutante kuli ndime, webo, Aloni, Nadabu, Abiyu alimwi abamatanjilili ba bene Isilaeli bali makumi osanwe aobilo. Ono kamucili palaaleeko, mufukame akunambila.

² Bamwi mbooli abo tabeelete kushika pafwaafwi anebo, sombibo webo weenka. Bantubo tabeeleteewo akwisa pakalundu.”

³ Lyalo Mose wakaya mukulwiita bantu boonse milawo amilasho yoonse ya Mwaami Lesa. Bantu boonse bakakumbula pantu pomwi ayi, “Tulaakucita shoonse shaamba Mwaami Lesa.”

⁴ Mpeeke Mose wakalemba milawo yoonse ya Mwaami Lesa. Ndibwakaca macuunsa, wakayaka cipaililo panshi lya kalundu akubikawo mabwe ali likumi aobilo ayo akalinga kwiimikanina mishobo ya bene Isilaeli ili makumi obilo ayobilo.

⁵ Kuswawaawo Mose wakatuma basankwa bacikula bwangu ayi babengele Mwaami Lesa milambu yakutenta, alimwi akubenga bacende ayi babe milambu ya bwanabwankashi.

⁶ Mose wakabwesa musa wa bulowa bwa bacende akububika mumbale shifongomene, bumwi bwakacaalaawo, wakabusanseela pacipaililo.

⁷ Lyalo wakabwesa libuku lya cipangano umo mwakalinga kulembetwe milawo ya Mwaami Lesa, akwiibelengela bantu. Bantu bakaamba ayi, “Swebo tunanoonyumfwila Mwaami Lesa akucita shoonse nshaatulwiita.”

⁸ Lyalo Mose wakabwesa bulowa ubo bwakalinga mumbale shifongomene akubusanseela pabantu. Wakaamba ayi, “Ubu mbobulowa buyuminisha cipangano ico Mwaami Lesa ncaakapanga ndyaakamupa milawo iyi yoonse.”

⁹ Mpeeke Mose, Aloni, Nadabu, Abiyu alimwi abamatanjilili ba bene Isilaeli bali makumi osanwe aobilo bakatanta pakalundu,

¹⁰ apo mpobakabona Lesa wa bene Isilaeli. Panshi lya myeendo yakwe, pakalinga cakalinga kuboneka anga ndubansa lwa konkeli ulo lwakalinga kuboneka anga ndiculu.

¹¹ Lesa taakwe kucisawo bamatanjilili ba bene Isilaeli abo. Lesa bakamubona, lyalo bamatanjilili abo bakalya akunwita pantu pomwi.

Mose paKalundu ka Sinayi

¹² Mwaami Lesa wakaambila Mose ayi, “Kosa tanta pakalundu pano mpoombete. Ono koocili waano, ntookupa mabwe obilo apampamene, apo mpondakalemba milawo amilasho yoonse kwaamba ayi bantu bakeeye nshebeelete kucita.”

¹³ Mpomunyaawo Mose alimwi aJoshuwa shikumucafwa, bakalibambila. Lyalo bakatalika kutanta kalundu kakwe Lesa.

¹⁴ Mose wakaambila bamatanjilili abo ayi, “Kamushiite peenka pano munootulindila kushikila tukese. Aloni alimwi a Elu bacaala amwebo. Aboobo na kuli umwi ucite matongooshi inga waya kuli mbabo.”

¹⁵ Mose ndyaakatanta Kalundu ka Sinayi, kwakesa likumbi lyakafwekaawo pakalundu ako.

^16-17 Mpeeke bulemu bwa Mwaami Lesa bwakaboneka pakalundu. Bulemu ubo, kubene Isilaeli bwakalinga kuboneka anga ngumulilo utoonyaka peculu pakalundu. Kwanshiku shili shosanwe abomwi, likumbi lyakalinga kufwekete kalundu. Ono pabushiku bwasanu ashobilo, Mwaami Lesa wakeeta Mose mulikumbi momunya.

¹⁸ Lyalo Mose wakaya peene peculu lya kalundu akwinjila mulikumbi. Pakalundu apo, wakeekalawo nshiku shili makumi one, malumwi amashiku.