Kulonga 23 - Baibo Busansulushi Bwa Libuku Ili

Koombolosha kululeme alimwi akutanyengelela

¹ “Mutanooya caamba makani akubeca nabi kucafwa muntu ulubite kwiinda mukupa bukamboni bwakubeca.

² Mutanookonkela likoto lya bantu na batoobisha nabi na batoopa bukamboni bulengesha kusendeka koombolosha kululeme.

³ Alimwi mutanoosalulula pakoombolosha muntu mukandu.

⁴ “Na waboona ŋombe nabi mbongolo ya mulwani wako yasoweka, ibooshe kuli nguwe.

⁵ Alimwi na wacana mbongolo ya muntu ngoopatite yawa ceebo ca mukuli ngweeyumwite, mucafwe kwiibusha, kuteendililabo, sobwe.

⁶ “Mutanyengeleli mukandu pakumoombolosha munkuta.

⁷ Mutabekeshi muntu shikani, nabi kupingula ayi muntu utacite mulandu acaikwe, mukwiinga ndaakupa mulandu muntu woonse ucita cibiibi ca mushobo wooyu.

⁸ Mutatambuli mashinka kanwa, ceebo mashinka kanwa alalengesha ayi bantu abo bapofole akucileka kubona shiluleme, alimwi akunyonyoola maswi a bantu batacite mulandu.

⁹ “Mutabi alunkutwe kumuswamashi. Mwebo mulishi buswamashi mbobubete ceebo mwakalinga baswamashi mucishi ca Ijipiti.

Mwaaka wasanu ayobilo abushiku bwasanu ashobilo

¹⁰ “Kwamyaaka ili yosanwe awomwi, kamushanga mumyuunda yanu alimwi akutebula sheesho shiswaamo.

¹¹ Sombi mumwaaka wasanu ayobilo, tamweelete kulimaamo alimwi akutebula cintu nabi comwi ceshi cikamene mumo. Bakandu inga balya shili mumyuunda umo, abalo banyama bamuluundu inga balya nsheenga shacalaamo. Mulyeelete kucita mbomunya ubo mumyuunda yanu ya minyansa alimwi aya shisamu sha olifi.

¹² “Musebense milimo yanu yoonse kwanshiku shosanwe abomwi munsondo, sombi pabushiku bwasanu ashobilo tamweelete kusebensa, kwaamba ayi basha banu alimwi abaswamashi bamusebensela bookeshe kubikaawo ashifubwa shanu shoonse.

¹³ “Kamukonkela shintu shoonse nebo neMwaami Lesa nshendamulwiita. Mutapaili balesa bamwi, tamweelete kubanda nabibo meena abo.

Kusekelela kwiindaawo kotatwe

¹⁴ “Kamusekelela mankanda otatwe pamwaaka kwaamba ayi mulemeke ndime.

¹⁵ Mumweenshi wa Abibu, uyo ngomwakaswitamo muIjipiti, mulyeelete kusekelela kulya Cimaande akucita kweelana ambondakamwaambila. Munshiku shili shosanwe ashobilo shakusekelela uku, tamweelete kulya shinkwa nabi kwisa mukunambila maansabo.

¹⁶ “Mulyeelete kusekelela Kutebula na ndyemwatalikabo kutebula shakulya shanu. “Kamuba akusekelela kwa Shimpaka ciindi ca cilimo, ndyemutebula shisepo mumyuunda ya minyansa alimwi aya shisepo shimwi.

¹⁷ Myaaka yoonse, paciindi cakusekelela mankanda otatwe oonse, basankwa boonse balyeelete kwisa mukunambila neMwaami Lesa, Lesa wanu.

¹⁸ “Mutanoopa shinkwa pakupa mulambu wa munyama kuli ndime. Alimwi mafuta oonse a banyama ngoompekwa pakusekelela uku, teelete kucaalaako kushikila abushiku bukonkela.

¹⁹ “Lyoonse pamwaaka mulyeelete kuleta kuŋanda ya Mwaami Lesa, Lesa wanu shakulya shiinditeewo kupya kabotu nshemutaanguna kutebula. “Mutateleki kana ka mpongo mumukupa wa banyina.

Kushomesha amilasho

²⁰ “Amubone, ndaakutuma munjelo kunembo lyanu kwaamba ayi akamulaame mulweendo, alimwi akumushisha kumusena ngondakamubambila.

²¹ Mukanoomunyumfwila alimwi akukonkela nsheshi akanoomulwiita. Mutakamwaalukili, ceebo ndime ndamutuma alimwi na mukamwaalukile, teshi akamulekeleleewo.

²² Sombi na mukanoomunyumfwila akucita shoonse nsheshi nkanoomulwiita, nebo ndaakulwana abalwani banu boonse.

²³ Mpomunyaawo munjelo wangu ulaakutanjila kunembo lyanu akumushisha mucishi ca bene Amoli, bene Iti, bene Pelisi, bene Kenani, bene Ifi alimwi abene Jebusi. Boonse abo ndaakubanyonyoola.

²⁴ Mutakeeleshi kufukamina balesa babo nabi kubalambila, alimwi mutakakonkeli micito yakupaila kwabo. Sombi mukanyonyoole balesa babo alimwi akupwayoola mabwe ngobakeemika pamisena yakulambililaawo.

²⁵ Na munoonambila neMwaami Lesa, Lesa wanu, ndaakumupa coolwe ca shakulya aca maanshi alimwi ndaakukusha malwashi oonse pali ndimwe.

²⁶ Mucishi canu umo momutooya, teshi mukabe mwanakashi weshi akasoowe nabi kuba ŋumba. Mulaakunookala myaaka iinji.

²⁷ “Ndaakulengesha bantu beshi bakamulwaane kunoonda. Ndaakuleta shimfulunganya pabantu mbweshi mukanoolwanaabo alimwi akulengesha ayi balwani banu boonse bakanoomuloonda akucica.

²⁸ Lyalo ndaakulengesha balwani banu kupilingana kuboowa. Ndaakutanda bene Ifi, bene Kenani alimwi abene Iti kunembo lyanu.

²⁹ Teshi nkabatande mumwaaka womwi mukwiinga na ndacita boobo, mucishi inga mwabula bantu baanji, aboobo banyama ba muluundu inga bamufulila.

³⁰ Sombi ndaakunobatanda paniini paniini kushikila mukabe baanji akukumana cishi coonse ico.

³¹ Cishi canu cilaakutalikila kuLweenge Lusalala kushikila kuLweenge lwa Mediteleniyani, akuswa kuluyanga kushikila akuMulonga wa Yufuletisi. Ndaakumupa nkusu shakukoma beshi bakanooli mucishi ico, aboobo mulaakubatanda kunembo lyanu.

³² Mutakapangi cipangano ambabo nabi abalesa babo.

³³ Alimwi mutakasuminishi bantu abo kwikala mucishi canu. Na mukabasuminishe, balaakulengesha ayi mukambishishe. Kulambila balesa babo, kulaakuba koose keshi kakamuletele lufu.”