Kulonga 20 - Baibo Busansulushi Bwa Libuku Ili

Milawo ili likumi

¹ Lesa wakaambila Mose maswi aya akwaamba ayi,

² “Ndime Mwaami Lesa, Lesa wanu nendakamukusha mucishi ca Ijipiti umo momwakalinga basha.

³ “Utalambili Lesa aumwi, sombibo ndime.

⁴ “Utalipangili shibumbwabumbwa shikoshanya ashintu sha kwiculu, mucishi ca panshi, nabi shili mumaanshi panshi lya cishi.

⁵ Utafukamini cibumbwabumbwa cili coonse nabi kucilambila, mukwiinga nebo neMwaami Lesa, Lesa wanu, ndi shibusuba. Ndapa mulandu bantu abo bampatite, alimwi akubamulunyungu lwabo kushikila akulishalane lyatatu alyane.

⁶ Sombi ndabonesha lusuno lwangu kushuulu ashuulu sha baabo bansuni akukonkela milawo yangu.

⁷ “Utasebenseshi liina lyangu mushintu shitaluleme, mukwiinga nebo neMwaami Lesa, Lesa wanu ndaakupa mulandu muntu woonse weshi akabule kusebensesha kabotu liina lyangu.

⁸ “Ingashila bushiku bwakookesha bwa Cibelu alimwi akubusalasha.

⁹ Ulicite nshiku shosanwe abomwi nsheweelete kusebensa milimo yako,

¹⁰ sombi bushiku bwasanu ashobilo, mbushiku bwangu ubo mboweelete kookesha. Taaku muntu weelete kusebensa pabushiku ubo, nkokwaamba ayi webo, bana bako, basha bako, shifubwa shako nabi baswamashi bekala mucishi cako.

¹¹ Munshiku shosanwe abomwi, nebo neMwaami Lesa ndakalenga cishi ca panshi, liculu, lweenge alimwi ashintu shoonse shili muli nshisho. Sombi pabushiku bwasanu ashobilo ndakookesha. Nceceeco nebo neMwaami Lesa, ncendakapeta coolwe bushiku bwakookesha bwa Cibelu akubusalasha.

¹² “Lemeka baiso abanyoko kwaamba ayi ukekale nshiku shiinji mucishi ico nebo neMwaami Lesa nceshi nkakupe.

¹³ “Utacaayi muntu, sobwe.

¹⁴ “Utaciti bulale.

¹⁵ “Uteepi.

¹⁶ “Utapi bukamboni bwakubeca pali shikamukobonyoko.

¹⁷ “Utakumbwi ŋanda ya shikamukobonyoko camunyono. Utakumbwi mukamwiine, musha wakwe musankwa nabi mwanakashi, ŋombe shakwe, mbongolo shakwe nabi shintu shakwe shimwi.”

Boowa bwa bantu

¹⁸ Ono bantu ndibakanyumfwa cilulumo alimwi akulila kwa lupeenga, akubona kubeka kwa mfula alimwi abwiishi bwakalinga pakalundu, bakatutuma kuboowa. Mpeeke bakeemikanabo palaale.

¹⁹ Lyalo bakaambila Mose ayi, “Twaambilebo webo weenka, tutoonyumfwa. Tutooloonda ayi na Lesa aambe aswebo, tutoofwa.”

²⁰ Mose wakabakumbula ayi, “Mutaloondi, mukwiinga Lesa wesabo mukumweelesha akulengesha ayi mutolelele kumunyumfwila kwaamba ayi mutakabishi.”

²¹ Sombi bantu bakalingabo mpomunyaawo palaale, eenkabo Mose ngowakasena pafwaafwi alikumbi lishiya apo pakalinga Lesa.

Milawo ya shipaililo

²² Mpeeke Mwaami Lesa wakaambila Mose kulwiita bene Isilaeli ayi, “Mwaboona mbuli ndime neMwaami Lesa mbondaamba amwebo kuswa kwiculu.

²³ Tamweelete kulipangila balesa ba silifa nabi golodi twakunoolambila pantu pomwi anebo.

²⁴ Mumpangile cipaililo ca bulongo apo mpweshi mubengele milambu ya mbelele, mpongo alimwi aŋombe isho sheshi shitentwe shoonse, alimwi ayi shibe milambu ya bwanabwankashi. Pamusena woonse mpweenga ndasala ayi munoonambilila, ndaakwisa kuli ndimwe mukumupa coolwe.

²⁵ Na mukampangile cipaililo ca mabwe, mutakapangishi mabwe akubesa mukwiinga na mwasebensesha ceela cakubesesha mabwe, nkokwaamba ayi mwaamana ncito kuli ndime.

²⁶ Mutakampangili cipaililo cicite pakutantila. Na mukacite boobo, mulaakubonesha matakosha anu nobeene pakunooyacitanta pali ncico.”