Kulonga 2 - Baibo Busansulushi Bwa Libuku Ili

Kushalwa kwakwe Mose

¹ Ono umwi musankwa mwine Lefi wakeeba mwanakashi wa mumushobo wakwe

² uyo wakamushalila mwaana musankwa. Ono mwanakashi uyo ndyaakabona ayi mwaana ngumubotu abuumbi, wakamushisa kwamyeenshi yotatwe.

³ Sombi ndyaakabona ayi inga taatoleleli kumushisa, wakabwesa mutaanga wa matete akunanikamo manenekela kwaamba ayi maanshi atanoonjila. Lyalo wakabikamo mwaana akumushisa mumatete muloombe lwa mulonga.

⁴ Nankashi wa mwaana uyo wakeemikana kulaale ayi abone ceshi cicitike kuli nguwe.

⁵ Mpeeke mwanakashi mwanaakwe Falawo wakaya kumulonga mukusamba. Abalo balandakashi bakwe bakalinga kweendeenda muloombe. Lyalo wakabona mutaanga mumatete akutuma mulandakashi wakwe ayi aubweese.

⁶ Mwanaakwe Falawo ndyaakafwekula mutaanga, wakabona mwaana musankwa kaalila. Wakamunyumfwila nkumbu akwaamba ayi, “Uyu ngomwi wa baana ba bene Ebulu.”

⁷ Mpomunyaawo nankashi wa mwaana uyo wakeepusha mwanaakwe Falawo ayi, “Sa nje nkamuletele mwanakashi umwi mwine Ebulu ayi ese anoomulelelako mwaana uyu?”

⁸ Lyalo alakwe wakakumbula ayi, “Ee, Koya.” Mpomunyaawo nankashi wa mwaana uyo wakaya mukuleta banyina mwaana.

⁹ Mpeeke mwanaakwe Falawo uyo wakaambila mwanakashi uyo ayi, “Tola mwaana uyu unoondelelaako, ndaakukulipila.” Aboobo banyina mwaana bakamutola akumulela.

¹⁰ Ono mwaana ndyaakakula banyina abo bakamutola kumwanaakwe Falawo ulya, lyalo wakaba mwanaakwe. Wakalyaamboosha ayi, “Ceebo ndakamusubula mumaanshi, ntoomutumba ayi Mose.”

Mose mbwaakalobokela kuMidyani

¹¹ Ono Mose ndyaakakula, wakaya mukufwakashisha bene Ebulunyina, akubona mbuli mbobakalinga kukakatishikwa kusebensa ncito iyumu. Wakabona amwine Ijipiti umwi kaauma mwine Ebulu womwi pakati ka bene mishaabo.

¹² Mose ndyaakacebooka akubona ayi tepakalinga umwi muntu utobonaako, wakacaya mwine Ijipiti uyo akumufukila mumuseese.

¹³ Bushiku bwakaboolaawo, wakaboolaako akucana basankwa bene Ebulu bobilo kabalwana. Mpeeke wakeepusha wooyo wakalinga kulubite ayi, “Utokuuminanshi mwine Ebulunyoko?”

¹⁴ Musankwa uyo wakakumbula ayi, “Ngani wakakusala ayi ube mweendeleshi alimwi amoomboloshi wesu? Sa ulisuni kuncaya anebo bweenka mbowakacaya mwine Ijipiti?” Lyalo Mose wakaloonda akulyaamboosha ayi, “Nkokwaamba ayi bantu bakeshiba ncendakacita.”

¹⁵ Ono mwaami Falawo ndyaakanyumfwa cikani ici, wakalinga kusuni ayi acaye Mose, sombi Mose wakalobokela kucishi ca Midyani, uko nkwaakaya mukwikala pafwaafwi amukalo.

¹⁶ Lyalo banakashi bosanwe abobilo bana bakwe Jetulo mupailishi wa kuMidyani, bakaya kumukalo uyo mukuteka maanshi ayi besushe mankubala kwaamba ayi mbelele alimwi ampongo sha baishiwabo shinwe.

¹⁷ Ono kwakesa beembeshi bamwi akutandako banakashi abo. Lakwe Mose wakanyamuka, wabafunaako akupa maanshi mbelele ampongo shabo shoonse.

¹⁸ Ndibakaboola kuli ishiwabo, wakabeepusha ayi, “Ino mwafwambaana buyani kuboola sunu?”

¹⁹ Balo bakakumbula ayi “Mwine Ijipiti watufunaako mumaansa a beembeshi, alimwi ngowatutekelaako amaanshi akupa shifubwa shesu ayi shinwe.”

²⁰ Ishiwabo wakeepusha bana bakwe banakashi ayi, “Ino musankwa uyo uli kuli? Ino mwamushiilanshi? Kamuya mukamwiite, ese tulyaakwe.”

²¹ Mpeeke Mose wakasumina kwikalaabo. Lyalo Jetulo wakamupa Sipola mwanaakwe ayi eebe.

²² Wakamushalila mwaana musankwa. Mpomunyaawo Mose wakayeeya mwiine ayi, “Nebo ndi muswamashi mucishi cino, aboobo mwanaangu uyu ntoomutumba ayi Geshomu.”

²³ Ndipakeenda myaaka, mwaami wa mucishi ca Ijipiti wakafwa, sombi bene Isilaeli bakalinga kucipengabo ceebo ca busha akunoolilila shikubafunaako. Kulila kwabo kwakashika kuli Lesa,

²⁴ alakwe wakabanyumfwa akwiibaluka cipangano cakwe kuli Abulaamu, Isaki alimwi aJakobo.

²⁵ Lyalo Lesa wakabona mbuli mbobakalinga kufubitwe bene Isilaeli, mpeeke wakabanyumfwila nkumbu.