Kulonga 19 - Baibo Busansulushi Bwa Libuku Ili

Bene Isilaeli paKalundu ka Sinayi

¹ Pabushiku butaanshi mumweenshi watatu kuswa paciindi ico bene Isilaeli ndibakaswa mucishi ca Ijipiti, bakashika muluyanga lwa Sinayi.

² Ndibakaswa kuLefidimu, bene Isilaeli bakashika muluyanga lwa Sinayi umo mobakayaka misumba pafwaafwi aKalundu ka Sinayi.

³ Mpeeke Mose wakatanta pakalundu ayi akakumane aLesa. Pakalundu peenka apo Mwaami Lesa wakeeta Mose akumwaambila ayi akalwiite bene Isilaeli abo bamulunyungu lwakwe Jakobo ayi,

⁴ “Mwakabona nshendakacita nebo neMwaami Lesa kubene Ijipiti, alimwi ambuli mbondakamunyamuna bweenka mbuli mumbankwashi mbwaanyamuna bana bakwe pamapapaminwa akwe akumuleta kokuno kuli ndime.

⁵ Ono na munyumfwile akulama cipangano cangu, mulaakuba bantu bangu. Cishi ca panshi coonse ici ncaangu, sombi mwebo mulaakuba bantu bangu basalitwe.

⁶ Mulaakuba bantu balibengetebo muli ndime neenka, alimwi mulaakusebenselabo ndime milimo ya bupailishi.”

⁷ Mpeeke Mose wakaseluka akwiita bamatanjilili ba bene Isilaeli alimwi akubalwiita makani oonse akaamba Mwaami Lesa.

⁸ Mpomunyaawo bantu boonse bakakumbula pantu pomwi ayi, “Tulaakucita shoonse shaamba Mwaami Lesa.” Lyalo Mose wakaya walwiita Mwaami Lesa makani aya.

⁹ Mpeeke Mwaami Lesa wakaambila Mose alimwi ayi, “Ndaakwisa kuli ndiwe mulikumbi litikeme kwaamba ayi bantu bakanyumfwe ndyeshi nkanokwaamba awebo akulengesha ayi bantu bakatalike kukushoma kuswa apo peenka.” Lyalo Mose wakalwiita Mwaami Lesa maswi akaamba bantu,

¹⁰ alakwe Mwaami Lesa wakamwaambila ayi, “Koya ukalwiite bantu ayi kutalika sunu alimwi aciilo, balyeelete kulisalasha ayi balibambile kulambila Lesa. Balyeelete kucapa shakufwala shabo

¹¹ akulibambila isona. Ceebo ubo bushiku ndaakwisa pakalundu ka Sinayi kwaamba ayi bantu boonse bakamboone.

¹² Ukatale mweshi bakeele bantu, kushingulusha kalundu koonse ayi batakasotoki, akubalwiita ayi taaku weelete kutanta pakalundu nabi kusena pafwaafwi. Uyo woonse weshi akalyate kukalundu, ulyeelete kucaikwa.

¹³ Muntu uyo ulyeelete kucaikwa kumabwe nabi kumuyasa mifwi, taaku nabi womwi weelete kumucata. Ici cilyeelete kubantu alimwi abanyama boonse, boonse balyeelete kucaikwa. Sombi na lupeenga lukaliile, bantu boonse bakatante pakalundu.”

¹⁴ Lyalo Mose wakaseluka pakalundu akulwiita bantu ayi balibambile kulambila Lesa. Paceebo ceeci bakacapa shakufwala shabo,

¹⁵ alimwi Mose wakabaambila ayi, “Isona mukanoolibambite alimwi bulya paciindi ici tamweelete kukumana abamakaanu.”

¹⁶ Ingayi macuunsa pabushiku bwatatu, kwakaba cilulumo alimwi akubeka, Mpeeke pakalundu pakesa likumbi litikeme alimwi kwakanyumfwika alupeenga lwakalila cankusu. Boonse bantu mumisumba bakatutuma abuumbi.

¹⁷ Mose wakatanjilila bantu kuswa mumisumba yabo ayi bakakumane aLesa, lyalo bakeemikana mweela kalundu.

¹⁸ Kalundu ka Sinayi koonse kakalinga kuswitebo bwiishi mukwiinga Mwaami Lesa wakaselukila pali nkako mumulilo. Bwiishi bwakalinga kuya mwiculu anga mbwiishi bwa mumunyumbi alimwi kalundu koonse kakatenkaana abuumbi.

¹⁹ Alwalo lupeenga lwakalinga kuya ciindaawo kulila. Kuswawaawo Mose wakaamba, alakwe Lesa wakamukumbula mucilulumo.

²⁰ Mpomunyaawo Mwaami Lesa wakaselukila paKalundu ka Sinayi akwiita Mose ayi atante. Lyalo Mose wakatanta pakalundu.

²¹ Pesule Mwaami Lesa wakamwaambila ayi, “Seluka ukacenjeshe bantu ayi batasotoki moomo mowakatala ayi bese mukumbona. Ceebo na bacite boobo, baanji batoomana kufwa.

²² Nabi bapailishi boonse abo beenga basena pafwaafwi anebo balyeelete kulisalasha ceebo inga ndabapa mulandu.”

²³ Mose wakaambila Mwaami Lesa ayi, “Bantu inga tabatanti waano mukwiinga mwakatulwiita ayi tulyeelete kubona kalundu aka ayi kalisalalite, alimwi akutala motweelete kweela, kushingulusha kalundu koonse.”

²⁴ Mpeeke Mwaami Lesa wakakumbula ayi, “Seluka uye ukalete Aloni. Sombi bapailishi alimwi abantu bamwi boonse tabeelete kusotoka mwakweela kwaamba ayi bese mukumbona, mukwiinga inga ndabapa mulandu.”

²⁵ Lyalo Mose wakaseluka akulwiita bantu makani oonse akaamba Mwaami Lesa.