Kulonga 18 - Baibo Busansulushi Bwa Libuku Ili

Jetulo mbwaakafwakashisha Mose

¹ Ono mupongoshi wakwe Mose musankwa wiitwa ayi Jetulo, mupailishi wa mucishi ca Midyani, wakanyumfwa shoonse Mwaami Lesa nshaakacitila Mose alimwi abene Isilaeli ndyaakabatanjilila kubakusha mucishi ca Ijipiti.

² Paceebo ceeci wakesa kuli Mose, kaali aSipola mukaakwe Mose uyo wakalinga wacaala kwisule,

³ pantu pomwi aGeshomu alimwi aEliyasa, bana bakwe basankwa bobilo. Mose wakaambaawo kale ayi, “Ndaba muswamashi mucishi ceensu.” Aboobo wakatumba mwanaakwe musankwa umwi ayi Geshomu.

⁴ Wakaambaawo kale alimwi ayi, “Lesa uyo wakalinga kulambila bata wakancafwa alimwi akumpulusha mumaansa amwaami wa mucishi ca Ijipiti uyo wakalinga kusuni kuncaya.” Aboobo wakatumba mwanaakwe musankwa umwi ayi Eliyasa.

⁵ Anu Jetulo, pantu pomwi amukaakwe Mose alimwi abana bakwe basankwa bobilo, bakesa muluyanga, kukalundu kasalalite uko Mose nkwaakalinga wayaka misumba.

⁶ Ceebo Jetulo wakalinga watuma kale maswi ayi, “Nebo nemupongoshi wako ndi munshila pantu pomwi amukaako alimwi abana bako.”

⁷ Mose wakamucinsha. Ndibakakumana, Mose wakafukama akumufyonta. Kuswawaawo bakeepushanya mbuli mbobakalinga kubuka, akwinjila mumusumba wakwe Mose.

⁸ Mpeeke Mose wakalwiita Jetulo shoonse Mwaami Lesa nshaakacitila mwaami Falawo alimwi abene Ijipiti, kwaamba ayi afune bene Isilaeli. Wakamulwiita amapensho oonse ngobakabaawo mulweendo alimwi ambuli Mwaami Lesa mbwaakabapulusha.

⁹ Jetulo ndyaakanyumfwa makani oonse aya, wakasangalala

¹⁰ akwaamba ayi, “Aalumbaishikwe Mwaami Lesa uyo wakamupulusha mumaansa a mwaami Falawo alimwi abene Ijipiti! Aalumbaishikwe Mwaami Lesa uyo wakapulusha bantu bakwe mubusha!

¹¹ Ono ndeshiiba ayi Mwaami Lesa ulicite nkusu kwiinda pabalesa boonse, mukwiinga wakacita boobo ciindi bene Ijipiti ndibakalinga kubona bene Isilaeli ayi taaku mbobabete.”

¹² Lyalo Jetulo wakaleta mulambu wakutenta amilambubo imwi akubenga kuli Lesa. Mpomunyaawo Aloni alimwi abamatanjilili boonse bene Isilaeli bakayaakwe mukulya nyama iyo yakapekwa kuli Lesa ayi bamulambile.

Kusalwa kwa boomboloshi

¹³ Pabushiku bwakaboolaawo, Mose wakalinga koombolosha bantu abo bakalinga kucite milandu. Aboobo wakasebensa kuswa macuunsa kushikila amacolesha.

¹⁴ Ono Jetulo ndyaakabona milimo yoonse iyo yakalinga kucita Mose, wakamwiipusha ayi, “Ino nciinshi ici ncootoocitila bantu? Ceebonshi utoocita milimo iyi weenkabo abantu kabakushingulukite pano kuswa macuunsa kushikila amacolesha?”

¹⁵ Mose wakamukumbula ayi, “Ndyeelete kucita bobulya mukwiinga bantu balesa kuli ndime ayi beshibe kuyanda kwakwe Lesa.

¹⁶ Na bantu bobilo batoopikishanya, balesa kuli ndime. Mpeeke anebo ndyeembona ululeme awabisha. Kuswawaawo ndabalwiita milasho alimwi amilawo yakwe Lesa.”

¹⁷ Lyalo Jetulo wakaamba ayi, “Ici ncootoocita taciluleme, sobwe.

¹⁸ Utoolilemyabo omwiine alimwi akulemyabo baabo bantu. Iyi ncito njinene abuumbi alimwi tooelete kwiisebensa weenka.

¹⁹ Ono nyumfwa nkulwiiteko mboweelete kucita, kwaamba ayi Lesa akucafweeko. Ncibotu ayi webo ubebo shikwiimikaninako bantu kuli Lesa alimwi akuleta matongooshi abo kuli nguwe.

²⁰ Ulyeelete kubeeisha milasho amilawo yakwe Lesa akubasansulwita mbuli mbobeelete kwikala alimwi anshebeelete kucita.

²¹ Sombi kwiilikaawo, ulyeelete kusala basankwa bamwi beenga basebensa mulimo wa butanjilili. Bamwi balyeelete kuba batanjilili ba bantu bali cuulu, bamwi mwaanda, bamwi makumi osanwe alimwi abamwi likumi. Bantu abo mbweshi ukasaale balyeelete kuba bantu balemeka Lesa, bashomeka alimwi batakoonshi kutambula mashinka kanwa.

²² Alimwi balyeelete kuba boomboloshi ba bantu lyoonsebo. Lyalo inga kabaleta milandu iyumu kuli ndiwe, sombi balyeelete kunokoombolosha yeeyo yoonse iniini beene. Ici cilaakukuubilaako ceebo milimo njewalinga kucita weenka, balaakuyaabana.

²³ Na ukacite boobo kweelana abutokwaamba Mwaami Lesa, teshi ukalilemyeewo alimwi bantu boonse aba balaakunooya mumaandaabo, amilandu yabo keemanite.”

²⁴ Mose wakanyumfwila maswi akamulwiita Jetulo.

²⁵ Wakasala basankwa beenga basebensa kuswa pabene Isilaeli boonse. Wakabasala ayi babe batanjilili ba bantu, bamwi ba bali cuulu, bamwi mwaanda, bamwi makumi osanwe alimwi abamwi ba bali likumi.

²⁶ Balo bakalingabo boomboloshi ba bantu lyoonse, kunootola milandu iyumu kuli Mose sombi kaboombolosha milandu iniini beene.

²⁷ Mpeeke Mose wakalashanya aJetulo uyo wakaboola kumishaabo.