Kulonga 17 - Baibo Busansulushi Bwa Libuku Ili

Maanshi akaswa mumwaandami

¹ Mpomunyaawo bene Isilaeli boonse bakaswa muluyanga lwiitwa ayi Sini, kabaya bweenda kuswa kumusena umwi akuya kumwi, kweelana ambwaakalinga kubalwiita Mwaami Lesa. Ndibakashika kuLefidimu, bakayaka misumba sombi tekwakalinga maanshi akunwa.

² Paceebo ceeci bene Isilaeli bakatongookela Mose akwaamba ayi, “Tupe maanshi akunwa.” Mose wakabakumbula ayi, “Ino mutootongookelanshi? Mutokweelesheshanshi Mwaami Lesa?”

³ Sombi bantu bakanyumfwa nyotwa abuumbi, akutolelela kutongookela Mose. Bakamwaambila ayi, “Sa wakatukusha mucishi ca Ijipiti, akutuleta kokuno ayi utucaaye, bana besu alimwi ashifubwa shesu kunyotwa?”

⁴ Mpeeke Mose wakapaila cakulilila Mwaami Lesa ayi, “Ino bantu aba ntoobacita buyani, mukwiinga balilibambite kunguma mabwe?”

⁵ Mpomunyaawo Mwaami Lesa wakaambila Mose ayi, “Itawo bamatanjilili ba bene Isilaeli bamwi akutanjila kunembo lya bene Isilaeli boonse. Unyamune ankooli iyo njewakoomishako paMulonga wa Nailo, unooya.

⁶ Nebo ntokwiimikana kunembo lyako kumwaandami wa kuKalundu ka Sinayi. Uume nkoli yako mumwaandami uyo, lyalo maanshi atooswa muli nguwo kwaamba ayi bantu banwe.” Aboobo Mose wakacita mbomunya ubo pameenso a bamatanjilili ba bene Isilaeli.

⁷ Mpeeke musena uyu bakootumba ayi Masa alimwi ayi Meliba, mukwiinga bene Isilaeli bakatongooka alimwi akweelesha Mwaami Lesa ndibakaamba ayi, “Sa Mwaami Lesa ncakwiila uli aswebo nabi tau?”

Nkoondo abene Amaleki

⁸ Kuswawaawo, bene Amaleki bakesa akutalika kulwana abene Isilaeli kuLefidimu.

⁹ Lyalo Mose wakaambila Joshuwa ayi, “Sala basankwa bamwi kwaamba ayi bakaye mukulwana abene Amaleki ciilo. Nebo ndaakwiimikana peculu pakalundu, kaancite ankooli iyo Lesa njaakandwiita ayi nyamune.”

¹⁰ Aboobo Joshuwa wakacita kweelana abwakamulwiita Mose, akuya mukulwana abene Amaleki. Sombi Mose, Aloni alimwi aElu bakatanta peculu pakalundu.

¹¹ Paciindi ico Mose ncaakalinga kutambikite maansa mwiculu, bene Isilaeli bakalinga kukoma. Sombi na waaloshesha panshi, bene Amaleki bakalinga kutalika kukoma.

¹² Ono maansaakwe Mose ndyaakacisa kutambika mwiculu, Aloni alimwi aElu bakamuletela libwe ayi akaleewo. Mpeeke balo bakeemikana umwi kululyo aumwi kucipiko, akucatilila maansaakwe kwaamba ayi anoolibo mwiculu kushikila kwipila kwa lisuba.

¹³ Munshila iyo Joshuwa wakakoma bene Amaleki cakumaninina.

¹⁴ Lyalo Mwaami Lesa wakaambila Mose ayi, “Ulembe mbuli mbondakoma munkondo iyi kwaamba ayi bantu bakanokwiibalukilaako. Alimwi ulwiite Joshuwa ayi ntoolengesha bantu kubula kwiibalukawo tubili bene Amaleki.”

¹⁵ Mpomunyaawo Mose wakayaka cipaililo akucitumba ayi, “Mwaami Lesa njembembela yangu yakukoma.”

¹⁶ Alimwi wakaamba ayi, “Amunyamune mbembela ya Mwaami Lesa mwiculu! Mwaami Lesa ulaakutolelela kulwana abene Amaleki inshiku shoonse!”