Kulonga 15 - Baibo Busansulushi Bwa Libuku Ili

Lwiimbo lwakwe Mose

¹ Lyalo Mose alimwi abene Isilaeli boonse bakeembila Mwaami Lesa lwiimbo ulu, “Ntokwiimbila Mwaami Lesa mukwiinga wakoma cabulemu. Wawaala maaki alimwi abalinga kutantiteewo mulweenge.

² Mwaami Lesa ngoompa nkusu alimwi ndamwiimbila, mukwiinga ngomupulushi wangu. NgoLesa wangu, alimwi ntoomulumbaisha ngoLesa wa bata alimwi ntokwiimba pankusu shakwe.

³ Mwaami Lesa ngushilumamba. Mwaami Lesa, ndyeliina lyakwe.

⁴ “Wakawaala bashilumamba bene Ijipiti alimwi ashikoci shabo shankondo mulweenge. Beshikutanjilila bashilumamba basalitwe, boonse bakepishikwa muLweenge Lusalala.

⁵ Maanshi alaamfu akabafwekelesha. Bakepila kushikila panshi palweenge anga ndibwe.

⁶ “NoBaami baLesa, lyaansa lyanu lyalulyo lilicite nkusu shiloondesha. NoBaami baLesa, lyaansa lyanu lyalulyo lilasansoola balwani.

⁷ Mubulemu bwa bwaami bwanu, mulawisha balwani banu panshi. Ee bukali bwanu bulanyaka akubatenta anga mbwiisu buyumu.

⁸ Mwakayoyela palweenge, mpeeke maanshi akalilundikabo mweela. Maanshi akeemikanabo anga ndubumbu lwa ŋanda, apaapo poonse pakalinga palaamfu pakaboolabo nta.

⁹ “Mpeeke mulwani wakaamba ayi, ‘Ntoobakonkela kushikila mbacaane. Ntoobaanya buboni bwabo, ntoobwesa shoonse nsheensuni. Ntookusha mupeeni wangu, ntoobanyonyoola alyaansa lyangu.’

¹⁰ Sombi ndimwakayoyabo linkanda lyomwi, maanshi akafwekelesha bene Ijipiti boonse. Ncakwiila bakepilabo anga nceela panshi lya maanshi ayo aloondesha.

¹¹ “NoBaami baLesa, ngani uli anga ndimwe pabalesa boonse? Ino ngani uli anga ndimwe nomusalalite abuumbi? Ino ngani uli anga ndimwe nomucite bulemu bukankamika? Ino ngani uli anga ndimwe nomucita shitondesho sha nkusu shakwiculu?

¹² Mwebo mwakatandabikabo lyaansa lyanu lyalulyo, mpeeke cishi ca panshi cakamina balwani besu boonse.

¹³ Nomushomeka pacipangano canu, mwakatanjilila bantu mbomwakafuna. Kwiinda munkusu shanu mwakabatanjilila kuya kucishi canu cisalalite.

¹⁴ Mishobo yoonse yakanyumfwa nshemwakacita, aboobo itootutuma abuumbi. Bene Filisiti boowa bwabacata cankusu.

¹⁵ Bacinenenene ba bene Edomu baliloondete. Bamatanjilili ba bene Moabu batootutumabo. Abalo bantu bene Kenani bapulwa mumala.

¹⁶ Boowa alimwi akulibilika shili pali mbabo. Ceebo ca nkusu shanu, noBaami baLesa, balacelemanabo akuloonda abuumbi, kushikila bantu banu beenda akuya bantu abo mbomwakaangulula mubusha.

¹⁷ Mulaakubaleta akubekalika pakalundu kanu, musena, noBaami baLesa, uyo ngomwakasala ayi ube ŋanda yanu. Ŋanda yakumulambililaamo, noBaami baLesa, njemwakayaka nobeene.

¹⁸ Mwebo noBaami baLesa, mulaakunoolibo baami lyoonse alyoonse.”

Lwiimbo lwakwe Milyamu

¹⁹ Anu bene Isilaeli bakasubuka lweenge pabulongo buyumu nta. Sombi shikoci shankondo sha bene Ijipiti, maaki alimwi abeshikweensha babo ndibakashika mulweenge, Mwaami Lesa wakakumanya maanshi alimwi. Mpeeke akabafwekelesha.

²⁰ Mpomunyaawo Milyamu mulaluki mwanakashi, nankashi yakwe Aloni wakabwesa musebe, mpeeke banakashi boonse bakatalika kulisha akushana.

²¹ Milyamu wakatalika kubeembila ayi, “Amwiimbile Mwaami Lesa mukwiinga wakoma cabulemu. Wawaala maaki alimwi abalinga kutantiteewo mulweenge.”

Maanshi alula

²² Kuswawaawo Mose wakatanjilila bene Isilaeli kuswa kuLweenge Lusalala kuya muluyanga lwiitwa ayi Sheli. Bakeenda nshiku shotatwe muluyanga, sombi tabakwe kucanawo maanshi.

²³ Lyalo bakashika pamusena wiitwa ayi Mala, sombi maanshi ngobakacana akalinga kulula cakwaamba ayi bakaalilwa kwaanwa. Nceceeco ncebakeetilaawo ayi Mala.

²⁴ Bantu bakatalika kutongooka kuli Mose akumwiipusha ayi, “Ino tutoonwanshi?”

²⁵ Lakwe Mose wakapaila abuumbi kuMwaami Lesa, mpeeke Mwaami Lesa wakamubonesha kasamu, lyalo Mose wakakawaala mumaanshi mpomunyaawo maanshi akaba kabotu. Apo Mwaami Lesa wakabapa mulawo amulasho alimwi apo peenka wakabeelesha.

²⁶ Wakabaambila ayi, “Na munoonyumfwila amoyo woonse kwiinda mukucita nsheensuni alimwi akukonkela milawo amilasho yangu yoonse, teshi nkamuletelewo malwashi mbuli aayo ngondakaletela bene Ijipiti. Nebo ndime Mwaami Lesa uyo umushilika.”

²⁷ Kuswawaawo bakashika kuElimu, uko kwakalinga tuntupu tuli likumi atobilo alimwi atupukupuku tuli makumi osanwe alimwi aobilo. Mpeeke bakayaka misumba pafwaafwi amaanshi.