Kulonga 12 - Baibo Busansulushi Bwa Libuku Ili

Bushiku bwa Pasika bwakwiibaluka kusotokela

¹ Mwaami Lesa wakaambila Mose aAloni mucishi ca Ijipiti ayi,

² “Uno mweenshi ulyeelete kuba ngomweenshi wakutaanguna mumwaaka kuli ndimwe.

³ Bene Isilaeli boonse mulyeelete kubalwiita ayi pabushiku bwalikumi mumweenshi uno, musankwa woonse paŋanda yakwe ulyeelete kusala mwanaambelele wakulya abamuŋanda yakwe.

⁴ Na paŋanda yakwe mbaniini cakwaamba ayi inga baalilwa kulya mwanaambelele woonse wakabumbulu, bamuŋanda yakwe alimwi abamuŋanda ya shikamukobonyina balyeelete kwabaana mwanaambelele womwi. Sombi balyeelete kubona kufula kwa bantu alimwi anyama njeenga muntu womwi walya.

⁵ Mulakonsha kusala mwanaambelele nabi mwanaampongo, sombi ulyeelete kuba mucende wa mwaaka womwi alimwi utacite kampenda.

⁶ Ono pabushiku bwalikumi ashone mumweenshi ngomunya uno macolesha, bene Isilaeli boonse balyeelete kucaya banyama abo.

⁷ Balyeelete kubwesa bulowa bumwi akunanika kushisamu shobilo sha kumilyango alimwi apeculu lya milyango ya mumaanda umo mweshi bakanoolita nyama.

⁸ Mashiku pabushiku mbomunya ubo, nyama ilyeelete kuyokwa, akwiilya pantu pomwi abucisa bulula alimwi acimaande.

⁹ Kuteelesha kulya nyama ibishi nabi yakuteleka, sombi yoonse mulyeelete kwiilya yakutenta, pantu pomwi amutwi, myeendo alimwi ashamukati shoonse.

¹⁰ Tamweelete kushiyaako nakaceyi. Ono na kushika macuunsa imwi yacaalaawo, ilyeelete kutentwa.

¹¹ Ono mbulya mbomweelete kwiilya. Mulyeelete kufwalila limwi mbuli shilweendo, nkwabilo kumyeendo alimwi ankooli mumaansaanu. Amukeelye mulubilo, mukwiinga nkusekelela kwa Pasika kwakwiibaluka kusotokela mukulemeka ndime neMwaami Lesa.

¹² “Pabushiku ubo mbomunya mashiku, ndaakwiinda mucishi coonse ca Ijipiti kuya cicaya baana basankwa boonse bakwiiya ba bantu alimwi aba shifubwa. Ndaakupa mulandu balesa boonse ba bene Ijipiti. Nebo ndime Mwaami Lesa.

¹³ Bulowa ubo mbweshi bukananikwe kushisamu sha kumilyango ya maandaanu, bulaakuba ncecitondesho ayi ngamaandaanu. Na ndaboona bulowa ubo, ndaakumusotokela, nkokwaamba ayi mwebo teshi nkamuletelewo mwaalu unyonyoola pakunoopa mulandu bene Ijipiti.

¹⁴ Mulyeelete kunoosekelela bushiku ubu kwaamba ayi mwiibaluke ncendacita nebo neMwaami Lesa. Mukanoosekelela amyaaka yoonse ili kunembo.”

Kusekelela kwa kulya Cimaande

¹⁵ Mwaami Lesa wakaamba ayi, “Munshiku shili shosanwe ashobilo, tamweelete kulya shinkwa, sombibo cimaande. Pabushiku butaanshi munshiku ishi, mulyeelete kukusha cimena coonse mumaandaanu mukwiinga uyo woonse weshi akalye shinkwa munshiku shosanwe ashobilo ishi, ulaakukushikwa mubantu bangu bene Isilaeli.

¹⁶ Pabushiku butaanshi alimwi apabushiku bwasanu ashobilo, mulyeelete kubungana ayi munambile. Taaku weelete kusebensa panshiku ishi, sombi calo cakulya inga mwabamba.

¹⁷ Mulyeelete kusekelela pabushiku ubu mukwiinga mbobushiku ndindakakusha mikowa yanu mucishi ca Ijipiti. Paceebo ceeci mulyeelete kunoosekelela pabushiku ubu myaaka yoonse ili kunembo.

¹⁸ Kuswa pabushiku bwalikumi ashone macolesha mumweenshi wakutaanguna kushikila apabushiku bwamakumi obilo alimwi abomwi macolesha, tamweelete kulya shinkwa.

¹⁹ Panshiku shili shosanwe ashobilo, tamweelete kucanika cimena mumaandaanu. Uyo woonse weenga walya cicite cimena, nkokwaamba ayi ulaakukushikwa mubantu bangu bene Isilaeli, muswamashi nabi mwine Isilaeli.

²⁰ Tamweelete kulya shinkwa. Kuli koonse nkweenga mwekala, mulyeelete kulyabo cimaande.”

Kusekelela kutaanshi kwa bushiku bwa Pasika bwakwiibaluka kusotokela

²¹ Mpomunyaawo Mose wakeeta bamatanjilili boonse bene Isilaeli akubaambila ayi, “Noonse womwi awomwi mulyeelete kusala mwanaambelele akumucaya, kwaamba ayi bamumaandaanu basekelele bushiku bwa Pasika bwa kwiibaluka kusotokela.

²² Mukabwese fuute akusumpa mumbale ifongomene mweshi mukanooli bulowa bwa mwanaambelele, mukananike pashisamu sha kumilyango alimwi asha peculu lya milyango ya maandaanu. Taaku muntu nabi womwi pakati kanu weelete kuswa muŋanda kushikila macuunsa.

²³ Ono Mwaami Lesa pakuya cicaya bene Ijipiti mucishi cabo, ulaakubona bulowa ubo peculu lya milyango alimwi apashisamu sha kumilyango. Mpeeke ulaakukasha shikunyonyoola kwinjila mumaandaanu ayi amucaaye.

²⁴ Mwebo abamulunyungu lwanu mulyeelete kukonkela milawo iyi lyoonsebo.

²⁵ Na mukashike mucishi ico Mwaami Lesa ncaakamushomesha kumupa, mulyeelete kunoosekelela kweelana ambondamulwiita.

²⁶ Ono na bana banu bamwiipusha ayi, ‘Ino kusekelela uku nkwanshi?’

²⁷ Mwebo mukabakumbule ayi, ‘Njimilambu ya pabushiku bwa Pasika bwakwiibaluka kusotokela mukulemeka Mwaami Lesa, ceebo mbobushiku mbwaakasotokela maandeesu mucishi ca Ijipiti. Wakacaya bene Ijipiti, sombi swebo sobwe.’ ” Mpeeke bene Isilaeli bakafukama, balambila.

²⁸ Kuswawaawo bakaya bacita kweelana aMwaami Lesa mbwaakaambila Mose aAloni.

Lufu lwa baana bakwiiya

²⁹ Ono pakati kamashiku, Mwaami Lesa wakacaya baana basankwa bakwiiya boonse mucishi ca Ijipiti, kutalikila kumwanaamwaami musankwa, wakalinga njempyani ya bwaami kushikila akumwanaakaili musankwa wakalinga muntolongo. Wakacaya abaana basankwa bakwiiya ba banyama boonse.

³⁰ Pabushiku ubo mbomunya mashiku mwaami Falawo, bacinenenene bakwe alimwi abene Ijipiti boonse bakabushikwa. Mwakalinga kulila kunene abuumbi mucishi coonse ca Ijipiti mukwiinga tekwakalinga ŋanda nabi yomwi umo mwatakalinga mwaana musankwa ufwite.

³¹ Alimwi pabushiku mbomunya ubo mashiku, mwaami Falawo wakeeta Mose aAloni akubaambila ayi, “Amuswe mucishi cangu. Mwebo alimwi abene Isilaeli boonse! Kamuya mukalambile Mwaami Lesa kweelana ambomwakasenga.

³² Mubwese ambelele, mpongo alimwi aŋombe shanu shoonse munooya. Alimwi kamumpaililaako kwaamba ayi mbe acoolwe.”

³³ Mpomunyaawo bene Ijipiti bakasengesha bene Isilaeli ayi baswe mucishi cabo, kabaamba ayi, “Soonse tutoomana kufwa na mubule kuya.”

³⁴ Mpeeke bantu bakesusha fulaulo utacite cimena mwakupangila, akuwaanga mushakufwala akubika pashifushi banyamuna.

³⁵ Bene Isilaeli bakasenga bene Ijipiti shintu sha silifa, golodi alimwi ashakufwala kweelana aMose mbwaakabalwiita.

³⁶ Mwaami Lesa wakalengesha ayi bene Ijipiti balemeke bene Isilaeli alimwi akubapa nshebakasenga. Munshila yeeyi, bene Isilaeli bakatola bubile bwa bene Ijipiti.

Bene Isilaeli mbobakaswa muIjipiti

³⁷ Kuswawaawo bene Isilaeli bakanyamuka akutalika lweendo lwabo panshi, kuswa ku Lamesesi kuya kuSakoti. Bene Isilaeli basankwa bakalinga mpashi shuulu shili myaanda yosanwe alimwi awomwi, kutabelengelaako banakashi abanike.

³⁸ Bantu bamwi baanji bateshi bene Isilaeli bakayaabo, pantu pomwi ambelele, mpongo alimwi aŋombe shiinji.

³⁹ Lyalo bakapanga cimaande ca fulaulo ngobakakusha muIjipiti. Bakatandwaamo calubilo muIjipiti, aboobo bakabula ciindi cakubamba cakulya nabi kukanda fulaulo ucite cimena.

⁴⁰ Bene Isilaeli bakekala myaaka ili myaanda yone alimwi amakumi otatwe mucishi ca Ijipiti.

⁴¹ Pabushiku myaaka iyo ili myaanda yone amakumi otatwe ndiyakamana, mikowa ya bantu ba Mwaami Lesa yoonse yakaswaamo mucishi ca Ijipiti.

⁴² Lyakalinga ndimashiku apo Mwaami Lesa ndyaakabalama akubakusha muIjipiti. Lyoonse pabushiku mbomunya ubu mashiku, bene Isilaeli boonse balyeelete kububenga kuMwaami Lesa kwaamba ayi mbushiku bwakulangila.

Milawo pabushiku bwa Pasika bwakwiibaluka kusotokela

⁴³ Mpomunyaawo Mwaami Lesa wakaambila Mose aAloni ayi, “Milawo ya pabushiku bwa Pasika bwakwiibaluka kusotokela njeeyi, Taaku muswamashi weelete kulya cakulya ca bushiku bwa Pasika.

⁴⁴ Sombi musha uli woonse uyo ngomwakoola inga walya na mwamupalula.

⁴⁵ Taaku muntu mweensu nabi musebenshi ulipilwa weelete kulyaako.

⁴⁶ Cakulya coonse cilyeelete kulitwa muŋanda momunya mocakabambilwa, taceelete kutolwa pansengwe. Alimwi tamweelete kupwaya cifuwa nabi comwi.

⁴⁷ Bene Isilaeli boonsebo balyeelete kusekelela pa bushiku ubo.

⁴⁸ Sombi taaku musankwa utana kupalulwa ngweenga walyaako. Na muswamashi ngomwikalaakwe utooyanda kulya cakulya ca bushiku bwa Pasika bwakwiibaluka kusotokela ayi alemeke Mwaami Lesa, mulyeelete kutaanguna kupalula basankwa boonse muŋanda yakwe. Kuswawaawo inga waba anga ngumwine Isilaeli, lyalo inga wasekelelaako.

⁴⁹ Milawo njemunya iyi njeyeelete kukonkelwa kumwine Isilaeli alimwi amuswamashi woonse ukala pakati kanu.”

⁵⁰ Bene Isilaeli boonse bakacita kweelana aMwaami Lesa mbwaakaambila Mose aAloni.

⁵¹ Pabushiku bweenkoobo, Mwaami Lesa wakakusha mikowa ya bene Isilaeli mucishi ca Ijipiti.