Kulonga 1 - Baibo Busansulushi Bwa Libuku Ili

Bene Isilaeli mbobakapenshekwa mucishi ca Ijipiti

¹ Meena a bana bakwe Jakobo basankwa alimwi abamumaandaabo abo mbwaakayaabo mucishi ca Ijipiti ngaaya.

² Lubeni, Simyoni, Lefi, Juda,

³ Isaka, Sebuluni, Benjameni,

⁴ Dani, Nafutali, Gadi alimwi aAsha.

⁵ Baana bamulunyungu lwakwe Jakobo boonse pantu pomwi bakalinga makumi osanwe aobilo, sombi Josefu mwanaakwe wakalinga kale mucishi ca Ijipiti.

⁶ Muya nshiku, Josefu alimwi abamakwabo boonse, kubikaawo abamulishalane lyabo boonse bakamana kufwa.

⁷ Sombi bamulunyungu lwabo abo beetwa ayi bene Isilaeli bakashala baana baanji. Mpeeke bakafula abuumbi alimwi akuba ankusu, lyalo bakakumanabo cishi coonse.

⁸ Kuswawaawo mwaami uyo watakalinga kwishi nabi comwi pali Josefu, wakatalika kulela mucishi ca Ijipiti.

⁹ Wakaambila bantu ba mucishi cakwe ayi, “Bene Isilaeli aba mbaanji abuumbi alimwi mbayumu kwiinda ndiswe.

¹⁰ Paceebo ceeci tulyeelete kubacenjelela ceebo inga baakwiindaawo kufula. Ono na kwabuka nkondo, inga baakucafwa balwani besu akulwana aswebo, lyalo bakaloboke amucishi cesu.”

¹¹ Aboobo bene Ijipiti bakasala beshikubasebensesha kwaamba ayi babapeenshe kwiinda mukusebensa ncito shiyumu. Bene Isilaeli bakayaka mandabala anene obilo aPitomu alimwi aLamesesi kwaamba ayi munoolaminwa shakulya sha mwaami Falawo.

¹² Ono nabi bene Ijipiti bakalinga kubapensha abuumbi, bene Isilaeli bakalinga kuya cifulilakobo akumwaikabo mucishi coonse. Aboobo bene Ijipiti bakatalika kuloonda bene Isilaeli.

¹³ Paceebo ceeci bakatalika kubasebensesha calunkutwe.

¹⁴ Bakayumya ceendo ca buumi bwabo kwiinda mukubasebensesha ncito iyumu abuumbi ya buyaki, alimwi aya mumyuunda yabo, cakutabanyumfwilawo nkumbu.

¹⁵ Lyalo mwaami wa mucishi ca Ijipiti wakaambila Shifula alimwi aPuwa, banakashi bobilo abo bakalinga kutumbusha bene Ebulu ayi,

¹⁶ “Pakunootumbusha banakashi bene Ebulu, na kwashalwa mwaana musankwa mulyeelete kumucaya, sombi na ngumwanakashi, nkumulekabo ayi akule.”

¹⁷ Sombi beshikutumbusha abo bakalinga kuloonda Lesa. Aboobo tabakwe kukonkela maswi akaamba mwaami wa Ijipiti, sombi bakalinga kuleka baana basankwa ayi bakule.

¹⁸ Paceebo ceeci mwaami Falawo wakeeta beshikutumbusha akubeepusha ayi, “Ino mutoocitilanshi bobulya? Mutoolekelanshi baana basankwa ayi bakule?”

¹⁹ Balo bakakumbula ayi, “Bene Ebulu banakashi tabakoshenye abanakashi bene Ijipiti. Balo balafwambaana kutumbuka womwi pali ndiswe kaatana kushika.”

²⁰ Mpeeke Lesa wakanyumfwila nkumbu beshikutumbusha aba. Lyalo bene Isilaeli bakafulilaako akuba ankusu shiinji.

²¹ Ono mukwiinga banakashi abo bakalinga kuloonda Lesa, wakabapa baana baanji.

²² Kuswawaawo mwaami Falawo wakapa bantu ba mucishi cakwe boonse mulawo wakwaamba ayi, “Mwaana musankwa washalwa woonse wa bene Ebulu mulyeelete kuya mukumuwaala muMulonga wa Nailo. Sombi baana banakashi nkubalekabo ayi bakule.”