Jowelo 3 - Baibo Busansulushi Bwa Libuku Ili

Lesa ulaakupa mishobo imwi mulandu

¹ Mwaami Lesa waamba ayi, “Paciindi ico ndaakulengesha bene Juda abene Jelusalemu kuswitilila alimwi.

² Ndaakubunganya mishobo yoonse akwiileta muCinyika ca Koombolosheshaamo. Lyalo nebo ndaakuboombolosha ceebo ca shintu nshebakacitila bantu bangu bene Isilaeli. Bakapalanganya bantu bangu pakati ka mishobo imwi akubaana cishi cangu coonse ca Isilaeli.

³ Bakalinga kuuma cisolo mukwaabana bantu bangu. Bakalinga kuulisha banike basankwa abalindu busha ayi balipile bafuule akuula waini.

⁴ “Ono mwebo nobene Taya, bene Sidoni amwebo nobamushishi shoonse sha bene Filisiti mutooyanda kuncitila buyani? Sa mulisuni kumbooshesha cishole ceebo ca cintu cimwi ncendakamucitila? Na mbomutooyanda kucita ubo, ndaakuboosha cishole pali ndimwe cakufwambaana!

⁵ Mwakabwesa silifa agolodi wangu pantu pomwi abuboni bwangu bumwi bwa makwebo akushitola mumaandaanu akulambililaamo.

⁶ Mwakabwesa bantu bene Juda abene Jelusalemu ayi mubatume kulaale acishi cabo akuboolisha kubaGiliki.

⁷ Ono bulya ntoobaleta kuswa mumisena umo momwakaboolisha. Ndaakucita kuli ndimwe bweenka mbomwakabacitila.

⁸ Ndaakuulisha bana banu basankwa abanakashi kubene Juda. Lyalo abalo balaakuboolisha kubene Sabeya mushobo uli kulaale. Nebo neMwaami Lesa ndaamba.

⁹ “Amwaambilishe pakati ka mishobo yoonse ayi, ‘Amulibambile kulwana! Amubalamune bashilumamba bacibwene! Amubunganye bashilumamba banu boonse bese balwane.

¹⁰ Amufule milomo ya shakulimisha shanu ayi ibe mipeeni. Amufule shakukwesoosha shisamu ayi shibe masumo. Ono abalefukite boonse balyeelete kulwana.

¹¹ Amufwambaane kwisa mwebo nobamumishobo ishingulukite. Kamwisa mubungane mucinyika ico.’ ” NoBaami baLesa, amutume likoto lyanu lya bashilumamba ayi babalwaane!

¹² Mwaami Lesa waamba ayi, “Mishobo yoonse ilyeelete kulibambila akwisa muCinyika ca Koombolosheshaamo. Lyalo ndaakwisa mukoombolosha bamumishobo yoonse kuswa mumbasu shoonse.

¹³ Ncakwiila bubi bwabo mbunene abuumbi Amubatimbule bweenka bucita cicekeshi pakutebula witi. Amubalyatoole bweenka butyanwa minyansa mucilindi cakutyaninaamo ciswite kushikila waini wasefukila panshibo.”

¹⁴ Shuulu ashuulu sha bantu bali muCinyika ca Koombolosheshaamo. Bushiku bwa Mwaami Lesa bulaakufwambaana kwisa mucinyika ico.

¹⁵ Lisuba amweenshi shilaakushiyabo mbi ashalo nyenyeenshi shilaakucileka kubala.

Mwaami Lesa ulaakupa coolwe bantu bakwe

¹⁶ Mwaami Lesa ulaakubuluma kuKalundu ka Siyoni akululuma kuswa kundabala inene ya Jelusalemu. Lyalo cishi ca panshi aliculu shilaakutenkaana. Sombi Mwaami Lesa ulaakuba ciyubilo ca bantu bakwe, ee, ulaakufuna bantu bakwe bene Isilaeli.

¹⁷ Mwaami Lesa waamba ayi, “Ono nobene Isilaeli mulaakwishiba ayi ndimebo Mwaami Lesa, Lesa wanu. Ndekala paKalundu kasalalite ka Siyoni. Ndabala ya Jelusalemu ilaakuba ndabala isalalite. Baswamashi teshi bakeekomeewo, sobwe.

¹⁸ Paciindi ico tulundu tulaakuba amyuunda ya minyansa. Ŋombe shilaakwisula mutulundu tuniini toonse. Tulonga toonse twa muJuda tulaakunokunka maanshi. Kalonga kalaakunookunka kuswa kuŊanda yakwe Lesa akutola maanshi muCinyika ca Shitimu.

¹⁹ “Cishi ca Ijipiti cilaakuba luyanga. Acalo cishi ca Edomu cilaakuba luyanga umo mutekaali bantu mukwiinga mishobo iyo yakalwana cishi ca Juda akucaya bantu ba ncico batacite mulandu.

²⁰ Bantu balaakunookala mucishi ca Juda lyoonse alyoonse amwalo mundabala ya Jelusalemu mulaakunookala bantu kwamashalane oonse.

²¹ Nebo neMwaami Lesa neenkala paKalundu ka Siyoni ndaakuboosha cishole ceebo ca baabo bakacaikwa. Teshi nkalekeleewo baabo bacite mulandu wakutila bulowa bwabo.”