Jowelo 2 - Baibo Busansulushi Bwa Libuku Ili

Kucenjesha pabushiku bwa Mwaami Lesa kwiinda mucisoshi

¹ Amulishe mapeenga muSiyoni, Amucenjeshe bantu bangu pakalundu kangu kasalalite. Amututume noonse nobantu nomwikala mucishi ca Juda mukwiinga bushiku bwa Mwaami Lesa butoosa. Ncakwiila bulibo pafwaafwi kwisa.

² Bushiku ubo mbwa munshinshe alimwi mbwa buumba, bushiku bushiya mbi alimwi bwa makumbi alemu. Bweenka makumbi mbwaafwekelesha cishi kuswa kwicwe, mbweeke ubo cisoshi cinene citoosa pacishi. Cisoshi ico tacikwe kubonekaawo kale kuswabo kukalekale alimwi teshi cikabonekeewo tubili munshiku shitoosa.

³ Citoolya shishango cakumaninina anga ngumulilo. Kunembo lya ncico cishi cili anga ngumuunda wa Edeni. Sombi nkocitooswa kwababo anga nduyanga. Ncakwiila taaku nabi comwi citoocaalaako.

⁴ Cisoshi ico citooboneka anga ngamaaki akutambala anga ngamaaki ankondo.

⁵ Cisoshi citoosotooka peculu pakalundu akupanga coongo cili anga nca shikoci. Citootolooka bweenka bucita mulilo mubwiisu buyumu. Caliyala bweenka bucita bashilumamba balibambila kulwana.

⁶ Kucibonabo, bantu boonse baba aboowa. Ncakwiila ciwa ca muntu womwi awomwi caloka kuboowa.

⁷ Cilafuumuka anga mbashilumamba akutanta malinga anga mbeshinkondo. Cileenda akunooyabo kunembo mumindando cakutapambukaamo.

⁸ Pakati ka ncico takubi kupunkanapunkana. Nsoshi yomwi ayomwi ilalulamabo kuya kunembo. Cilapwaya malinga oonse, sombi cakutaswawo mumindando ya ncico.

⁹ Cilacica kuya pandabala inene, akucicila palubumbu lwa njiyo. Cilatanta kumaanda akwinjilila pambwelyo bweenka bucita beepi.

¹⁰ Cishi cilatenkaana ndiceenda. Liculu alyalo lilatutuma. Lisuba amweenshi shilaboolabo mbi ashalo nyenyeenshi shilacileka kubala.

¹¹ Mwaami Lesa ngowatanjilila likoto lyakwe lya bashilumamba. Bashilumamba bakwe abo bacita ncaasuni, mbaanji abuumbi cakutabelengeka alimwi mbeshinkusu. Bushiku bwa Mwaami Lesa mbunene alimwi bulayoosha. Anu ngani weenga wacaala pabushiku ubo?

Kusengwa kusanduka kuswa kushibiibi

¹² Mwaami Lesa waamba ayi, “Nabi pacecino ciindi amusanduke kuswa kushibiibi shanu mwise kuli ndime amyoyo yanu yoonse, mukulikasha kulya, mukulila amukuungumana.”

¹³ Amukwamoone myoyo yanu kutondesha buumba kuteshi kukwamoona shakufwala shanu. Amuboole kuMwaami Lesa, Lesa wanu. Lakwe ngushiluse alimwi ngushinkumbu. Taakalali bwaangu alimwi ngushilusuno. Ulisunishi kulekelela kwiinda kupa mulandu.

¹⁴ Ngani ushi, mpashi inga wamufwita nkumbu. Lyalo ulaakumupa coolwe mukumupa shishango shiinji. Mpeeke mulaakunootola shipo sha fulaulo asha cakunwa kuMwaami Lesa, Lesa wanu.

¹⁵ Amulishe lupeenga paKalundu ka Siyoni. Amwaambilishe ayi mbushiku bwakulikasha kulya akwiita bantu ayi babungane pantu pomwi.

¹⁶ Amubunganye bantu pantu pomwi. Mubalwiite kwaamba ayi balisalashe. Amubunjike bamaloba boonse akubunganya banike pantu pomwi. Amubunjike abakateta. Abalo banabwiinga abashibwiinga baswe muŋanda yabo.

¹⁷ Bapailishi abo basebensela Mwaami Lesa, balile pakati ka cipaililo akapinda ka kumulyango wa Ŋanda yakwe Lesa. Banokwaamba ayi, “NoBaami baLesa, amunyumfwile nkumbu bantu banu. Mutaleeki kwaamba ayi bantu mbomwakasala babe cintu ceelete kushibulukwa. Mutaleeki bakunsengwe kubaseka ayi, ‘Ino Lesa wanu uli kuli?’ ”

Mwaami Lesa mbweshi akape coolwe bene Isilaeli

¹⁸ Ono Mwaami Lesa ulaakubika maano kucishi cakwe. Ncakwiila ulaakunyumfwila nkumbu bantu bakwe.

¹⁹ Mwaami Lesa ulaakubakumbula ayi, “Ono bulya ndaakumupa shili anga ngamaila, waini amafuta a olifi. Lyalo mwebo mulaakukuta. Ncakwiila mishobo imwi teshi ikamusebaanyeewo.

²⁰ Ndaakutandaanya cisoshi cakaswa kumatwa kuya kulaale amwebo. Ndaakucitandaanya kuya muluyanga. Mindando yakunembo ya ncico ilaakutandilwa muLweenge lwa Mwiinyo. Ayalo mindando yakwisule ilaakutandilwa muLweenge lwa Mediteleniyani. Cilaakubola akununka abuumbi.” Ncakwiila Mwaami Lesa wakacita shintu shikankamika.

²¹ Webo ocishi utaloondi. Kondwa akusangalala mukwiinga Mwaami Lesa wakucitila shintu shikankamika.

²² Nobanyama ba muluundu mutaloondi. Mafulo asonsa mweemfu. Shisamu shatalika kucata shisepo alimwi shisamu sha nkuyu asha minyansa shacata shisepo shiinji.

²³ Nobene Siyoni, amukondwe Amusangalalile muMwaami Lesa, Lesa wanu mukwiinga wamupa mfula ya mainsa mubululami bwakwe. Wamupa amfuula inene yakutalikila ayakumeelelesho mbuli kataanshi.

²⁴ Mansa shakulupwitaawo shilaakusula shili anga ngamaila, Ashalo shilindi shakutyaninaamo shilaakusula waini upya amafuta a olifi.

²⁵ Mwaami Lesa waamba ayi, “Ndaakumulipila pashoonse shakalikwa kunsoshi. Nkokwaamba ayi shakalikwa kunsoshi shinene atwana twa nshisho, nsoshi shimwibo akucisoshi. Shoonse ishi shakalinga anga ndikoto lyangu lya bashilumamba ndyendakatuma.

²⁶ Mulaakulya shiinji akukuta. Ncakwiila mulaakunumbaisha nebo neMwaami Lesa, Lesa wanu uyo wakamucitila shintu shikankamika. Mwebo nobantu bangu teshi mukasebaanishikweewo tubili.

²⁷ Nobene Isilaeli mulaakwishiba ayi ndyaanu alimwi ayi nebo neMwaami Lesa ndimebo Lesa wanu, ncakwiila taaku aumwi. Mwebo nobantu bangu teshi mukasebaanishikweewo tubili.

Bushiku bwa Mwaami Lesa

²⁸ “Ciindi caakushika, ndaakutila Mushimu wangu pabantu boonse. Bana banu basankwa abanakashi balaakwaamba maswi angu. Bamacembele banu basankwa balaakulota shiloto. Bacikula bwangu banu basankwa balaakubona shili anga nshiloto.

²⁹ Munshiku isho ndaakutila Mushimu wangu apabasebenshi bangu basankwa abanakashi.

³⁰ Ndaakucita shaankamiko kwiculu apacishi ca panshi. Kulaakuba bulowa, mulilo alimwi ashikunku wa bwiishi.

³¹ Lisuba lilaakuboolabo mbi, awalo mweenshi ulaakusalalabo pyu anga mbulowa, kabutana kushikila bushiku bwangu nebo neMwaami Lesa, bushiku ubo bunene alimwi buyoosha.

³² Lyalo uyo woonse usenga ndime neMwaami Lesa ayi mucaafwe, ncakwiila ulaakupulushikwa bweenka bwakaamba Mwaami Lesa ayi, ‘Bamwi paKalundu ka Siyoni amundabala ya Jelusalemu, balaakupulushikwa. Nkokwaamba ayi abo mbweshi nkasaale, balaakucaalaawo.’ ”