Joshuwa 9 - Baibo Busansulushi Bwa Libuku Ili

Bene Gibyoni mbobakacenjeeka Joshuwa

¹ Ono bamaami boonse bakalinga kumbo lya Mulonga wa Joodani bakanyumfwa kukoma kwa bene Isilaeli. Bamaami abo bakalinga kwikala kucishi ca tulundu, munkunamo ya tulundu twakumbo alimwi amuloombe lwa Lweenge lwa Mediteleniyani kuya mukushika akuLebanoni. Bakalinga bamaami ba bene Iti, bene Amoli, bene Kenani, bene Pelisi, bene Ifi alimwi abene Jebusi.

² Lyalo boonse bakacatana pantu pomwi kwaamba ayi balwane Joshuwa alimwi abene Isilaeli bamwi boonse.

³ Sombi bene Gibyoni, abo bakalinga bene Ifi, ndibakanyumfwa sheesho Joshuwa nshaakacita kundabala ya Jeliko aya Ai,

⁴ bakayeeya kumucenjeeka. Bakanyamuka akubwesa shakulya shabo, balongela mumasaka afwitefwite ankomwe sha shipaya shakubikamo waini shikulukulu shikwamookite alimwi sha shimami akushibika pambongolo shabo.

⁵ Bakafwala shakufwala shifwite alimwi ankwabilo shakumameeka. Shinkwa ngobakanyamuna wakalinga uyumu alimwi ubundite.

⁶ Lyalo bakaya kuli Joshuwa kumisumba kuGilugala, akumwaambila pantu pomwi abene Isilaeli boonse ayi, “Twaswa kucishi cili kulaale abuumbi. Tulisuni kwaamba ayi tupange cipangano amwebo.”

⁷ Sombi basankwa bene Isilaeli bakaamba ayi, “Nciinshi ncemusunini kwaamba ayi tupange cipangano amwebo? Mpashi mwebo mulekalabo pafwaafwi.”

⁸ Balo bakaambila Joshuwa ayi, “Tuli basebenshi banu.” Joshuwa wakabeepusha ayi, “Ino ndimwe baani? Mwaswa kuli?”

⁹ Lyalo bakamukumbula ayi, “Swebo sobasebenshi banu twaswa kucishi cili kulaale abuumbi ceebo twakanyumfwa mpuwo ya Mwaami Lesa, Lesa wanu. Twakanyumfwa shoonse nshaakacita mucishi ca Ijipiti,

¹⁰ asheesho shoonse nshaakacita kubamaami bobilo ba bene Amoli bali kwicwe lya Joodani, nkokwaamba ayi Sioni mwaami wa kuEshiboni alimwi aOgi mwaami wa kuBashani uyo wakalinga kwikala kuAshitaloti.

¹¹ Ono bamaloba besu alimwi abaabo boonse bekala mucishi cesu bakatulwiita ayi, ‘Amubwese shakulya mulweendo lwanu, muye mukabonanaabo. Mukabalwiite ayi, “Tuli basebenshi banu. Atupange cipangano amwebo.” ’

¹² Shinkwa wesu uyu wakalinga kulungula nditwakoolongela pabushiku nditwakanyamuka kumisheesu ayi twise tubonane amwebo. Sombi amubone ono mbowayuma akubunda.

¹³ Nkomwe sha shipaya shakubikamo waini ishi ashalo shakalinga shipya nditwakalongelaamo, sombi amubone ono mboshakwamooka. Shakufwala shesu alimwi ankwabilo shafwa ceebo ca mushinso ulaamfu.”

¹⁴ Mpomunyaawo basankwa bene Isilaeli bakanyumfwaako shakulya shabo, sombi tabakwe kwiipusha Mwaami Lesa bwakucita.

¹⁵ Lyalo Joshuwa wakapanga cipangano caluumuno ambabo, nkokwaamba ayi batakacaikwi. Bamatanjilili ba bene Isilaeli abalo bakayumya cipangano kwiinda mukushomesha cakulumbila ayi balaakunoocilama.

¹⁶ Ingayi peende nshiku shotatwe kuswa bushiku bwakupanga cipangano ico abene Gibyoni, bene Isilaeli bakanyumfwa ayi bantu aba balekalabo pafwaafwi ambabo.

¹⁷ Paceebo ceeci bene Isilaeli bakanyamuka akuya mukushika kumandabalaabo, nkokwaamba ayi Gibyoni, Kefila, Biloti alimwi aKilyati Jeyalimu. Bakashika pabushiku bwatatu.

¹⁸ Nacibi boobo bene Isilaeli tabakwe kubacaya mukwiinga bamatanjilili babo bakashomesha cakulumbila muliina lya Mwaami Lesa, Lesa wa bene Isilaeli. Boonse bantu bakatongookila bamatanjilili pacikani ici,

¹⁹ sombi bamatanjilili boonse bakakumbula ayi, “Twakashomesha cakulumbila muliina lya Mwaami Lesa, Lesa wa bene Isilaeli. Aboobo tatweelete akubakumya bulya.

²⁰ Ono mbweshi tucite kuli mbabo mbulya. Teshi tubacaaye kwaamba ayi bukali bwakwe Lesa butakabi pali ndiswe ceebo cakutacita kweelana ambotwakashomesha cakulumbila.

²¹ Tutabacaayi, sombi ababebo beshikututepela nkuni alimwi abeshikututekela maanshi.” Anu bamatanjilili mbobakanyumfwana ubo.

²² Mpomunyaawo Joshuwa wakeeta bene Gibyoni akubeepusha ayi, “Mwakatucenjeekelanshi ayi mulekala kulaale aswebo, kakuli mulekalabo pafwaafwi?

²³ Ono Lesa wamushingana ceebo cakucita boobo. Munanoolibo beshikutepa nkuni alimwi abeshikuteka maanshi kuŋanda isalalite ya Lesa wangu.”

²⁴ Mpeeke bakakumbula Joshuwa ayi, “Swebo sobasebenshi banu nkambo, twakanyumfwa cakutatonsha mbuli Mwaami Lesa, Lesa wanu mbwaakaambila Mose musebenshi wakwe ayi akamupe cishi coonse, alimwi ayi mukanooya cicaya baabo bekalaamo kunembo lyanu. Paceebo ceeci twakaloonda ayi inga mwaakutucaya. Anu nceceeco ncetwakacitila boobo.

²⁵ Ono bulya tuli mumaansaanu. Amutucite cili coonse nceshi mubone ayi ncibotu alimwi cililuleme kuli ndimwe.”

²⁶ Aboobo Joshuwa wakabapulusha kubene Isilaeli bamwi boonse, tabakwe kubacaya, sobwe.

²⁷ Bushiku ubo wakabalengesha kuba beshikutepa nkuni alimwi akutekela maanshi bene Isilaeli boonse akusebensa kucipaililo ca Mwaami Lesa. Kushikila asunu bene Gibyoni ngomulimo ngobacita kumusena uli woonse Mwaami Lesa ngweenga wasala.