Joshuwa 8 - Baibo Busansulushi Bwa Libuku Ili

Kucatwa akunyonyoolwa kwa ndabala ya Ai

¹ Mpeeke Mwaami Lesa wakaambila Joshuwa ayi, “Utaloondi nabi kutyongola. Bwesa bashilumamba boonse akuya mukulwana ndabala inene ya Ai. Mukwiinga mwaami wa muAi abantu bakwe ndababika mumaansaanu pantu pomwi andabala yakwe inene alimwi acishi cakwe coonse.

² Mucite kundabala ya Ai alimwi amwaami wa njiyo, bweenka mbomwakacita ndabala ya Jeliko amwaami wa njiyo. Sombi lweendo luno shintu shoonse alimwi ashifubwa shabo, mukabwese ayi nshinenu. Mulibambile kulwana ndabala inene iyi kuswa kwisule cakuteshiba boonse.”

³ Aboobo Joshuwa abashilumamba bakanyamuka baya mukulwana ndabala ya Ai. Mpeeke Joshuwa wakasala bashilumamba bali 30,000 abo mbwaakalinga kushoma. Wakabatuma mashiku

⁴ akubaambila ayi, “Amunyumfwe! Mulyeelete kubelaminina kwisule lya ndabala inene iyi. Kutatalamuka bunene a njiyo. Noonse munoolibambite.

⁵ Nebo alimwi abaabo boonse mbondyaabo tutoolulamabo ndabala inene iyi. Ono na bantu bamumo bese mukutulwana, bweenka mbobakacita pakutaanguna, tutooloonda akucica.

⁶ Batootukonkela kushikila tubatalamushe kundabala inene, mukwiinga bananokwaamba ayi, ‘Batucica kweelana ambobakacica kataanshi.’ Ono swebo twaakucica,

⁷ mwebo mulyeelete kuyubuluka akubwesa ndabala. Mwaami Lesa, Lesa wanu utooyaaba mumaansaanu.

⁸ Mwamana kubwesa ndabala iyi, mwiiteente. Mulyeelete kucita bweenka bwaamba Mwaami Lesa. Anu iyi njemilasho yangu.”

⁹ Kuswawaawo Joshuwa wakabapalanganya akuya kooko nkobakalinga kweelete kubelaminina, kumbo lya Ai pakati ka ndabala ya Ai alimwi aya Betelo. Sombi pabushiku ubo Joshuwa wakalingabo mumisumba abashilumamba bakwe.

¹⁰ Mpeeke macuunsacuunsa pabushiku bwakaboolaawo, Joshuwa wakabunganya bashilumamba bakwe. Lyalo lakwe alimwi abamatanjilili ba bene Isilaeli, bakatanjila kunembo akunooya kuAi.

¹¹ Boonse bashilumamba mbwaakalingaabo bakeenda akushika pafwaafwi andabala inene iyo akuyaka misumba kumatwa lya Ai. Pakati ka mbabo alimwi andabala iyo, pakalinga cinyika.

¹² Joshuwa wakabwesa bashilumamba bakalinga mpashi 5,000 akubashisa kababelaminina kumbo lya ndabala, pakati ka ndabala ya Betelo andabala njemunya ya Ai.

¹³ Bashilumamba bakabikwa mumisena yabo mukulibambila kulwana. Bamwi bakalinga mumisumba kumatwa lya ndabala inene iyo, abalo bamwi kumbo lya njiyo. Pabushiku ubo mashiku, Joshuwa wakaya mucinyika.

¹⁴ Ono mwaami wa kuAi ndyaakabona bashilumamba bakwe Joshuwa, lakwe alimwi abashilumamba boonse ba mundabala iyo bakafumabo kuya mukukumana abene Isilaeli ayi balwane pamusena uli pafwaafwi acinyika. Sombi taakalinga kwishi ayi bamubelamina kwisule lya ndabala.

¹⁵ Mpeeke Joshuwa abashilumamba bene Isilaeli abo mbwaakalingaabo bakacita anga baloonda akucicila muluyanga.

¹⁶ Boonse basankwa ba mundabala iyo ya Ai bakeetwa ayi babatandaanye. Ono mukuya cibatandaanya bakatalamushikwa andabala iyo.

¹⁷ Taaku musankwa nabi womwi wakacaala muAi nabi muBetelo, ceebo boonse bakatandaanya bene Isilaeli. Ndabala bakeeshiyabo yeenka cakubula ashikwiilama.

¹⁸ Mpomunyaawo Mwaami Lesa wakaambila Joshuwa ayi, “Tondeka lisumo ndyoocite mulyaansa kundabala ya Ai, ceebo ntooipa mumaansaako.” Mpeeke Joshuwa wakatondeka lisumo kundabala iyo.

¹⁹ Ndyaakamana kucita boobo, bashilumamba bakalinga kuyubite kwisule bakafwambaana kunyamuka kuswa mumisena yabo akucicila kunembo. Bakeendililabo kwinjila mundabala inene iyo, beebwesa akwiitenta.

²⁰ Ono basankwa ba muAi ndibakalanga kwisule akubona bwiishi bwa ndabala kabusunta mwiculu, bakabula lubasu lwa kucicilaako ceebo bene Isilaeli abo bakalinga kuya cicicila muluyanga, bakapilulukila basankwa abo.

²¹ Joshuwa alimwi abene Isilaeli abo mbwaakalingaabo bakapiluluka akulwana basankwa bene Ai ndibakabona ayi abo bakalinga kubelamite babwesa ndabala alimwi andibakabona bwiishi bwa njiyo mwiculu.

²² Mpeeke bene Isilaeli boonse bakalinga mundabala bakabakonkela, lyalo bakababo pakati bene Isilaeli mumbasu shobilo shoonse. Bene Isilaeli bakacaya bene Ai boonse,

²³ sombibo mwaami wa kuAi eenka ngobakacata kaali muumi akumutola kuli Joshuwa.

²⁴ Ono bene Isilaeli ndibakamana kucaya bene Ai abo mbobakalinga bashisha muluyanga, bakaboola akuya mukucaya baabo bakalinga mundabala, kushikila boonse mipeeni yeelaawo.

²⁵ Pabushiku ubo, basankwa abanakashi bakacaikwa bakalinga 12,000. Anu boonse bene Ai bakacaikwa.

²⁶ Joshuwa alakwe taakwe kutula lyaansa ilyo lyakalinga kucite lisumo kushikila bantu boonse bakalinga kwikala muAi ndibakamana kucaikwa.

²⁷ Sombi bene Isilaeli bakatola shifubwa alimwi abuboni bumwi ubo mbobakakusha mundabala inene iyi, kweelana aMwaami Lesa mbwaakalwiita Joshuwa.

²⁸ Ncakwiila Joshuwa wakatenta ndabala ya Ai akwiilobya, kweelana ambuli mbweebete asunu.

²⁹ Kuswawaawo Joshuwa wakaanjika mwaami wa Ai pacisamu akumulekelaawo kushikila macolesha. Mpeeke ndilyakepila, wakaambila bamwi ayi baye bookusheewo mutuntu akuuwaala pamwinjililo wa ndabala inene iyo. Mpeeke bakoolundika mulwi wa mabwe. Mulwi uyo mpoocili asunu.

Milawo mboyakabelengwa pakalundu ka Ebo

³⁰ Lyalo Joshuwa wakayakila Mwaami Lesa, Lesa wa bene Isilaeli cipaililo paKalundu ka Ebo.

³¹ Wakaciyaka kweelana amilasho iyo Mose musebenshi wa Mwaami Lesa njaakapa bene Isilaeli. Nkokwaamba ayi bweenka mbomulembetwe mulibuku lya Milawo lyakalemba Mose ayi, “Cipaililo cakayakwa amabwe atakwe kubeswa kushisebensesho sha ceela.” Pali ncico, bakabengelawo milambu yakutenta mukulemeka Mwaami Lesa, pantu pomwi amilambu ya bwanabwankashi.

³² Mpeeke pameenso a bene Isilaeli, Joshuwa wakalemba pamabwe Milawo iyo Mose njaakalinga walemba.

³³ Mpomunyaawo bene Isilaeli boonse pantu pomwi abamaloba babo, bamatanjilili, boomboloshi kubikaawo abaswamashi mbobakalinga kwikalaabo, bakeemikana mumbasu shobilo sha Libokoshi lya Cipangano lya Mwaami Lesa, kabalangite kubapailishi bene Lefi abo bakalinga kuliyumwite. Musa umwi wa bantu wakeemikana kunembo lya Kalundu ka Gelisimu awalo umwi wakeemikana kunembo lya Kalundu ka Ebo. Bakacita boobo kweelana abwakabalwiita Mose musebenshi wa Mwaami Lesa ayi banoocita na ciindi cakupekwa coolwe cashikila.

³⁴ Kuswawaawo Joshuwa wakabelengesha Milawo yoonse, nkokwaamba ayi shoolwe alimwi amashingo, bweenka mbuli mboshilembetwe mulibuku lya Milawo.

³⁵ Milawo yoonse iyo Mose njaakalemba, Joshuwa wakeebelengela bantu abo bakalinga kubungene, kubikaawo abanakashi, banike alimwi abaswamashi abo mbobakalinga kwikalaabo.