Joshuwa 7 - Baibo Busansulushi Bwa Libuku Ili

Cibiibi cakwe Akani

¹ Nacibi boobo bene Isilaeli tabakwe kunyumfwila Mwaami Lesa ndyaakabaambila ayi tabeelete kubwesa cintu nabi comwi mundabala inene ya Jeliko ico ceelete kunyonyoolwa. Akani mwanaakwe Kami, mwishikulu wakwe Sabudi, mucipani cakwe Sela mumukowa wakwe Juda, wakabwesa shintu shimwi. Aboobo Mwaami Lesa wakakalalila bene Isilaeli.

² Ono Joshuwa wakatuma basankwa bamwi kuswa muJeliko kuya kuAi, ndabala inene ili kwicwe lya Betelo pafwaafwi aBeti Afeni, ayi bakasense musena uyo. Aboobo basankwa abo bakaya mukusensa ndabala ya Ai.

³ Ndibakaboola kuli Joshuwa, bakaamba ayi, “Bantu boonse tabeelete kuya mukulwana abantu ba kuAi. Kutumwebo bali 2,000 nabi bali 3,000. Mutapenshibo bashilumamba boonse ceebo kulekalabo bantu baniini.”

⁴ Aboobo bantu bakayaako bakakumana mpashi 3,000, sombi bene Isilaeli bakakomwa akuswaako lubilo.

⁵ Bene Ai bakatandaanya bene Isilaeli kuswa paminjililo ya ndabala inene iyo akubashisha pamusena wakalinga kukabwa mabwe. Bakacaikwa kunkunamo ya kalundu, bakakumana mpashi 36. Mpeeke bene Isilaeli ndibakabona boobo, mushiso mwakaboolabo tontolo kuboowa.

⁶ Lyalo Joshuwa abamaloba ba bene Isilaeli bakakwamoona shakufwala shabo mubuumba, kuliwaala panshi kunembo lya Libokoshi lya Cipangano ca Mwaami Lesa akunooletebo peenka apo kushikila macolesha. Mpeeke bakalitukweeta alusuko pamitwi yabo.

⁷ Kuswawaawo Joshuwa wakaamba ayi, “NoBaami baLesa beshinkusu shoonse! Nciinshi ncemwakatusubushisha Mulonga wa Joodani? Ceebonshi mwatwaaba mumaansa a bene Amoli ayi batunyonyoole? Naakwiinga mwakatulekabo katushiite kwitala lya Joodani!

⁸ NoBaami baLesa, nciinshi nceenga ndaamba paciindi cino bene Isilaeli ndibakomwa akucica balwani babo?

⁹ Bene Kenani alimwi abantu bamwi boonse mucishi cino balaakunyumfwa cikani ici akwisa mukutushinguluka alimwi akutunyonyoola soonse. Ono mwebo mulaakucita buyani ayi liina lyanu likanoocilemekwa?”

¹⁰ Mpomunyaawo Mwaami Lesa wakaambila Joshuwa ayi, “Nyamuka! Nciinshi ncewoonena bobulya panshi?

¹¹ Bene Isilaeli bakabisha. Bapwaya cipangano ncendakapanga ambabo akubalwiita ayi bacilaame. Bakabwesa shintu shimwi shakalinga kweelete kunyonyoolwa. Aboobo bakeepa, bakabeca, alimwi bakashisa shintu isho pashintu shabo.

¹² Nceceeco bene Isilaeli ncebakomenwa kubalwani babo. Batoopiluka akucica balwani babo ceebo balo beene babikwa pakunyonyoolwa. Paceebo ceeci teshi mbeewo amwebo na mubule kunyonyoola shoonse nshendakamwaambila ayi mutabwesi.

¹³ “Nyamuka, koya ubasalashe bantu. Ubalwiite ayi bakalibambile kwisa kunembo lyangu ciilo. Nebo neMwaami Lesa, Lesa wa bene Isilaeli ndisuni kubalwiita ayi, ‘Nobene Isilaeli pakati kanu pali shintu sheelete kunyonyoolwa. Aboobo inga tamulwaniiwo akukoma balwani banu na mubule kushikusha pakati kanu.

¹⁴ Bwaakuca macuunsa bakese kunembo lyangu mukowa amukowa. Mukowa nebo neMwaami Lesa ngweshi nkasaale, ulyeelete kwisa cipani acipani. Cipani acalo nceshi nkasaale, cilyeelete kwisa ŋanda aŋanda. Ono ŋanda iyo nebo neMwaami Lesa njeshi nkasaale, ilyeelete kwisa muntu amuntu.

¹⁵ Lakwe uyo weshi akacatilwe shintu sheelete kunyonyoolwa, ulaakutentwa pantu pomwi abamuŋanda yakwe alimwi ashintu shakwe shoonse. Muntu uyo wakapwaya cipangano cangu neMwaami Lesa akucita cintu cilensha nsoni pakati ka bene Isilaeli.’ ”

¹⁶ Ingayi buce macuunsacuunsa, Joshuwa wakaleta bene Isilaeli kunembo, kweelana amikowa yabo. Mpeeke kwakasalwa mukowa wakwe Juda.

¹⁷ Kuswawaawo, wakaleta shipani sha mumukowa wakwe Juda kunembo. Mpeeke kwakasalwa cipani cakwe Sela. Cipani cakwe Sela cakesa kunembo muŋanda aŋanda, mpeeke kwakasalwa ŋanda yakwe Sabudi.

¹⁸ Lyalo Joshuwa wakaleta muntu amuntu pabamuŋanda yakwe Sabudi kunembo. Mpeeke Akani mwanaakwe Kami, mwishikulu wakwe Sabudi, mwanaakwe Sela wa mumukowa wakwe Juda wakacatwa.

¹⁹ Ono Joshuwa wakaambila Akani ayi, “Omwanaangu, amba calushinisho pameenso a Mwaami Lesa, Lesa wa bene Isilaeli, ulyaambilile omwiine ico ncewacita. Utacishisi kuli ndime.”

²⁰ Akani wakakumbula ayi, “Ncakwiila. Nebo ndakabisha pameenso a Mwaami Lesa, Lesa wa bene Isilaeli. Ono ncendakacita nceeci:

²¹ pashintu isho nshetwakabwesa, ndakabonawo cakufwala ca peculu cibotu abuumbi ca kuBabiloni, makilogilamu obilo a silifa alimwi acipimpita ca golodi cakalinga kulema musa wa kilogilamu. Ndakakumbwa shintu isho akushibwesa. Anu ndakashifukila mutente yangu, silifa njeili panshi peene.”

²² Mpomunyaawo Joshuwa wakatuma basankwa abo bakacica kuya kutente yakwe Akani. Uko bakashicana kashishisitwe mutente, silifa keeli panshi peene.

²³ Shintu isho bakashikusha mutente akushitola kuli Joshuwa akubene Isilaeli bamwi boonse. Mpeeke bakashibika panshi kunembo lya Mwaami Lesa.

²⁴ Lyalo Joshuwa alimwi abene Isilaeli boonse bakacata Akani mwanaakwe Sela, akubwesa silifa, cakufwala ca peculu, cipimpita ca golodi, bana bakwe basankwa abanakashi, ŋombe shakwe, mbongolo, mbelele, tente yakwe alimwi ashintu shimwi shoonse nshaakalinga kucite. Mpeeke bakatola Akani abamuŋanda yakwe alimwi ashintu isho shoonse kuCinyika ca Akoli.

²⁵ Joshuwa wakaamba ayi, “Nciinshi ncewaletela mapensho aya pali ndiswe? Mwaami Lesa bulya utooleta mapensho pali ndiwe!” Mpomunyaawo bene Isilaeli boonse bakacaya Akani kumabwe. Lyalo ndibakamana kucaya bamuŋanda yakwe boonse kumabwe, bakabatentela pantu pomwi ashintu shakwe shoonse.

²⁶ Ingayi pali Akani, bakalundikawo mabwe aanji abuumbi, ayo aciliiwo abobulya. Nceceeco musena uyu ncewiitilwa ayi Cinyika ca Akoli nkokwaamba ayi Cinyika ca Mapensho. Kuswawaawo bukali bwa Mwaami Lesa bwakamana.