Joshuwa 6 - Baibo Busansulushi Bwa Libuku Ili

Ndabala inene ya Jeliko mboyakanyonyoolwa

¹ Minjililo ya kundabala inene ya Jeliko yakalinga kucalwa cankusu kwaamba ayi bene Isilaeli babule kwakwinjilila. Aboobo taaku wakalinga kwinjila nabi kuswa.

² Mpeeke Mwaami Lesa wakaambila Joshuwa ayi, “Nyumfwa, ntokwaaba ndabala ya Jeliko pantu pomwi amwaami wa njiyo alimwi abashilumamba ba njiyo mumaansaako.

³ Ono webo alimwi abashilumamba bako mulyeelete kushinguluka ndabala inene iyi linkanda lyomwi pabushiku, kwanshiku shosanwe abomwi.

⁴ Bapailishi bali bosanwe abobilo, balyeelete kuba kunembo lya Libokoshi lya Cipangano womwi awomwi kaacite lupeenga lwa lwiica lwa mbelele isankwa. Pabushiku bwasanu ashobilo, webo abashilumamba bako mukashinguluke ndabala inene iyi mankanda osanwe aobilo, bapailishi bakanoolisha mapeenga.

⁵ Ono na mukanyumfwe batolelela kulisha linkanda ilyo boonse bantu bakoolobeshe. Lyalo lubumbu lwa ndabala loonse lulaakuwa. Mpeeke bashilumamba boonse balaakwinjila mundabala umo.”

⁶ Mpomunyaawo Joshuwa mwanaakwe Nani wakeeta bapailishi akubaambila ayi, “Amunyamune Libokoshi lya Cipangano, ono bamwi bali bosanwe abobilo baye kunembo lya ndilyo womwi awomwi kaacite lupeenga.”

⁷ Kuswawaawo Joshuwa wakaambila bantu ayi, “Amutalike kushinguluka ndabala inene iyi. Ono bashilumamba bamwi batanjile kunembo lya Libokoshi lya Cipangano ca Mwaami Lesa.”

⁸ Lyalo Joshuwa ndyaakamana kwaambila bantu, bapailishi bosanwe abobilo bakalinga kucite mapeenga ali osanwe aobilo kunembo lya Mwaami Lesa, bakatanjila kabaya caalisha kunembo lya Libokoshi lya Cipangano ca Mwaami Lesa.

⁹ Ono kunembo lya bapailishi bakalinga kulisha mapeenga kwakalinga bashilumamba bamwi, akwalo kwisule lya Libokoshi lya Cipangano kwakalinga bamwi. Paciindi coonse ico mapeenga akalinga kunyumfwika kulila.

¹⁰ Sombi Joshuwa wakacenjesha bantu ayi, “Kuteelesha koolobesha, kunyamuna maswi nabi kwaamba kushikila nkamulwiite ayi moolobeshe, lyalo mukoolobeshe!”

¹¹ Mpomunyaawo wakabaambila ayi bashinguluke ndabala iyo linkanda lyomwi aLibokoshi lya Cipangano ca Mwaami Lesa. Ndibakamanisha, bakaboola kumisumba akoona nkomunya uko.

¹² Bushiku bwakaboolaawo, Joshuwa wakafwambaana kubuka, abalo bapailishi bakanyamuna Libokoshi lya Cipangano ca Mwaami Lesa.

¹³ Kweelana akataanshi, bapailishi bosanwe abobilo bakalinga kucite mapeenga osanwe aobilo bakaya kunembo lya Libokoshi lya Cipangano ca Mwaami Lesa kabaya caalisha. Bashilumamba bamwi bakatanjila, abalo bamwi bakesa pesule lya Libokoshi lya Cipangano ca Mwaami Lesa, mapeenga kaaciteekobo kulila.

¹⁴ Pabushiku bwabili ubu, bakashinguluka ndabala inene iyi linkanda lyomwi akuboola kumisumba. Bakacita boobo kwanshiku shosanwe abomwi.

¹⁵ Ingayi pabushiku bwasanu ashobilo, bakabuka kumuyamaca akushinguluka ndabala inene iyi mankanda osanwe aobilo mbuli mbobakalinga kucita lyoonse. Sombi ubo mbobushiku bweenkabo mbobakeeshinguluka mankanda osanwe aobilo.

¹⁶ Ono ndibakashinguluka lwasanu aobilo, bapailishi ndibakalibambila kulisha mapeenga, Joshuwa wakaambila bantu ayi, “Amoolobeshe! Ceebo Mwaami Lesa waaba ndabala inene iyi mumaansaanu!

¹⁷ Ndabala inene iyi alimwi ashintu shoonse shiliimo shilyeelete kunyonyweetwabo limwi ayi shibe cipo kuMwaami Lesa. Mwanakashi mufuule Laabu alimwi abamuŋanda yakwe beenkabo mbweshi bapuluke, ceebo lakwe wakashisa beshikusensa besu.

¹⁸ Sombi tamweelete kubwesa cintu nabi comwi ico ceelete kunyonyoolwa. Na mucite boobo, ingayi mwaleta mapensho alimwi abunyonyooshi mumisumba yanu nobene Isilaeli.

¹⁹ Anu shintu shoonse sha silifa, golodi, bulonse nabi sha nshimbi shabikwa palubasu ayi nsha Mwaami Lesa. Aboobo shilyeelete kubikwa kunkomwe ya buboni bwa Mwaami Lesa.”

²⁰ Mpomunyaawo bapailishi bakalisha mapeenga. Ono bantu ndibakaanyumfwabo, bakoolobesha cankusu, mpeeke lubumbu loonse lwakawa. Lyalo bashilumamba boonse bakaya benjila mundabala iyo akwiibwesa.

²¹ Bakacaya shoonse shakalinga mundabala umo amipeeni yabo, nkokwaamba ayi bantu boonse, basankwa, banakashi, banike abacembele, kubikaawo aŋombe, mbelele alimwi ambongolo ayi shibe cipo kuMwaami Lesa.

²² Kuswawaawo Joshuwa wakaambila basankwa bobilo abo bakalinga beshikusensa ayi, “Amuye muŋanda ya mwanakashi mufuule mumukuushe pantu pomwi abamakwabo boonse baliimo kweelana ambomwakamushomesha cakulumbila.”

²³ Paceebo ceeci basankwa abo bakaya mukuleta Laabu, baishi banyina, bamanandumi shakwe alimwi abaabo boonse mbwaakalingaabo. Bakakusha boonse bakalinga muŋanda yakwe, akubabika pafwaafwi amisumba ya bene Isilaeli.

²⁴ Lyalo bakatenta ndabala inene iyo yoonse alimwi ashintu shoonse shakalingaamo, kukushakobo shintu sha silifa, golodi, bulonse alimwi asha nshimbi isho nshebakabika munkomwe ya buboni bwa Mwaami Lesa.

²⁵ Sombi Joshuwa wakapulusha mwanakashi mufuule Laabu alimwi abamakwabo boonse, ceebo wakashisa beshikusensa abo mbwaakalinga watuma kuJeliko. Bamulunyungu lwakwe Laabu, bacili mucishi ca Isilaeli abobulya.

²⁶ Paciindi ico Joshuwa wakabakonkomesha akubacenjesha ayi, “Uyo woonse eshi akeeleshe kuyaka ndabala inene ya Jeliko alimwi, Mwaami Lesa ulaakumushingana. Uyo woonse eshi akakabe lwiimbi, ulaakufwitwa mwaana wakwiiya musankwa. Uyo woonse eshi akayake minjililo, ulaakufwitwa shikeela musankwa.”

²⁷ Lyalo Mwaami Lesa wakalinga aJoshuwa, mpeeke mpuwo yakwe yakakumanabo cishi coonse.