Joshuwa 4 - Baibo Busansulushi Bwa Libuku Ili

Mabwe akwiibalukilaako mbwaakabunjikwa

¹ Ono mushobo woonse ndiwakamana kusubuka Mulonga wa Joodani, Mwaami Lesa wakaambila Joshuwa ayi,

² “Sala basankwa bali likumi abobilo, nkokwaamba ayi kumikowa yoonse kuswe muntu womwi womwi.

³ Ubalwiite ayi babwese mabwe likumi aobilo kuswa pakati ka Joodani, pamusena pakalinga kwiimfwi bapailishi, akwaatola kooko nkweshi muye muyake misumba.”

⁴ Mpeeke Joshuwa wakeeta basankwa abo mbaakasala kuswa kumukowa womwi awomwi,

⁵ akubaambila ayi, “Amuye muJoodani panembo lya Libokoshi lya Cipangano lya Mwaami Lesa, Lesa wanu. Noonse womwi awomwi mubwese libwe lyomwi lyomwi pashifushi, kweelana amikowa ya bene Isilaeli.

⁶ Mabwe aya alaakunoomwiibalusha sheesho Mwaami Lesa nshaamucitila. Na kunembo bana banu bakanoomwiipusha ayi, ‘Ino mabwe aya alaambanshi?’

⁷ mukanoobalwiita ayi maanshi muMulonga wa Joodani akacileka kukunka Libokoshi lya Mwaami Lesa ndilyakalinga kusubushikwa. Mabwe aya lyoonse alaakunokwiibalusha bene Isilaeli isho shakacitika.”

⁸ Mpeeke basankwa abo bakacita kweelana abwakabaambila Joshuwa. Bakabwesa mabwe ali likumi aobilo kuswa pakati ka Mulonga wa Joodani, nkokwaamba ayi lyomwi alyomwi pamukowa womwi awomwi wa bene Isilaeli kweelana aMwaami Lesa mbwaakaambila Joshuwa. Lyalo bakaanyamuna akwaatola kumisumba yabo.

⁹ Joshuwa alakwe wakabunganya mabwe ali likumi aobilo pakati ka Mulonga wa Joodani, apo pakalinga peemikana bapailishi bakalinga kuyumwite Libokoshi lya Cipangano. Mabwe ayo abobulya mpaacili.

¹⁰ Bapailishi balo bakalinga kwiimfwibo pakati ka Mulonga wa Joodani kushikila shintu shoonse ndishakacitwa bweenka mbuli Mwaami Lesa mbwaakalwiita Joshuwa. Shakacitwa bweenka bwakaamba Mose kuli Joshuwa. Anu bantu bakafwambaana kusubuka.

¹¹ Bantu ndibakamanabo kusubuka, bapailishi abo bakalinga kuyumwite Libokoshi lya Cipangano lya Mwaami Lesa, bakasubuka abalo, bantu boonse kababwene.

¹² Ono basankwa ba mumukowa wakwe Lubeni, wakwe Gadi alimwi amusa wa mukowa wakwe Manase, kabalibambite kulwana, bakataanguna kusubuka akutanjila kunembo lya bantu boonse kweelana abwakabaambila Mose.

¹³ Bantu bali mpashi 40,000 bakasubuka mulonga pameenso a Mwaami Lesa kabalibambite kulwana akuya kushinyika sha ndabala ya Jeliko.

¹⁴ Pabushiku ubo, Mwaami Lesa wakasumpula Joshuwa pameenso a bene Isilaeli boonse. Mpeeke bakatalika kumupa bulemu mubuumi bwakwe boonse bweenka mbobakalinga kupa bulemu Mose.

¹⁵ Lyalo Mwaami Lesa wakaambila Joshuwa ayi,

¹⁶ “Ambila bapailishi abo bayumwite Libokoshi lya Cipangano ayi baswe muMulonga wa Joodani.”

¹⁷ Mpeeke Joshuwa wakacita bweenka ubo.

¹⁸ Ingayi bapailishi bashikebo petala kabayumwite Libokoshi lya Cipangano ca Mwaami Lesa, maanshi akatalika kukunka muMulonga wa Joodani akwisula bweenka mbuli kataanshi.

¹⁹ Ono pabushiku bwalikumi mumweenshi utaanshi, bantu ndibakasubuka Mulonga wa Joodani, bakaya mukuyaka misumba kuGilugala, pafwaafwi andabala ya Jeliko.

²⁰ Mpeeke mabwe ayo ali likumi aobilo ngobakakusha paMulonga wa Joodani, Joshuwa wakaabunganya kuGilugala.

²¹ Wakaambila bene Isilaeli ayi, “Na kunembo bana banu bakanoomwiipusha ayi, ‘Ino mabwe aya alaambanshi?’,

²² mukanoobalwiita ayi, ‘Bene Isilaeli bakasubukila payumu nta muMulonga wa Joodani.’

²³ Mukanoobasansulwita ayi Mwaami Lesa, Lesa wanu wakayumya Mulonga wa Joodani kunembo lyanu kushikila mwasubuka. Wakacita bweenka mbwaakayumya Lweenge Lusalala ayi tusubuke.

²⁴ Wakacita boobo kwaamba ayi bantu boonse mucishi ca panshi bakabone nkusu shakwe mboshibete alimwi ayi mwebo mukanoolemeka Mwaami Lesa, Lesa wanu lyoonse.”