Joshuwa 3 - Baibo Busansulushi Bwa Libuku Ili

Bene Isilaeli mbobakasubuka Joodani

¹ Ndibwakaca macuunsacuunsa, Joshuwa alimwi abene Isilaeli boonse bakaswa kuShitimu uko nkobakalinga akuya mukuyaka misumba kuMulonga wa Joodani pakunoolindila kuusubuka.

² Ndipakeenda nshiku shotatwe, bamatanjilili bakeenda mumisumba,

³ kabaambila bantu ayi, “Na mubone bapailishi bene Lefi kabayumwite Libokoshi lya Cipangano lya Mwaami Lesa, Lesa wanu, amwebo munyamuke akubakonkela.

⁴ Mukwiinga mwebo tamuna kwisako kale kuno, balo batoomubonesha nshila. Sombi tamweelete kusena bunene pafwaafwi aLibokoshi lya Cipangano. Mulyeelete kucaalila amushinso ulaampa kilomita yomwi.”

⁵ Mpomunyaawo Joshuwa wakaambila bantu ayi, “Amulisalashe, mukwiinga ciilo Mwaami Lesa ulaakucita shaankamiko pakati kanu.”

⁶ Lyalo Joshuwa wakalwiita bapailishi ayi, “Amunyamune Libokoshi lya Cipangano mutanjile kunembo lya bantu.” Abalo bakalinyamuna akutanjila kweelana ambwaakabaambila.

⁷ Kuswawaawo Mwaami Lesa wakaambila Joshuwa ayi, “Pabushiku bwasunu ntootalika kukusumpula pameenso abene Isilaeli boonse, kwaamba ayi beshibe ayi ndi awebo bweenka mbondakalinga aMose.

⁸ Ulwiite bapailishi bayumwite Libokoshi lya Cipangano ayi na bashike kuMulonga wa Joodani, baye beemikane mumaanshi.”

⁹ Pesule Joshuwa wakaambila bantu ayi, “Amwise kokuno munyumfwe maswi a Mwaami Lesa, Lesa wanu.

¹⁰ Ono ndyeshi mwishibe ayi Lesa muumi uli amwebo, alimwi ayi ncakwiila utootanda bene Kenani, bene Iti, bene Ifi, bene Pelisi, bene Gegashi, bene Amoli alimwi abene Jebusi kunembo lyanu.

¹¹ Amubone Libokoshi lya Cipangano lya Mwaami Lesa wa cishi ca panshi coonse litootaanguna kwinjila muMulonga wa Joodani.

¹² Ono amusale basankwa bali likumi abobilo, nkokwaamba ayi kumikowa yoonse ya bene Isilaeli kuswe muntu womwi womwi.

¹³ Na bapailishi beshikunyamuna Libokoshi lya Cipangano ca Mwaami Lesa wa cishi ca panshi coonse balyate muMulonga wa Joodani, maanshi atoocileka kukunka. Mpeeke atoosa bukunka atoolundanabo lubasu lomwi.”

¹⁴ Ono bantu ndibakapalangana pamisumba ayi basubuke Mulonga wa Joodani, bapailishi bakalinga kuyumwite Libokoshi lya Cipangano bakatanjila kunembo lyabo.

¹⁵ Mulonga wa Joodani ulesula abuumbi ciindi cakutebula coonse. Nacibi boobo, bapailishi bakalinga kuyumwite Libokoshi lya Cipangano ndibakalyatabo maanshi,

¹⁶ maanshi ayo akeemikana kukunka. Lyalo akalundanabo kulaale mundabala iitwa ayi Adamu, iyo ibambene aSaletani. Maanshi akacileka kukunka kuLweenge lwa Mwiinyo. Paceebo ceeci bantu bakasubuka pafwaafwi andabala ya Jeliko.

¹⁷ Bapailishi bakalinga kuyumwite Libokoshi lya Cipangano lya Mwaami Lesa bakalinga kwiimfwi payumu pakati ka Mulonga wa Joodani, kushikila bene Isilaeli boonse basubuka payumu nta.