Joshuwa 23 - Baibo Busansulushi Bwa Libuku Ili

Joshuwa mbwaakalasha bamatanjilili ba bene Isilaeli

¹ Ono ndipakeenda ciindi cilaamfu, Mwaami Lesa kaapete kale bene Isilaeli luumuno kuswa kubalwani babo boonse bakalinga kubashingulukite, Joshuwa kaali wacembela,

² wakeeta bene Isilaeli boonse, bamaloba babo, boomboloshi alimwi abacinenenene. Mpeeke wakabaambila ayi, “Nebo ndacembela, ee, shafula.

³ Mwebo nobeene mwakalibonena cakacita Mwaami Lesa, Lesa wanu kumishobo imwi yoonse ceebo ca ndimwe. Ncakwiila nguMwaami Lesa wakalinga kumulwaninaako.

⁴ Amwiibaluke ayi cishi ca mishobo imwi yoonse icaalite, ndakacipa mikowa ya mulikoto lyanu ayi ncinebo pantu pomwi aca mishobo iyo njendakakoma kale ico cili pakati ka Mulonga wa Joodani kwicwe aLweenge lwa Mediteleniyani kumbo.

⁵ Mwaami Lesa, Lesa wanu ulaakubalengesha kuya ciboola pesule kuboowa alimwi ulaakubatanda kuswa kunembo lyanu. Cishi cabo cilaakuba caanu kweelana ambwaakashomesha Mwaami Lesa, Lesa wanu.

⁶ Ono amukabike maano kukonkela shoonse shilembetwe mulibuku lya Milawo yakwe Mose yoonse. Mutakasuuli nakaceyi muli njiyo

⁷ kwaamba ayi mutakonkeli shicita mishobo imwi iyo njemucili ayo. Tamweelete kwaamba meena a balesa babo, kwaasebensesha pakushomesha cakulumbila, kubalambila nabi kubafukamina.

⁸ Sombi mulyeelete kushomeka kuMwaami Lesa, Lesa wanu bweenka mbomwakalinga kwisule kushika asunu.

⁹ Mwaami Lesa wakalinga kutanda mishobo iyoosha alimwi icite nkusu kuswa kunembo lyanu. Taaku nabi womwi wakakonsha kumukoma.

¹⁰ Womwibo ndondoli pakati kanu ulakonsha kutanda bantu bali cuulu mukwiinga nguMwaami Lesa, Lesa wanu umulwaninaako kweelana ambwaakashomesha.

¹¹ Anu aboobo amubikeeko maano kukusuna Mwaami Lesa, Lesa wanu.

¹² Ono na mukamwaashukile akweendelana amishobo imwi iyo icili pakati kanu, alimwi na mukatalike kweeba akweebeshana pakati kanu ambabo,

¹³ amukeshibe ayi Mwaami Lesa, Lesa wanu teshi akatandeewo mishobo iyo kunembo lyanu. Sombi balaakuba anga ntoose alimwi balaakunoocisa bweenka bucisa ciswepu mumusana nabi myuumfwa mumeenso, kushikila noonse mukaloobe mucishi cibotu cino cakamupa Mwaami Lesa, Lesa wanu.

¹⁴ “Ono ciindi cangu cashikila cakwaamba ayi mboole kubulongo. Noonse mulishi amyoyo alimwi amyuuya yanu yoonse kwaamba ayi Mwaami Lesa wakamupa shintu shoonse nshaakamushomesha. Pashintu isho nshaakamushomesha taaku ncaalilwa kucita nabi comwi, shoonse wakashicita kweelana ambwaakamushomesha.

¹⁵ Ono bweenka mbwaakamupa shintu shibotu shoonse kweelana ambwaakashomesha, mbweeke ubo ulaakucita kuli ndimwe shibiibi isho shoonse nshaakaamba na mukamufutatile kushikila akamane kumunyonyoola kuswa mucishi cibotu cino ncaakamupa.

¹⁶ Na mukabule kulama cipangano ca Mwaami Lesa ico Mwaami Lesa mwiine ncaakamwaambila ayi mulame, akutalika kusebensela balesa bamwi akubalambila, Mwaami Lesa ulaakukalala akumupa mulandu, cakwaamba ayi mulaakumanamobo lyeeli mucishi cibotu cino ncaakamupa.”