Joshuwa 22 - Baibo Busansulushi Bwa Libuku Ili

Mikowa ya kwicwe mboyakaboolela kumishaabo

¹ Lyalo Joshuwa wakeeta bamumukowa wakwe Lubeni, Gadi alimwi amusa wa mukowa wakwe Manase.

² Wakabaambila ayi, “Mwakacita shoonse Mose, musebenshi wa Mwaami Lesa, nshaakaamba alimwi mwakanyumfwila mushintu shoonse nshendakaamba.

³ Caba ciindi cilaamfu kushikila asunu, tamukwe kushiyawo kale bamakwabanu bene Isilaeli. Sombi mwakalinga kubikite maano kucita kweelana ashakaamba Mwaami Lesa, Lesa wanu.

⁴ Ono mbocacanika ayi Mwaami Lesa, Lesa wanu wapa bamakwabanu luumuno kweelana ambwaakashomesha, amuboolele kumishaanu mucishi cakamupa Mose, musebenshi wa Mwaami Lesa, kwicwe lya Mulonga wa Joodani.

⁵ Ono mulyeelete kulama milawo amilasho yakamupa Mose, musebenshi wa Mwaami Lesa, wakwaamba ayi, ‘Musune Mwaami Lesa, Lesa wanu, mucite kuyanda kwakwe, mukonkele milawo yakwe, mushomeke alimwi mumusebensele camoyo woonse alimwi abuumi bwanu boonse.’ ”

⁶ Mpomunyaawo Joshuwa wakabapa coolwe akubaambila ayi banooya. Mpeeke abalo bakaya kumishaabo.

⁷ Mose wakapa musa umwi wa mukowa wakwe Manase cishi muBashani, awalo umwi Joshuwa wakaupa cishi kumbo lya Joodani pantu pomwi abamakwababo bamwi bene Isilaeli. Joshuwa ndyaakamana kubaambila ayi baye kumishaabo, wakabapa coolwe akwaamba ayi,

⁸ “Amuboolele kumishaanu abuboni bwanu buunji, nkokwaamba ayi matanga anene ashifubwa, silifa, golodi, bulonse, nshimbi alimwi ashakufwala shiinji. Shintu nshemwakasaala kubalwani, mubaane abamakwabanu.”

⁹ Mpeeke bamumukowa wakwe Lubeni, Gadi alimwi amusa wa mukowa wakwe Manase bakaboolela kumishaabo. Bakashiya bene Isilaeli bamwi boonse kuShilo mucishi ca Kenani akuboolela kuGilyadi cishi cabo beene ico cakabapa Mwaami Lesa kwiinda muli Mose.

Mbobakayaka cipaililo kufwaafwi aJoodani

¹⁰ Ono ndibakashika kuGeliloti, pafwaafwi aMulonga wa Joodani mucishi ca Kenani, bamumukowa wakwe Lubeni, Gadi alimwi amusa wa mukowa wakwe Manase bakayaka cipaililo cinene alimwi cibotu abuumbi mweela Mulonga wa Joodani.

¹¹ Bene Isilaeli bamwi boonse bakanyumfwa ayi bakayaka cipaililo kulubasu lwabo mumanyinsa a Kenani kuGeliloti pafwaafwi aJoodani.

¹² Mpeeke bene Isilaeli bamwi boonse bakabungana kuShilo ayi bakaye bakabalwaane.

¹³ Mpomunyaawo bakatuma Fineyasi, mwanaakwe Eliyasa mupailishi, kuGilyadi kwakalinga bamumukowa wakwe Lubeni, Gadi alimwi amusa wa mukowa wakwe Manase.

¹⁴ Fineyasi wakaya abamatanjilili ba mikowa iyo yakacaala kumbo bali likumi. Boonse womwi awomwi kaaimikanina bamuŋanda ya bamushipani sha bene Isilaeli.

¹⁵ Lyalo ndibakashika kuGilyadi kubamumukowa wakwe Lubeni, Gadi alimwi amusa wa mukowa wakwe Manase, bakabaambila ayi,

¹⁶ “Likoto lya Mwaami Lesa limwi lyoonse lyaamba ayi, ‘Ino mwasowa buyani lushomo kuli Lesa wa bene Isilaeli munshila iyi? Mwaashukila Mwaami Lesa kwiinda mukuliyakila cipaililo ici, alimwi mwapambuka munshila yakwe.

¹⁷ Sa anu cibiibi cakacitwa kuPeyo cakaceya? Sa te Mwaami Lesa wakatupa mulandu kwiinda mukututumina mwaalu? Nakubi boobo abobulya tatuna kulisalasha kucibiibi cilya, sobwe.

¹⁸ Sa alimwi mutooyanda kufutatila Mwaami Lesa? Na mumwaashukile sunu, ciilo mabala ulaakunyonyoola bantu bakwe boonse bene Isilaeli.

¹⁹ Na cishi ncemwakapekwa tacisalalite kwaamba ayi inga tamukoonshi kulambililaamo, amuye mucishi ca Mwaami Lesa umo muli Tente ya Cipangano, tulaakwaabana misena. Ncibiibi kwaashukila Mwaami Lesa, pantu pomwi aswebo kwiinda mukuliyakila cipaililo nobeene citeshi ca Mwaami Lesa, Lesa wesu.

²⁰ Amwiibaluke cakacitika Akani mwanaakwe Sela ndyaakasotoka mulawo wakapekwa pashintu shakaambwa ayi shilyeelete kunyonyooka. Sa te Lesa wakakalalila likoto lyoonse lya bantu bakwe bene Isilaeli? Ncakwiila Akani teshi ngowakafwa eenka ceebo ca cibiibi cilya.’ ”

²¹ Mpeeke ba mumukowa wakwe Lubeni, Gadi alimwi amusa wa mukowa wakwe Manase wa kwicwe bakakumbula bamatanjilili ba mikowa ya bene Isilaeli yakacaala kumbo ayi,

²² “Shinkusu shoonse Ulya nguLesa alimwi nguMwaami Lesa! Shinkusu shoonse Ulya nguLesa alimwi nguMwaami Lesa! Ulishi ncetwacitila bobulya, abalo bene Isilaeli bamwi boonse abeshibe! Na ncakwiila twacita ceeci mubwaashu nabi mukutanyumfwila Mwaami Lesa, sunu lyeenka mutumaneewo.

²³ Na twaliyakila cipaililo sobeene ayi tufutatile Mwaami Lesa, alimwi ayi tunoobengelaawo milambu yakutenta, shipo sha fulaulo, nabi milambu ya bwanabwankashi, Mwaami Lesa mwiine atupe mulandu.

²⁴ “Ono tabwishi mbocibete ubo! Swebo ncetwakacitila bobulya nkuloonda kwaamba ayi bamulunyungu lwanu inga batalika kwaamba kubeesu ayi, ‘Ino mwebo muliiko lubasunshi kuMwaami Lesa, Lesa wa bene Isilaeli?

²⁵ Amubone Mwaami Lesa wakabika Mulonga wa Joodani ayi ibe nyinsa pakati kesu amwebo nobamumukowa wakwe Lubeni alimwi anobakwe Gadi. Nkokwaamba ayi tamucite lubasu kuMwaami Lesa, sobwe.’ Munshila iyo bamulunyungu lwanu inga balengesha beesu kucileka kulambila Mwaami Lesa.

²⁶ Aboobo twakayaka cipaililo ici kuteshi ayi tunootentelaawo milambu nabi kupetaawo shipo,

²⁷ sombi ayi cibe kamboni pakati kesu amwebo alimwi abaabo beshi bakabeeko kunembo, kwaamba ayi tulaakunoolambila Mwaami Lesa kumusena wakwe usalalite akuleta nkuko milambu yakutenta, milambu imwi alimwi aya bwanabwankashi. Lyalo kunembo bamulunyungu lwanu teshi bakanokwaambila beesu ayi, ‘Tamubeteko lubasu kuMwaami Lesa.’

²⁸ Anu twakayeeya ayi na bakaambe boobo, bamulunyungu lwesu balakwaambabo ayi, ‘Amubone! Bamashali bakulukulu bakayaka cipaililo cikoshenye aca Mwaami Lesa. Tabakwe kuciyakila kubengelaawo milambu yakutenta nabi milambubo imwi, sombi ayi cibe kamboni pakati kesu amwebo kwaamba ayi aswebo tuli bantu bakwe Lesa.’

²⁹ Ono tatutookwaashukila Mwaami Lesa nabi kumufutatila napaceyi kwiinda mukuliyakila cipaililo ayi tunoobengelaawo milambu yakutenta, shipo sha fulaulo alimwi amilambubo imwi, kuleka ceeco ca Mwaami Lesa, Lesa wesu, ico ciyakitwe kunembo lya Tente yakwe ya Cipangano.”

³⁰ Fineyasi mupailishi abamatanjilili ba likoto lya bene Isilaeli, nkokwaamba ayi bamatanjilili ba shipani shabo, ndibakanyumfwa cakaamba bamumukowa wakwe Lubeni, Gadi alimwi amusa wa mukowa wakwe Manase, bakasangalala abuumbi.

³¹ Mpeeke Fineyasi mwanaakwe Eliyasa mupailishi wakabaambila ayi, “Sunu tweshiiba ayi Mwaami Lesa uli aswebo mukwiinga tamukwe kucita ceeci mukufutatila Mwaami Lesa. Anu bulya bene Isilaeli mwabafuna kuswa kubukali bwa Mwaami Lesa.”

³² Mpomunyaawo Fineyasi mwanaakwe Eliyasa mupailishi abamatanjilili abo, bakapansaana abene Lubeni abene Gadi abo mbobakalinga kucitaabo libungano mucishi ca Gilyadi, akuboolela kuKenani kubene Isilaeli bamwi akuluula mbobakeenda.

³³ Bene Isilaeli ndibakanyumfwa mbobakeenda, myoyo yakekala alimwi bakalumbaisha Lesa. Kuswawaawo tabakwe kucaambawo tubili cakuya mukulwana bene Lubeni abene Gadi alimwi akunyonyoola cishi umo mobakalinga kwikala.

³⁴ Mpeeke cipaililo ico bakacitumba ayi, “Kamboni” ceebo bene Lubeni abene Gadi bakaamba ayi, “Cipaililo ici citooba kamboni pakati kesu amwebo kwaamba ayi Mwaami Lesa, ngoLesa wesu.”