Joshuwa 21 - Baibo Busansulushi Bwa Libuku Ili

Mandabala a bene Lefi

¹ Mpeeke bamatanjilili ba bamumaanda a bene Lefi bakaya kuli Eliyasa mupailishi, Joshuwa mwanaakwe Nani alimwi akubamatanjilili ba bamumaanda a mikowa imwi ya bene Isilaeli

² kuShilo mucishi ca Kenani akwaamba ayi, “Mwaami Lesa wakaamba kwiinda muli Mose ayi mukatupe mandabala akwikalaamo pantu pomwi amafulo ashifubwa shesu.”

³ Aboobo kweendelana abwakaamba Mwaami Lesa, bakabapa mandabala anene amwi pantu pomwi amafulo kuswa mucishi abamwi caabo.

⁴ Bakapekwa mandabala kutaanguna mbene Lefi ba mucipani cakwe Kowati. Lyalo bene Lefi abo bakalinga bamulunyungu lwakwe Aloni mupailishi, bakapekwa mandabala ali likumi aotatwe kuswa kucishi cakwe Juda, Simyoni alimwi acakwe Benjameni.

⁵ Bakacaalaawo mucipani cakwe Kowati bakapekwa mandabala ali likumi kuswa mucishi ca mukowa wakwe Efuleemu, Dani alimwi aca musa wa mukowa wakwe Manase.

⁶ Bamulunyungu lwakwe Geshoni bakapekwa mandabala ali likumi aotatwe kuswa mucishi ca mukowa wakwe Isaka, Asha, Nafutali alimwi aca musa wa mukowa wakwe Manase mucishi ca Bashani.

⁷ Bamumaanda a bamucipani cakwe Melali bakapekwa mandabala ali likumi aobilo kuswa mucishi ca mukowa wakwe Lubeni, Gadi alimwi aca mukowa wakwe Sebuluni.

⁸ Mboboobo bene Isilaeli mbobakapa mandabala anene bene Lefi kwiinda mukuuma cisolo pantu pomwi amafulo a ngawo kweelana abwakaamba Mwaami Lesa kwiinda muli Mose.

⁹ Ono ngaaya meena a mandabala anene ayo bene Juda aSimyoni ngobakapa

¹⁰ bamulunyungu lwakwe Aloni, abo bakalinga ba mucipani cakwe Kowati mwine Lefi. Mukowa wabo ngoutaanshi kuwitwa cisolo mukupekwa mandabala.

¹¹ Bakabapa ndabala inene ya Kilyati Aaba ili mucishi ca tulundu ca Juda, iyo iitwa ayi Ebuloni bulya pantu pomwi amafulo akalinga kwiishingulukite. Aaba wakalinga ishi Anaki.

¹² Nakubi boobo myuunda amishi yakalinga kwiishingulukite kabali bakapa kale Kalebu mwanaakwe Jefune ayi njaakwe.

¹³ Ono bamulunyungu lwakwe Aloni mupailishi bakabapa Ebuloni, ndabala yomwi ya aayo akulobokelaako kuwooyo wacaya muntu mumapuso, Libuna,

¹⁴ Jateya, Eshitemowa,

¹⁵ Oloni, Debe,

¹⁶ Aini, Juta alimwi aBeti Shemeshi pantu pomwi amafulo a ngawo. Akalinga mandabala anene osanwe aone akaswa kumukowa wakwe Juda awakwe Simyoni.

¹⁷ Kuswa kucishi ca mukowa wakwe Benjameni bakabapa ndabala ya Gibyoni, Geba,

¹⁸ Anatoti alimwi aya Alimoni pantu pomwi amafulo a ngawo. Mandabala anene ayo akalinga one.

¹⁹ Mandabala anene oonse a bapailishi, nkokwaamba ayi bamulunyungu lwakwe Aloni, akalinga likumi aotatwe pantu pomwi amafulo a ngawo.

²⁰ Bamumaanda a bamucipani cakwe Kowati mwine Lefi, abo bakacaalaawo, bakapekwa mandabala kuswa mumukowa wakwe Efuleemu.

²¹ Mucishi ca tulundu ca mukowa wakwe Efuleemu bakapekwa ndabala ya Shekemu, ndabala yomwi ya aayo akulobokelaako kuwooyo wacaya muntu mumapuso, aya Gesa,

²² Kibisaimu, aBeti Oloni pantu pomwi amafulo a ngawo. Mandabala anene ayo akalinga one.

²³ Mucishi ca mukowa wakwe Dani bakapekwa ndabala ya Eliteke, Gibetoni,

²⁴ Aijaloni alimwi aya Gati Limoni pantu pomwi amafulo a ngawo. Mandabala anene ayo akalinga one.

²⁵ Mucishi ca musa wa mukowa wakwe Manase, bakapekwa ndabala ya Taanaki alimwi aya Gati Limoni pantu pomwi amafulo a ngawo. Mandabala anene aya akalinga obilo.

²⁶ Ayo ngomandabala anene likumi akapekwa a bamumaanda a bamucipani cakwe Kowati abo bakacaalaawo.

²⁷ Bene Lefi abamwi bamucipani cakwe Geshoni, mucishi ca musa wa mukowa wakwe Manase nkocibetele kwicwe, bakapekwa ndabala ya Golani mucishi ca Bashani, ndabala yakulobokelaako kuwooyo wacaya muntu mumapuso, alimwi aya Be Eshitala pantu pomwi amafulo a ngawo. Mandabala anene ayo akalinga obilo.

²⁸ Mucishi ca mukowa wakwe Isaka bakapekwa ndabala ya Kishiyoni, Dabelati,

²⁹ Jamuti alimwi aya Eni Ganimu pantu pomwi amafulo a ngawo. Mandabala anene ayo akalinga one.

³⁰ Mucishi ca mukowa wakwe Asha bakapekwa ndabala ya Mishali, Abudoni,

³¹ Elikati alimwi aya Lewobu pantu pomwi amafulo a ngawo. Mandabala anene ayo akalinga one.

³² Mucishi ca mukowa wakwe Nafutali bakapekwa Kedeshi, ndabala yakulobokelaako kuwooyo wacaya muntu mumapuso, iyo yakalinga mucishi ca Galili, Amoti, Doli alimwi aya Katani pantu pomwi amafulo a ngawo. Mandabala anene ayo akalinga otatwe.

³³ Mandabala anene oonse a bamumaanda a bamucipani cakwe Geshoni akalinga likumi aotatwe pantu pomwi amafulo a ngawo.

³⁴ Cipani cakwe Melali, nkokwaamba ayi bene Lefi bakacaalaawo, bakapekwa ndabala ya Jokoneyamu, Kaata,

³⁵ Dimuna alimwi aya Naalali pantu pomwi amafulo a ngawo. Mandabala anene ayo akalinga one.

³⁶ Mucishi ca mukowa wakwe Lubeni bakapekwa ndabala ya Besa, Jaasi,

³⁷ Kedemoti alimwi aya Mefaati pantu pomwi amafulo a ngawo. Mandabala anene ayo akalinga one.

³⁸ Mucishi ca mukowa wakwe Gadi bakapekwa ndabala ya Lamoti, iyo yakalinga muGilyadi, ndabala yakulobokelaako kuwooyo wacaya muntu mumapuso, Maanaimu,

³⁹ Eshiboni alimwi aya Jasa pantu pomwi amafulo a ngawo. Mandabala anene ayo akalinga one oonse pantu pomwi.

⁴⁰ Nkokwaamba ayi mandabala anene oonse akapekwa bamumaanda a bamucipani cakwe Melali akalinga likumi aobilo.

⁴¹ Mandabala anene a bene Lefi akaba mukati mucishi ca bene Isilaeli akalinga makumi one, osanwe alimwi aotatwe pantu pomwi amafulo a ngawo.

⁴² Ndabala yomwi ayomwi yakalinga kucite mafulo akalinga kwiishingulukite, nkokwaamba ayi oonse mbwaakalinga ubo.

Bene Isilaeli mbobakatalika kwikala mucishi cabo

⁴³ Munshila iyo Mwaami Lesa wakapa bene Isilaeli cishi coonse ico ncaakalinga washomesha cakulumbila kubamashali babo bakulukulu. Mpeeke bakatalika kwikalaamo.

⁴⁴ Mwaami Lesa wakabapa luumuno koonse koonse kweelana mbwaakashomesha cakulumbila kubamashali babo bakulukulu. Taaku mulwani wabo nabi womwi wakakonsha kubakoma. Mwaami Lesa wakaaba balwani boonse mumaansaabo ayi babakoome.

⁴⁵ Ono taaku nabi comwi pasheesho Mwaami Lesa nshaakashomesha bene Isilaeli shakaala, sombi shoonse shakacitika kweelana ambwaakashomesha.