Joshuwa 20 - Baibo Busansulushi Bwa Libuku Ili

Mandabala anene akulobokelaamo

¹ Lyalo Mwaami Lesa wakaambila Joshuwa ayi,

² “Ambila bene Isilaeli ayi basale mandabala anene akulobokelaamo, kweelana ambondakamulwiita kwiinda muli Mose,

³ kwaamba ayi na muntu wacaya mubye mumapuso, kuteshi kashanga, walobokela nkuko mukulifuna kumuntu uyo weelete kuboosha cishole.

⁴ Na walobokela kundabala inene yomwi paayo, ulyeelete kwiimikana pamwinjililo wa njiyo akusansulwita bamaloba ba mundabala iyo mulandu wakwe. Lyalo balyeelete kumutambula mundabala yabo akumupa musena pakwikala.

⁵ Na shikuboosha cishole wamukonkela uko, bantu ba mundabala iyo tabeelete kwaaba shikufunwa mumaansaakwe ayi amucaaye. Sombi balyeelete kumufuna mukwiinga taakwe kucita kashanga kucaya mubye alimwi kuteshi mumfundilishi.

⁶ Ulyeelete kwikala mundabala iyo kushikila woomboloshekwa capatuba kubeshinkuta alimwi kushikila mupailishi munene uliiwo ico ciindi wafwa. Lyalo inga wapiluka kundabala njaakalobokaako.”

⁷ Aboobo kumbo lya Joodani bakasala ndabala ya Kadeshi muGalili mucishi ca tulundu cakwe Nafutali, Shekemu mucishi ca tulundu cakwe Efuleemu, Kilyati Aaba nabi ayi Ebuloni mucishi ca tulundu cakwe Juda.

⁸ Kwicwe lya Joodani, mucitunta ca muluyanga, kwicwe lya Jeliko, bakasala Besa mucishi ca mukowa wakwe Lubeni, Lamoti muGilyadi mucishi ca mukowa wakwe Gadi alimwi aGolani muBashani mucishi ca mukowa wakwe Manase.

⁹ Ayo ngomandabala anene akulobokelaako, ngobakasalila bene Isilaeli pantu pomwi abaswamashi bakalinga kwikala pakati kabo, kwaamba ayi uyo woonse weenga wacaya umwi mumapuso, walobokela nkuko ayi afunwe kumuntu uyo weelete kuboosha cishole. Taakalinga kucaikwa kushikila woomboloshekwa capatuba abeshinkuta.