Joshuwa 2 - Baibo Busansulushi Bwa Libuku Ili

Joshuwa mbwaakatuma beshikusensa muJeliko

¹ Mpomunyaawo Joshuwa wakatuma beshikusensa bobilo cabushishi kuswa kuShitimu ayi baye bakasense cishi ca Kenani, bunene bunene ndabala inene ya Jeliko. Ndibakashika mundabala iyo, bakaya mukwikala muŋanda ya mwanakashi mufuule wiitwa ayi Laabu.

² Ono mwaami wa kuJeliko wakanyumfwa ayi basankwa bamwi bene Isilaeli besa mashiku ayo mukusensa cishi.

³ Paceebo ceeci wakatumya maswi kuli Laabu ayi, “Basankwa abo bali muŋanda yako besa mukusensa cishi coonse. Aboobo bakushe bese kokuno!”

⁴ Sombi mwanakashi paciindi ici kaali wabashisa kale boonse bobilo. Mpeeke wakakumbula ayi, “Ncakwiila basankwa bobilo bakesa kuli ndime, sombi nshikwe kwishiba nkobakaswa.

⁵ Macolesha, paciindi cakucala mwinjililo wa ndabala, basankwa abo bakaya. Nkobakalanga nshishiiko. Ono amufwambaane mubakonkele, mpashi inga mwabeensha.”

⁶ Anu wakabashisa paciluli panshi lya shishiko sha butonje nshaakayala apo.

⁷ Mpeeke bantu ba mwaami bakatalika kukonkela beshikusensa, akulanga kunshila iya pamisena yakusubukilawo Mulonga wa Joodani. Ndibakaswabo, amwinjililo wa ndabala bakoocala.

⁸ Ono beshikusensa kabatana koona, Laabu wakatanta paciluli

⁹ akubaambila ayi, “Ndishi ayi Mwaami Lesa wakamupa cishi cino. Boonse bantu bekala mucishi cino baliloondete abuumbi ceebo ca ndimwe.

¹⁰ Twakanyumfwa mbuli Mwaami Lesa mbwaakayumya Lweenge Lusalala ayi musubuke paciindi ndimwakalinga kuswa mucishi ca Ijipiti. Twakanyumfwa ambomwakacaya Sioni aOgi, bamaami bobilo ba bene Amoli kwicwe lya Mulonga wa Joodani.

¹¹ Nditwakanyumfwa shikani ishi, soonse twakaloonda abuumbi ceebo ca ndimwe. Ncakwiila Mwaami Lesa, Lesa wanu, nguLesa wa kwiculu alimwi apacishi ca panshi.

¹² Pacecino ciindi, ndamusenga ayi mushomeshe cakulumbila muliina lya Mwaami Lesa ayi mulaakunyumfwila nkumbu bamakwesu bweenka mbondamucitila, alimwi mumpe cishibilo cakwaamba ayi

¹³ mulaakupulusha bata abama, bamakwesu lifumo lyomwi alimwi abamumaandaabo boonse. Mutakatuleeki ayi tucaikwe!”

¹⁴ Basankwa abo bobilo bakamwaambila ayi, “Na tukabule kucita kweelana mbotwaamba, ncibotu Mwaami Lesa akacaye ndiswe! Na awebo ukabule kwaamba nshetutoocita, tulaakushomeka akukunyumfwila nkumbu na Mwaami Lesa akatupe cishi cino.”

¹⁵ Lyalo Laabu wakabakushisha pambwelyo kabacatite kuntambo, ceebo ŋanda njaakalinga kwikalaamo yakalinga kucatenebo alubumbu lwa ndabala inene iyo.

¹⁶ Wakabaambila ayi, “Amuye mutulundu ceebo bantu ba mwaami abo batooya cimuyandoola inga bamucana. Muyube nkomunya uko kwanshiku shotatwe kushikila bakaboole. Kuswawaawo ndyeshi mukanooya.”

¹⁷ Abalo bakamwaambila ayi, “Tulaakucita kweelana ambotwashomesha cakulumbila.

¹⁸ Ono mbweshi ukacite mbulya: Na tukashike mucishi cino, ukaange kasani kasalala aka pambwelyo njewatukushishaawo. Ukalete baiso, banyoko abamakwanu lifumo lyomwi boonse muŋanda ino.

¹⁹ Na umwi akaswe muŋanda akuya pansengwe, ulaakulicaisha kashanga mwiine, swebo teshi tukabeeko lubasu. Sombi na umwi ngweshi ukanoolyaakwe muŋanda akacisikwe, uyo ulaakuba mulandu wesu.

²⁰ Nakubi boobo na ukalwiite muntu nabi womwi ishi nshetutoocita, teshi tukacite kweelana ambotwashomesha cakulumbila.”

²¹ Alakwe wakakumbula ayi, “Canyumfwika, acibe bweenka mbomwaamba.” Mpeeke bakalashanya, basankwa balya bakakumbuluka, kabaya. Lyalo Laabu wakaanga kasani kasalala kalya pambwelyo.

²² Beshikusensa bakaya mutulundu bayuba kwanshiku shotatwe, kushikila bantu ba mwaami balema kuyandoola muya nshila, baboolamobo kutabacana.

²³ Lyalo beshikusensa bobilo balya bakatalika kuboola. Bakaswa mutulundu akusubuka Mulonga wa Joodani akwisa kuli Joshuwa uyo ngobakalwiita shoonse shakabacitikila.

²⁴ Bakaambila Joshuwa ayi, “Ncalushinisho Mwaami Lesa watupa cishi coonse. Bantu boonse kulya baliloondete abuumbi ceebo ca ndiswe.”