Joshuwa 18 - Baibo Busansulushi Bwa Libuku Ili

Cishi cakacaalaako mbocakabaanishikwa

¹ Mpomunyaawo bene Isilaeli boonse bakabungana kuShilo alimwi akuyaka Tente ya Cipangano nkomunya uko. Cishi bakacibwesa,

² sombi kwakalinga kwacaala mikowa yosanwe ayobilo ya bene Isilaeli iyo itana kupekwa cishi cinebo.

³ Paceebo ceeci Joshuwa wakaambila bene Isilaeli ayi, “Ino mutoolindila ciindi cilaamfu buyani kamutana kuya mukubwesa cishi ico Mwaami Lesa, Lesa wa bamashali banu bakulukulu ncaakamupa?

⁴ Amusale basankwa botatwe kuswa mumukowa womwi awomwi. Ntoobatuma mukubona akulemba mbuli cishi mbocibete, kweelana amikowa mpoyasuna kubwesa cishi cinebo. Kuswawaawo balaakuboola kuli ndime.

⁵ Mulyeelete kwaabanya cishi mushipansha shili shosanwe ashobilo. Bene Juda balyeelete kucaala mweenka mucishi cabo kulubasu lwakumalenge, abalo bamulunyungu lwakwe Josefu mucishi cabo ca kulubasu lwakumatwa.

⁶ Mwaakumana kulemba mbuli shipansha shosanwe ashobilo sha cishi mboshibete, mukandetele. Lyalo ndaakuuma cisolo mukumwiipushishaako kuMwaami Lesa, Lesa wesu.

⁷ Nacibi boobo bene Lefi balo teshi bakapekwewo cishi cinebo mbuli ndimwe noonse, mukwiinga cipansha cabo nkusebensela Mwaami Lesa mulimo wa bupailishi. Mukowa wakwe Gadi, Lubeni alimwi amusa wa mukowa wakwe Manase bakapekwa kale cishi cinebo kwicwe lya Mulonga wa Joodani, ico cakabapa Mose musebenshi wa Mwaami Lesa.”

⁸ Ono basankwa abo ndibakanyamuka ayi baye mukupima cishi ico mbocibete, Joshuwa wakabapa mulasho uyu ayi, “Kamuya mukabone akulemba mbuli cishi mbocibete. Kuswawaawo mukaboole kuli ndime kwaamba ayi nkoome cisolo kuno kuShilo mukumwiipushishaako kuMwaami Lesa.”

⁹ Mpeeke bakanyamuka akuya mucishi coonse. Bakalemba palibuku mbuli mbocakalinga, ndabala andabala mushipansha shosanwe ashobilo. Ndibakamanisha, bakaboola kuli Joshuwa kumisumba yabo kuShilo.

¹⁰ Lyalo Joshuwa wakooma cisolo mukubeepushishaako kuMwaami Lesa. Mpomunyaawo cishi ico wakacibaanya bene Isilaeli bakacaalaawo kweelana amikowa yabo.

Cishi cakapekwa bene Benjameni

¹¹ Mukowa wakwe Benjameni ngowakataanguna kupekwa cishi cinebo, kweelana ashipani shabo kwiinda mukuuma cisolo. Bakapekwa cishi cakalinga pakati ka mukowa wakwe Juda awakwe Josefu.

¹² Kulubasu lwakumatwa, nyinsa yabo yakatalikila kuMulonga wa Joodani, kuya kunkunamo ya Jeliko kulubasu lwakumatwa, njeeyo kumbo kucishi ca tulundu kuya mukushika muluyanga lwa Beti Afeni.

¹³ Kuswa kooko yakaya kunkunamo ya Lusi, nabi ayi Betelo, alimwi akukunkuluka kuya kuAtaloti Ada pakalundu kulubasu lwakumalenge lya Beti Oloni wa munkunamo.

¹⁴ Kuswa kukalundu kalangene aBeti Oloni kulubasu lwakumalenge, nyinsa yakaboola kumalenge kwiinda kulubasu lwakumbo akuya kuKilyati Baali, nabi ayi Kilyati Jeyalimu, ndabala inene ya bene Juda. Iyo yakalinga njenyinsa yakumbo.

¹⁵ Nyinsa ya kulubasu lwakumalenge yakatalikila kweela Kilyati Jeyalimu kulubasu lwakumbo akuya kutuntupu twa Nefutowa.

¹⁶ Yakakunkuluka kuya munshaakalundu kalangene aCinyika ca Inomu, kumatwa lya Cinyika ca Lefaimu. Lyalo yakatolelela kuya muCinyika ca Inomu kwiinda kunkunamo ya ndabala inene ya bene Jebusi tibili akuEni Logeli.

¹⁷ Lyalo yakapetukila kumatwa akuya kuEni Shemeshi, njeeyo kundabala ya Geliloti iyo ibambene amwinjililo wa Adumimu kuya kuLibwe lyakwe Bowani mwanaakwe Lubeni.

¹⁸ Mpeeke yakatolelela kunkunamo ya Beti Alaba kulubasu lwakumatwa tibili kuCinyika ca Joodani.

¹⁹ Kuswa kooko nyinsa yakalanga kunkunamo ya Beti Ogila kulubasu lwakumatwa, akwisa mukweela kunsangano ya Lweenge lwa Mwiinyo alimwi aMulonga wa Joodani kulubasu lwakumalenge. Nyinsa iyi yakalinga kumalenge.

²⁰ Kulubasu lwakwicwe, Mulonga wa Joodani wakalinga ngomanyinsa. Anu aya akalinga ngomanyinsa mumbasu shoonse sha cishi ico cakapekwa mukowa wakwe Benjameni kweelana ashipani shabo.

²¹ Ono mandabala anene a mukowa wakwe Benjameni kweelana ashipani shabo, ngaaya. Jeliko, Beti Ogila, Emeki Kesisi,

²² Beti Alaba, Semalaimu, Betelo,

²³ Afimu, Pala, Ofula,

²⁴ Kefa Amoni, Ofini alimwi aGeba. Nkokwaamba ayi mandabala anene pantu pomwi akalinga likumi aobilo, kubikaawo amishi yakalinga kushingulukite mandabala ayo.

²⁵ Kwakalinga amandabala amwi anene, mbuli Gibyoni, Lama, Biloti,

²⁶ Misipa, Kefila, Mosa,

²⁷ Lekemu, Epilu, Talala,

²⁸ Sela, Aelefu, ndabala inene ya bene Jebusi nabi ayi Jelusalemu, Gibiya alimwi aKilyati. Nkokwaamba ayi mandabala anene pantu pomwi akalinga likumi aone kubikaawo amishi yakalinga kushingulukite mandabala ayo. Anu ici ncecishi cakapekwa kumukowa wakwe Benjameni ayi ncinebo.