Joshuwa 16 - Baibo Busansulushi Bwa Libuku Ili

Cishi cakapekwa bene Efuleemu amusa wa mukowa wa bene Manase

¹ Ono cishi cakapekwa bamulunyungu lwakwe Josefu cakalinga kutalikila kuMulonga wa Joodani pafwaafwi aJeliko, kwicwe lya tuntupu twa muJeliko, akuya mukwiinda muluyanga alimwi akushika kucishi ca tulundu ca Betelo.

² Kuswa kuBetelo cakeendilila kuya mukushika kuLusi akuya kuAtaloti mucishi ca bene Aki.

³ Lyalo cakaya mukukunkulukila kumbo kucishi ca bene Jafuleti akuya mukushika akweela cishi ca Beti Oloni wa munkunamo. Kuswa kooko cakeendilila kuya kuGesa akuya mukweela kuLweenge lwa Mediteleniyani.

⁴ Anu bamumukowa wakwe Manase alimwi awakwe Efuleemu, bamulunyungu lwakwe Josefu, bakapekwa cishi ici ayi ncinebo, kweelana ashipani shabo.

Cishi ca bene Efuleemu

⁵ Cishi ca bene Efuleemu kweelana ashipani shabo, cakalinga kucite nyinsa kuswa kuAtaloti Ada kwicwe mukushika kuBeti Oloni wa patulundu.

⁶ Yakatolelela kuya kuLweenge lwa Mediteleniyani. Kuswa kuMikimetati kulubasu lwakumatwa, yakapetuka akuya kulubasu lwa kwicwe kuTanati Shilo alimwi akwiindilila kuya kwicwe kuJanowa.

⁷ Lyalo kuswa kuJanowa, yakakunkulukila kuAtaloti alimwi akuNaala akuya mukucinka muJeliko akweela muMulonga wa Joodani.

⁸ Mpeeke nyinsa yakaswa kuTapuwa akuya kukalonga ka Kana. Lyalo yakaya mukweela muLweenge lwa Mediteleniyani. Anu ici ncecishi cakapekwa kumukowa wa bene Efuleemu ayi ncinebo kweelana ashipani shabo.

⁹ Ono mwakalinga mandabala akalinga mumanyinsa a bene Manase, sombi akabikwa palubasu ayi ngabene Efuleemu, kubikaawo amishi njebakapatula mweenka mubene Manase akubapa.

¹⁰ Sombi bene Efuleemu tabakwe kutanda bene Kenani abo bakalinga kwikala muGesa. Kushikila asunu bene Kenani balekala abene Efuleemu, sombi balasebenseshekwa anga mbasha.