Joshuwa 15 - Baibo Busansulushi Bwa Libuku Ili

Cishi cakapekwa mukowa wakwe Juda

¹ Cishi cakapekwa mukowa wakwe Juda kwiinda mushipani shabo, cakalinga kushika kucishi ca Edomu kuya kumalenge a luyanga lwa Sini.

² Nyinsa yabo kulubasu lwakumalenge yakalinga kutalikila kweela Lweenge lwa Mwiinyo kumalenge

³ akutolelela kuya kuAkilabimu alimwi akuSini. Lyalo yakaya kumalenge lya Kadeshi Baniya, kwiinda kuEsiloni kuya kuAda alimwi akupetukila kuKaaka.

⁴ Kuswa kooko yakaya mukwiinda kuAsimoni akwinjila mukalonga panyinsa ya Ijipiti akuya mukweela kuLweenge lwa Mediteleniyani. Iyi njenyinsa ya bene Juda yakalinga kulubasu lwakumalenge.

⁵ Kulubasu lwakwicwe, nyinsa yabo yakalinga kuLweenge lwa Mwiinyo kuya mukushika apenjilila Mulonga wa Joodani muli ndulo. Nyinsa yakumatwa yakatalika peenka penjilila Mulonga wa Joodani muLweenge lwa Mwiinyo

⁶ akuya kuBeti Ogila akutolelela kumatwa lya Beti Alaba tibili akulibwe lyakwe Bowani mwanaakwe Lubeni.

⁷ Lyalo kuswa kuCinyika ca Mapensho nyinsa yakeenda kuDebe. Mpeeke yakapetukila kundabala ya Gilugala kulubasu lwakumatwa, iyo ibambene amwinjililo wa Adumimu kumalenge a cinyika ici. Yakatolelela kuya kutuntupu twa Eni Shemeshi akucinka muEni Logeli.

⁸ Kuswa kooko yakaya kuCinyika ca Beni Inomu akwiinda kunkunamo ya ndabala inene ya bene Jebusi iitwa ayi Jelusalemu kulubasu lwakumalenge. Mpeeke yakatolelela akuya mukwiinda pakalundu kaniini kumbo lya Cinyika ca Inomu, kweela Cinyika ca Lefaimu kumatwa.

⁹ Ndiyakaswa pakalundu kaniini apo, yakalanga kutuntupu twa Nefutowa akwiinda mumandabala anene a kuKalundu ka Efuloni alimwi akukunkuluka kuya kuBaala nabi ayi Kilyati Jeyalimu.

¹⁰ Lyalo yakapetuka kuswa kuBaala akulanga kumbo kuKalundu ka Siya, kuya kumatwa lya nkunamo ya Kalundu ka Jeyalimu nabi ayi Kesaloni. Lyalo yakatolelela kuBeti Shemeshi alimwi aTimuna.

¹¹ Kuswa kooko nyinsa yakaya kunkunamo ya Ekiloni, kupetukila kuShikeloni akulanga kuKalundu ka Baala alimwi akucinka kuJabunilu. Anu nyinsa yakaya mukweela kuLweenge lwa Mediteleniyani.

¹² Nyinsa ya kulubasu lwakumbo ndoombe lwa Lweenge lwa Mediteleniyani. Anu aya akalinga ngomanyinsa acishi ca mukowa wakwe Juda mushipani shabo.

Kalebu mbwaakakoma Ebuloni alimwi aDebe

¹³ Ono kweelana aMwaami Lesa mbwaakaambila Joshuwa, cipansha cimwi cakwe Juda wakacipa Kalebu mwanaakwe Jefune. Wakapekwa cishi ca Kilyati Aaba nabi ayi Ebuloni. Aaba wakalinga ishi Anaki.

¹⁴ Mpeeke Kalebu wakatanda bamulunyungu lwakwe Anaki botatwe kuswa mundabala inene ya Ebuloni. Wakatandamo Sheshayi, Ayimani alimwi aTalimayi, bamulunyungu lwakwe Anaki.

¹⁵ Kuswawaawo wakaya mukukoma bantu bakalinga kwikala mundabala ya Debe iyo yakalinga kwiitwa ayi Kilyati Sefa kalekale.

¹⁶ Mpeeke Kalebu wakaamba ayi, “Uyo weshi akakome Kilyati Sefa ndaakumupa mwanaangu Akisa ayi eebe.”

¹⁷ Mpeeke Otiniyelo mwanaakwe Kenasi mukwabo Kalebu wakakoma ndabala inene iyo, alakwe Kalebu wakeebesha Akisa mwanaakwe kuli nguwe.

¹⁸ Ono bushiku bwa bwiinga Otiniyelo wakaambila mukaakwe ayi asenge muunda kuli baishi. Ingayi mwanaakwe aseluke pambongolo, Kalebu wakeepusha ncaakalinga kusuni.

¹⁹ Mwanaakwe wakakumbula ayi, “Ndisuni lucafwo kuli ndimwe. Cishi ncemwakampa cili muluyanga lwakumalenge, ono amumpe atuntupu.” Aboobo Kalebu wakamupa tuntupu twa peculu atwa munshi.

Mandabala anene a bene Juda

²⁰ Ono ici ncishi cakapekwa mukowa wakwe Juda ayi ncinebo kweelana ashipani shabo.

²¹ Anu mandabala anene akalinga kumalenge lya Edomu kwiine ngobakapekwa nguKabisilu, Eda, Jaga,

²² Kina, Dimona, Adada,

²³ Kedeshi, Asoli, Itinani,

²⁴ Sifu, Telemu aBiloti.

²⁵ Kubikaawo aAsoli Adata, Kelyoti Esiloni nabi Asoli,

²⁶ Amamu, Shema, Molada,

²⁷ Asa Gada, Eshimoni, Beti Peleti,

²⁸ Asa Shualu, Biyasheba, Bishiyotya,

²⁹ Baala, Iimu, Esemu,

³⁰ Elitoladi, Kesilu, Oma,

³¹ Sikilagi, Madimana, Sansana,

³² Lebaoti, Shilimu, Aini alimwi aLimoni. Nkokwaamba ayi mandabala anene pantu pomwi akalinga makumi obilo aosanwe alimwi aone kubikaawo amishi yakalinga kushingulukite mandabala ayo.

³³ Ono mandabala anene akalinga kutulundu tuniininiini twakumbo nguEshitaoli, Sola, Ashina,

³⁴ Sanowa, Eni Ganimu, Tapuwa, Enamu,

³⁵ Jamuti, Adulamu, Soko, Aseka.

³⁶ Kubikaawo aShalaimu, Aditaimu, Gedela alimwi aGedelotaimu. Nkokwaamba ayi mandabala anene pantu pomwi akalinga likumi aone kubikaawo amishi yakalinga kushingulukite mandabala ayo.

³⁷ Amwi nguSenani, Adasha, Migidalugadi,

³⁸ Dilini, Misipa, Jokiteli,

³⁹ Lakishi, Bosikati, Egiloni,

⁴⁰ Kaboni, Laamasi, Kitilishi,

⁴¹ Gedeloti, Beti Dagoni, Nama alimwi aMakeda. Nkokwaamba ayi mandabala anene pantu pomwi akalinga likumi aosanwe alimwi ayomwi kubikaawo amishi yakalinga kushingulukite mandabala ayo.

⁴² Kwakalinga aamwi mandabala Libuna, Eta, Ashani,

⁴³ Ifuta, Ashina, Nesibu,

⁴⁴ Keila, Akisibu alimwi aMalesha. Nkokwaamba ayi mandabala anene pantu pomwi akalinga osanwe aone kubikaawo amishi yakalinga kushingulukite mandabala ayo.

⁴⁵ Mwakalinga aEkiloni pantu pomwi amishi ya njiyo.

⁴⁶ Mwakalinga amandabala amwi oonse akalinga pafwaafwi aAshidodi, kutalikila kuEkiloni kuya mukweela kuLweenge lwa Mediteleniyani.

⁴⁷ Nkokwaamba ayi Ashidodi alimwi aGasa pantu pomwi amishi ya ngawo, kuswa kuCinyika ca Ijipiti kuya mukweela muLweenge lwa Mediteleniyani.

⁴⁸ Mucishi ca tulundu amwalo mwakalinga Shamiya, Jateya, Soko,

⁴⁹ Dana, Kilyati Sana nabi Debe,

⁵⁰ Anabu, Eshitemowa, Animu,

⁵¹ Gosheni, Oloni aGilo. Nkokwaamba ayi mandabala anene pantu pomwi akalinga likumi ayomwi kubikaawo amishi yakalinga kushingulukite mandabala ayo.

⁵² Mwakalinga Alabu, Duma, Eshani,

⁵³ Janimu, Beti Tapuwa, Afeka,

⁵⁴ Umata, Ebuloni alimwi aSioli. Nkokwaamba ayi mandabala anene pantu pomwi akalinga osanwe aone kubikaawo amishi yakalinga kushingulukite mandabala ayo.

⁵⁵ Mwakalinga aMaoni, Kamelo, Sifu, Juta,

⁵⁶ Jesiliilu, Jokideyamu, Sanowa,

⁵⁷ Kaini, Gibeya alimwi aTimuna. Nkokwaamba ayi mandabala anene pantu pomwi akalinga likumi kubikaawo amishi yakalinga kushingulukite mandabala ayo.

⁵⁸ Mwakalinga Aluli, Beti Suwa, Gedo,

⁵⁹ Maalati, Betanoti alimwi aElitekoni. Nkokwaamba ayi mandabala anene pantu pomwi akalinga osanwe ayomwi kubikaawo amishi yakalinga kushingulukite mandabala ayo.

⁶⁰ Mwakalinga Kilyati Baali nabi Kilyati Jeyalimu alimwi aLaba. Nkokwaamba ayi mandabala pantu pomwi akalinga obilo kubikaawo amishi yakalinga kushingulukite mandabala ayo.

⁶¹ Muluyanga amwalo mwakalinga Beti Alaba, Midini, Sekaka,

⁶² Nibushani, ndabala inene ya Mwiinyo alimwi aEngedi. Nkokwaamba ayi mandabala anene pantu pomwi akalinga osanwe ayomwi kubikaawo amishi yakalinga kushingulukite mandabala ayo.

⁶³ Sombi bene Juda tabakwe kutanda bene Jebusi abo bakalinga kwikala muJelusalemu. Aboobo kushikila asunu, bene Jebusi bacikala nkomunya uko pantu pomwi abene Juda.