Joshuwa 12 - Baibo Busansulushi Bwa Libuku Ili

Bamaami abo mose mbwaakakoma

¹ Ono meena a bamaami abo bene Isilaeli mbobakakoma akubwesela cishi cakalinga kwicwe lya Mulonga wa Joodani, kuswa kuCinyika ca Anoni kushikila akuKalundu ka Elimoni, kubikaawo alubasu lwa kwicwe lya Cinyika ca Joodani ngaaya.

² Sioni mwaami wa bene Amoli uyo wakalinga kulela mundabala ya Eshiboni. Wakalinga kweendelesha akuAlowa mweela Cinyika ca Anoni, pakati ka cinyika ico alimwi akuya mukweela kuMulonga wa Jaboku, uyo uli njenyinsa ya bene Amoni. Awalo musa wa Gilyadi wakalinga mucishi ca mwaami ngomunya uyo.

³ Cishi cakalinga kwicwe lya Cinyika ca Joodani kuswa kuLweenge lwa Galili kuya akuLweenge lwa Mwiinyo, kwiinda kuBeti Jeshimoti alimwi akushika kulubasu lwakumalenge lya nkunamo ya Kalundu ka Pisiga.

⁴ Bakakoma mwaami Ogi wa kuBashani. Uyu wakalinga ngowakweelaako pabene Lefaimu. Wakalinga kulela mundabala ya Ashitaloti aya Edileyi.

⁵ Wakalinga kweendelesha akuKalundu ka Elimoni, Saleka, cishi ca Bashani coonse, kuya mukushika kunyinsa ya Geshuli alimwi aMaaka, kubikaawo amusa wa Gilyadi kushikila akunyinsa ya cishi ca mwaami Sioni wa kuEshiboni.

⁶ Anu Mose alimwi abene Isilaeli mbobakakoma bamaami bobilo aba. Mose musebenshi wa Mwaami Lesa wakapa cishi cabo kumukowa wa bene Lubeni, Gadi alimwi amusa wa mukowa wakwe Manase ayi ncinebo.

Bamaami abo Joshuwa mbwaakakoma

⁷ Ono Joshuwa alakwe alimwi abashilumamba bakwe bakakoma bamaami boonse ba mucishi cakumbo lya Mulonga wa Joodani kuswa kuBaali Gadi muCinyika ca Lebanoni kuya kuKalundu ka Alaki ako kaya mukushika kuSiya. Mpeeke cishi cabo, Joshuwa wakacaabanya kumikowa ya bene Isilaeli ayi ncinebo.

⁸ Wakabaabanya cishi coonse ca tulundu, tulundu tuniininiini twakumbo, Cinyika ca Joodani, munkunamo ya tulundu alimwi aluyanga lwa kumalenge, nkokwaamba ayi cishi ca bene Iti, Amoli, Kenani, Pelisi, Ifi alimwi aca bene Jebusi.

⁹ Bene Isilaeli bakakoma bamaami ba mumandabala anene aya. Jeliko, Ai pafwaafwi aBetelo

¹⁰ Jelusalemu, Ebuloni

¹¹ Jamuti, Lakishi

¹² Egiloni, Gesa

¹³ Debe, Geda

¹⁴ Oma, Aladi

¹⁵ Libuna, Adulamu

¹⁶ Makeda, Betelo

¹⁷ Tapuwa, Efeli

¹⁸ Afeki, Lashaloni

¹⁹ Madoni, Asoli

²⁰ Shimuloni Meloni, Akishafu

²¹ Tanaki, Megido

²² Kedeshi, Jokoneyamu muKamelo

²³ Doli muloombe lwa lweenge lwa Mediteleniyani, Goyimu muGilugala

²⁴ alimwi aya Tesa. Anu oonse pantu pomwi akalinga makumi otatwe ayomwi.