Joshuwa 11 - Baibo Busansulushi Bwa Libuku Ili

Joshuwa mbwaakakoma Jabini alimwi ababye

¹ Ono mwaami Jabini wa kuAsoli ndyaakanyumfwa mpuwo yakukoma kwa bene Isilaeli, wakatumya maswi akusenga lucafwo kumwaami Jobabu wa kuMadoni, kumwaami wa Shimuloni alimwi awa Akishafu,

² kubamaami bakumatwa abo bakalinga kwikala mutulundu, ba muCinyika ca Joodani kumalenge a Kineleti, munshaatulundu tuli kulubasu lwakumbo alimwi aba muNafoti Doli kulubasu lwakumbo.

³ Wakatumya mulomo akubene Kenani kulubasu lwakumbo akwicwe lya Mulonga wa Joodani, kubene Amoli, bene Iti, bene Pelisi abene Jebusi mucishi ca tulundu pantu pomwi abene Ifi munshaaKalundu ka Elimoni mucishi ca Misipa.

⁴ Boonse abo bakesa abashilumamba babo boonse, maaki aanji alimwi ashikoci shiinji. Bakalinga baanji bweenka mbuli museese wa muloombe lwa lweenge.

⁵ Boonse bamaami aba bakapaankanya makoto a bashilumamba babo akuyaka misumba kumusena wiitwa ayi Tuntupu twa kuMelomu kwaamba ayi balwane abene Isilaeli.

⁶ Mpomunyaawo Mwaami Lesa wakaambila Joshuwa ayi, “Utaloondi bantu aba mukwiinga paciindi ceenka cino ciilo, boonse balaakunoofwite kale kubene Isilaeli. Mulyeelete kusutula mishisa ya maaki abo alimwi akutenta shikoci shabo.”

⁷ Aboobo Joshuwa alimwi abashilumamba bakwe bakatalika kulwanaabo cakuteengashilaawo, pamusena wiitwa ayi Tuntupu twa kuMelomu.

⁸ Ncakwiila Mwaami Lesa wakalengesha ayi bene Isilaeli bakome. Mpeeke bakabatandaanya kuya kuSidoni, kuMisilefoti Maimu, kuya mukweela akwicwe lya Cinyika ca Misipa. Taaku nabi womwi wakapuluka.

⁹ Joshuwa wakacita kweelana aMwaami Lesa mbwaakamulwiita, ndyaakasutula mishisa ya Maaki abo alimwi akutenta shikoci shabo.

¹⁰ Kuswawaawo Joshuwa wakapiluluka akuya mukubwesa ndabala inene ya Asoli akucaya mwaami wa njiyo. Paciindi ico, Asoli yakalinga njendabala inene iindaawo pamandabala oonse ayo.

¹¹ Bantu boonse bakalinga kwikala mundabala inene iyo bakacaikwa kumipeeni. Taaku muntu nabi womwi wakapuluka. Ndabala ayalo bakeetenta.

¹² Anu Joshuwa wakabwesa mandabala anene oonse ayo akwaanyonyoola. Wakacaya bamaami ba ngawo amipeeni kweelana abwakaamba Mose musebenshi wa Mwaami Lesa.

¹³ Nacibi boobo bene Isilaeli tabakwe kutenta mandabala anene ayo akalinga kuyakitwe pamatongo a mandabala akulukulu, kukushakobo ndabala inene ya Asoli, iyo Joshuwa njaakatenta.

¹⁴ Mumandabala ayo, bene Isilaeli bakabwesamo buboni ashifubwa shoonse. Sombi bakacaya bantu boonse bakalinga kwikalaamo. Taaku muntu nabi womwi wakapuluka.

¹⁵ Kweelana aMwaami Lesa mbwaakaambila Mose musebenshi wakwe, alakwe wakalwiita Joshuwa uyo wakacita shoonse. Ncakwiila wakacita isho shoonse Mwaami Lesa nshaakaambila Mose.

Cishi cakabwesa Joshuwa

¹⁶ Ono Joshuwa wakabwesa cishi coonse ici, nkokwaamba ayi cishi ca tulundu ca kumatwa akumalenge, cishi coonse ca Gosheni, tulundu tuniininiini twakumbo, Cinyika ca Joodani alimwi atulundu twa mucishi ca Isilaeli atulundu tuniininiini twa ntuto,

¹⁷ kuswa kuKalundu ka Alaki ako katalikila kuSiya kuya mukweela kuBaali Gadi muCinyika ca Lebanoni, munshaaKalundu ka Elimoni. Bamaami ba mumo boonse wakabacata akubacaya.

¹⁸ Joshuwa wakalwana bamaami aba kwa ciindi cilaamfu.

¹⁹ Taaku ndabala inene nabi yomwi iyo yakapanga cipangano ca luumuno abene Isilaeli, sombibo ya Gibyoni umo mwakalinga kwikala bene Ifi. Mandabala anene oonse bakaalwana akwaabwesa.

²⁰ Mwaami Lesa mwiine ngowakabalengesha cimpamya ayi balwane abene Isilaeli, kwaamba ayi abanyonyweetebo limwi akubalobya cakubula nkumbu. Ubo Mwaami Lesa mbwaakaambila Mose.

²¹ Paciindi ico Joshuwa wakaya mukunyonyoola bantu bapolomene bakalinga kwiitwa ayi bene Anaki mucishi ca tulundu ca Ebuloni, Debe alimwi aAnabu, kuswa kucishi ca tulundu coonse ca Juda alimwi aca Isilaeli. Joshuwa ncakwiila wakabanyonyoola boonse pantu pomwi amandabalaabo anene.

²² Taaku mwine Anaki nabi womwi wakacaala kaayoya mucishi coonse ca Isilaeli. Mwakacaalabo bakamwikamwi muGasa, Gati alimwi amuAshidodi.

²³ Anu Joshuwa wakabwesa cishi coonse kweelana aMwaami Lesa mbwaakaambila Mose, akucaabanya kubene Isilaeli boonse kwiinda mumikowa yabo ayi ncinebo. Kuswawaawo inkondo yakaluba mumeenso a bantu boonse mucishi ico.