Joshuwa 10 - Baibo Busansulushi Bwa Libuku Ili

Bene Amoli mbobakakomwa

¹ Mpomunyaawo Adonisedeki mwaami wa kuJelusalemu wakanyumfwa ayi Joshuwa wakabwesa ndabala inene ya Ai akwiinyonyoola abuumbi, akucita ndabala iyo alimwi amwaami wa njiyo bweenka mbwaakacita ndabala inene ya Jeliko alimwi amwaami wa njiyo. Wakanyumfwa alimwi ayi bene Gibyoni bakapanga cipangano ca luumuno abene Isilaeli alimwi ayi balekala pafwaafwi ambabo.

² Mpeeke lakwe alimwi abantu bakwe bakalisukama abuumbi pacikani ici mukwiinga Gibyoni yakalinga ndabala inene abuumbi, bweenka mbuli mandabala amwi oonse mwikala bamaami. Ndabala ya Gibyoni yakalinga inene kwiinda ya Ai alimwi bantu ba mumo bakalinga kucishi kulwana abuumbi.

³ Paceebo ceeci Adonisedeki mwaami wa kuJelusalemu wakatuma maswi akusenga lucafwo kubamaami aba. Oamu wa kuEbuloni, Pilamu wa kuJamuti, Jafiya wa kuLakishi alimwi Debe wa kuEgiloni.

⁴ Wakabasenga ayi, “Amwise muncaafwe kulwana abene Gibyoni mukwiinga bapanga cipangano ca luumuno aJoshuwa alimwi abene Isilaeli boonse.”

⁵ Lyalo bamaami ba bene Amoli bosanwe aba kuswa kuJelusalemu, Ebuloni, Jaamuti, Lakishi alimwi akuEgiloni bakapaankanya makoto a bashilumamba babo akuya mukushinguluka ndabala inene ya Gibyoni alimwi akwiilwana.

⁶ Mpeeke bene Gibyoni bakatuma maswi kuli Joshuwa wakalinga kuGilugala pamisumba ayi, “Mutatuleeki sweenka sobasebenshi banu. Amufwambaane mwise mutupulusheeko. Amutucaafwe ceebo bamaami boonse ba bene Amoli kuswa mucishi ca tulundu bapaankanya makoto a bashilumamba babo akulwana aswebo.”

⁷ Paceebo ceeci Joshuwa wakanyamuka kuswa kuGilugala abashilumamba bakwe boonse, kutashiyaawo baabo bacishi kabotu kulwana.

⁸ Mpomunyaawo Mwaami Lesa wakaambila Joshuwa ayi, “Utaloondi bantu aba mukwiinga nebo ndabaaba kale mumaansaako. Taaku nabi womwi eshi acikoonshe kukukoma.”

⁹ Joshuwa alimwi abashilumamba bakwe bakeenda kuswa kuGilugala mashiku oonse akutalika kubalwana cakuteshiba balo ayi batoosa.

¹⁰ Mwaami Lesa wakafulunganya bene Amoli mukuloonda bene Isilaeli. Mpeeke bene Isilaeli bakabacaya abuumbi kuGibyoni akubatandaanya, babakunkulusha Kalundu ka Beti Oloni, kabaya cibacayabo kushikila akuAseka alimwi aMakeda.

¹¹ Ono bene Amoli abo ndibakalinga kuya ciloonda bene Isilaeli pakukunkuluka Kalundu ka Beti Oloni kuya kuAseka, Mwaami Lesa wakaloshesha mfula ya mabwe anene pali mbabo. Anu baanji bakafwa kumabwe aya kwiinda mbobakafwa kumipeeni ya bene Isilaeli.

¹² Ono pabushiku ubo Mwaami Lesa ndyaakalengesha ayi bene Amoli bakomwe kubene Isilaeli, Joshuwa wakaamba aMwaami Lesa pameenso abene Isilaeli ayi, “Olisuba, imikana pandabala inene ya Gibyoni. Omweenshi, imikana paCinyika ca Aijaloni.”

¹³ Ncakwiila lisuba lyakeemikana, awalo mweenshi tookwe kweendaawo kushikila mushobo wa bene Isilaeli wakakoma balwani ba nguwo, kweelana ambokulembetwe mulibuku lyakwe Jasha. Lisuba lyakeemikana kalili pakati ka mutwi mwiculu, alimwi pabushiku ubo boonse talikwe kuwa.

¹⁴ Kacitana kucitika ici nabi kuswa ndicakacitika, takuna kubawo kale bushiku bwa mbuli boobu, ubo Mwaami Lesa mbwaakanyumfwila muntu. Ndushinisho, Mwaami Lesa wakalinga kulwanina bene Isilaeli!

¹⁵ Kuswawaawo Joshuwa alimwi abene Isilaeli boonse bakaboolela kuGilugala pamisumba.

Joshuwa mbwaakacaya bamaami ba bene Amoli bali bosanwe

¹⁶ Paciindi ici aba bamaami ba bene Amoli bali bosanwe bakalinga baloboka akuya mukuyuba mucimfwengo kuMakeda.

¹⁷ Ono Joshuwa ndyaakanyumfwa ayi bamaami bosanwe bacanika kabayubite mucimfwengo kuMakeda,

¹⁸ wakaamba ayi, “Pamulyango wa cimfwengo, mukunkulushilewo mabwe anene abuumbi akushiyako bantu beshikulindilila.

¹⁹ Sombi mwebo mutekaliiwo! Amutandaanye balwani banu, amubalwaane kutalikila kwisule alimwi akutabaleka ayi bashike kumandabalaabo anene. Mukwiinga Mwaami Lesa, Lesa wanu wabaaba kale mumaansaanu.”

²⁰ Aboobo Joshuwa alimwi abene Isilaeli bakabacaya boonse, nacibi kwaamba ayi baniini bakacaala bakaya mukushika kumandabalaabo anene acite malinga.

²¹ Lyalo bashilumamba boonse bakaboolabo kabotu kuli Joshuwa uyo wakalinga kumisumba ya kuMakeda. Kuswawaawo taaku nabi womwi wakalinga kutongookela bene Isilaeli.

²² Mpomunyaawo Joshuwa wakaamba ayi, “Amucalule mulyango wa cimfwengo akukusha bamaami bosanwe abo, mubalete kuli ndime.”

²³ Aboobo bakakusha bamaami bosanwe abo kuswa mucimfwengo, nkokwaamba ayi mwaami wa kuJelusalemu, Ebuloni, Jaamuti, Lakishi alimwi awa Egiloni.

²⁴ Ndibakabatola kuli Joshuwa, wakeeta bene Isilaeli boonse akwaambila bamatanjilili ba bashilumamba abo mbwaakayaabo ayi, “Kamwisa kuno mulyate bamaami aba panshingo shabo.” Mpeeke bakesa babalyata.

²⁵ Lyalo Joshuwa wakaambila bamatanjilili abo ayi, “Mutaloondi nabi kutyongola. Amuyume akulishoma mukwiinga Mwaami Lesa mbweshi anoocita kubalwani banu boonse abo mbweshi munoolwanaabo.”

²⁶ Kuswawaawo Joshuwa wakacaya bamaami abo akubaanjika pashisamu shosanwe apo mpobakalinga kushikila macolesha.

²⁷ Lyalo macolesha Joshuwa wakaambila bantu ayi bakushe mituntu iyo kushisamu akwiiwaala mucimfwengo ceenka ncebakalinga bayubaamo. Pamulyango wa ncico, bakabikawo mabwe anene anene ayo aciliiwo asunu.

Joshuwa mbwaakatolelela kubwesa cishi ca bene Amoli

²⁸ Pabushiku ubo Joshuwa wakabwesa ndabala inene ya Makeda. Wakacaya bantu boonse bakalinga kwikalaamo. Taaku nabi womwi wakacaala kaali muumi. Mpeeke wakacita mwaami wa ndabala ya Makeda bweenka mbwaakacita mwaami wa kuJeliko.

²⁹ Lyalo Joshuwa abashilumamba boonse bakaswa kuMakeda akuya kundabala inene ya Libuna akwiilwana.

³⁰ Mwaami Lesa wakaaba ndabala ayalo iyi mumaansa a bene Isilaeli pantu pomwi amwaami wa njiyo. Taaku ngobakashiya nabi womwi, sombi boonse bakalinga kwikalaamo bakacaikwa. Mwaami wa njiyo alakwe wakamucita bweenka mbwaakacita mwaami wa kuJeliko.

³¹ Kuswawaawo Joshuwa abashilumamba boonse bakaswa kuLibuna akuya kundabala inene ya Lakishi. Wakeeshinguluka alimwi akwiilwana.

³² Mwaami Lesa wakalengesha ayi bene Isilaeli bakome Lakishi pabushiku bwabili. Ono kweelana ambwaakacita kundabala inene ya Libuna, taaku nabi womwi ngwaakashiyaamo. Sombi boonse bakalinga kwikalaamo bakabacaya amipeeni.

³³ Paciindi ici Olamu mwaami wa kuGesa wakalinga wesa mukucafwa Lakishi, sombi Joshuwa wakamukoma pantu pomwi abashilumamba bakwe, cakutashiyaawo nabi womwi.

³⁴ Kuswawaawo Joshuwa abashilumamba boonse bakaswa kuLakishi akuya kundabala inene ya Egiloni. Bakeeshinguluka alimwi akwiilwana.

³⁵ Pabushiku mbomunya ubo, ndabala iyi bakeebwesa akucaya bantu boonse bakalinga kwikalaamo, kweelana ambobakacita ndabala ya Lakishi.

³⁶ Kuswawaawo Joshuwa alimwi abashilumamba bakwe boonse bakaswa kuEgiloni akuya kundabala inene ya Ebuloni akwiilwana.

³⁷ Ndabala iyi bakeebwesa pantu pomwi amwaami wa njiyo, mishi ishingulukite alimwi abantu boonse bakalinga kwiikalaamo. Taaku muntu nabi womwi wakapuluka. Kweelana ambobakacita kuEgiloni, ayalo bakeenyonyoola cakumaninina pantu pomwi abaabo bakalinga kwikalaamo.

³⁸ Lyalo Joshuwa alimwi abashilumamba bakwe boonse bakapiluluka kuya kundabala inene ya Debe akwiilwana.

³⁹ Ndabala inene iyi bakeebwesa pantu pomwi amwaami wa njiyo, mishi ishingulukite alimwi akucaya bantu bakalinga kwikalaamo. Boonse bakalinga kwikalaamo bakanyonyoolwa. Taaku muntu nabi womwi wakapuluka. Bakacita kundabala ya Debe akumwaami wa njiyo, bweenka mbobakacita kundabala inene ya Libuna amwaami wa njiyo alimwi akundabala inene ya Ebuloni.

⁴⁰ Ncakwiila Joshuwa wakakoma cishi coonse, kubikaawo acishi ca tulundu, Negefu, cishi ca tulundu tuniininiini twakumbo alimwi acishi ca munkunamo ya tulundu pantu pomwi abamaami ba nshisho. Taaku muntu nabi womwi wakapuluka. Wakanyonyoola bantu boonse kweelana abwakaamba Mwaami Lesa, Lesa wa bene Isilaeli.

⁴¹ Anu Joshuwa kukoma kwakwe wakatalikila kuKadeshi Baniya kuya kuGasa alimwi acishi coonse ca Gosheni kushikila akuGibyoni.

⁴² Joshuwa wakabwesa bamaami aba alimwi ashishi shabo akubakoma muciindi comwi mukwiinga Mwaami Lesa, Lesa wa bene Isilaeli wakalinga kubalwaninaako.

⁴³ Kuswawaawo Joshuwa alimwi abashilumamba bakwe boonse bakaboolela kumisumba yabo kuGilugala.