Joshuwa 1 - Baibo Busansulushi Bwa Libuku Ili

Lesa mbwaakaambila Joshuwa ayi akome cishi ca Kenani

¹ Mpomunyaawo Mose musebenshi wa Mwaami Lesa ndyaakafwa, Mwaami Lesa wakaambila Joshuwa mwanaakwe Nani, uyo wakalinga mucafwi wakwe Mose ayi,

² “Mose musebenshi wangu wafwa. Ono webo nyamuka abene Isilaeli boonse, musubuke Mulonga wa Joodani akuya mucishi ico ncentoopa bantu bangu.

³ Ndaakumupa cishi coonse ico nceshi mukalyateemo kweelana ambondakashomesha Mose.

⁴ Cishi canu cilaakuswa muluyanga kulubasu lwakumalenge akuya mukushika kutulundu twa Lebanoni kumatwa. Kuswa kuMulonga unene wa Yufuletisi kulubasu lwakwicwe, kuya mukwiinda mucishi ca bene Iti kushikila akulweenge lwa Mediteleniyani kulubasu lwakumbo.

⁵ Anu webo Joshuwa, taaku weshi akakukomeewo mubuumi bwako boonse. Ndaakunooli awebo kweelana ambondakalinga aMose. Teshi nkakushiyeewo nabi kukusuula.

⁶ Ulyeelete kuyuma akulishoma ceebo webo ndiwe utootanjilila bantu aba kuya mucishi ico ncendakashomesha bamashali babo bakulukulu.

⁷ Webo yumabo akulishoma abuumbi. Ulyeelete kunookonkela Milawo yoonse iyo musebenshi wangu Mose njaakakupa kwaamba ayi ukaswitilile kuli koonse nkweshi ukaye. Utakeeleshi kusuula mulawo nabi womwi.

⁸ Utakalubiiko kunoobelenga Libuku lya Milawo lyoonse pakunoolambila. Ukanokwiiyaamo malumwi amashiku akulabilila kukonkela shoonse shilembetweemo. Na ukacite boobo, ulaakuba acoolwe alimwi ulaakuswitilila.

⁹ Kutalubaako ayi ndakulwiita ayi ulyeelete kuyuma akulishoma. Utakaloondi nabi kutyongola, ceebo nebo neMwaami Lesa, Lesa wako ndanooli awebo kuli koonse nkweshi ukaye.”

Joshuwa mbwaakalwiita bene Isilaeli shakucita

¹⁰ Kuswawaawo Joshuwa wakaambila bamatanjilili ayi,

¹¹ “Beendeemo mumisumba kunoolwiita bantu ayi, ‘Amubambile limwi cakulya. Pabushiku bwatatu kuswa sunu, mulaakusubuka Mulonga wa Joodani, ayi mukabwese cishi ico Mwaami Lesa, Lesa wanu ncaatoomupa.’ ”

¹² Mpeeke Joshuwa wakaambila mukowa wakwe Lubeni, wakwe Gadi alimwi amusa wa mukowa wakwe Manase ayi,

¹³ “Amwiibaluke mbuli Mose musebenshi wa Mwaami Lesa mbwaakamulwiita ayi, ‘Mwaami Lesa, Lesa wanu ulaakumupa cishi ici ayi mweshi munookala.’

¹⁴ Ono bamakaanu abana banu mbweshi bakacaale pantu pomwi ashifubwa shanu, mucishi ico kwicwe lya Joodani nkwaakamupa Mose. Sombi bashilumamba banu balyeelete kunoolibambite kulwana. Balyeelete kutanjila akusubuka ayi bacafwe bene Isilaelinyinaabo,

¹⁵ kushikila abalo bakabwesa akwikala mucishi cili kumbo lya Joodani ico Mwaami Lesa, Lesa wanu ncaatoobapa. Kuswawaawo ndyeshi mukaboole mukwikala mucishi canu cili kwicwe lya Joodani, ico Mose musebenshi wa Mwaami Lesa ncaakamupa.”

¹⁶ Mpomunyaawo bamumishobo iyo bakakumbula Joshuwa ayi, “Tulaakucita coonse nceshi ukatulwiite alimwi akuya kuli koonse nkweshi ukatutuume.

¹⁷ Tunanookunyumfwila bweenka mbotwakalinga kunyumfwila Mose. Mwaami Lesa, Lesa wako abe awebo bweenka mbwaakalinga aMose.

¹⁸ Uyo woonse eshi akabule kunyumfwila maswi ako nabi kukonkela milasho yako, ulyeelete kucaikwa. Sombi ulyeelete kuyuma akulishoma!”