Joni 9 - Baibo Busansulushi Bwa Libuku Ili

Jesu mbwaakashilika moofu

¹ Ono Jesu ndyaakalinga kuya ceenda, wakabona musankwa wakashalwa kaali moofu.

² Bashikwiiya bakwe bakamwiipusha ayi, “Bafundishi, ngani wakabisha kwaamba ayi musankwa uyu ashalwe kaali moofu? Sa ngumwiine na mbashali bakwe?”

³ Jesu wakakumbula ayi, “Teshi kubisha kwa musankwa uyu nabi kwa bashali bakwe kwakalengesha. Sombi cakacitika kwaamba ayi Lesa atondeshe milimo yakwe muli nguwe.

⁴ Kulilabo kalicili malumwi tulyeelete kucita milimo ya wooyo wakantuma. Ciindi ca mashiku citooshikila muntu ndyaatakoonshi kusebensa.

⁵ Bulya ndyeencili mucishi ca panshi ndi mumuni wa bantu boonse.”

⁶ Jesu ndyaakamana kwaamba boobo, wakashipila mate panshi, wakanda bulongo akunanika moofu uyo pameenso.

⁷ Lyalo wakamwaambila ayi, “Koya ukasambe kumeenso mulishiba lya Sailomu.” (Ili liina lilaamba ayi, “Kutumwa.”) Aboobo musankwa uyo wakaya wasamba akuboolela kaabona.

⁸ Beshimukobonyina abaabo bakamubonawo kale kaasengelela, kaatana kutalika kubona, bakeepusha ayi, “Te uyu muntu ngooulya wakalinga kwikala panshi kaasengelela?”

⁹ Bamwi bakasumina ayi, “Ngonguwe.” Sombi bamwi bakaamba ayi, “Sobwe, teshi wooyu, bakoshanyabo.” Mpeeke mwiine wakabaambila ayi, “Ee ndime.”

¹⁰ Lyalo bakamwiipusha ayi, “Ino ono watalika buyani kubona?”

¹¹ Musankwa uyo wakabakumbula ayi, “Muntu wiitwa ayi Jesu wakanda bulongo akunanika pameenso. Lyalo wandwiita ayi nje nkasaambe mulishiba lya Sailomu. Mpeeke ndaya mukusamba. Ingayi manebo kusamba, ndatalika kubona.”

¹² Bakamwiipusha ayi, “Ino muntu uyo uli kuli?” Alakwe wakumbula ayi, “Cito na uli kuli.”

Bafalisi mbobakeepulushisha shakushilikwa

¹³ Lyalo musankwa uyo wakalinga moofu bakamutola kubaFalisi.

¹⁴ Ono bushiku ubo Jesu ndyaakakanda bulongo akushilika meenso a muntu uyo, bwakalinga bushiku bwakookesha bwa Cibelu.

¹⁵ BaFalisi abalo bakamwiipusha mbuli mbwaakatalika kubona. Wakabalwiita ayi, “Wananika bulongo pameenso, mpeeke ndaya mukusamba, lyalo ndacikonsha kubona.”

¹⁶ BaFalisi bamwi bakaamba ayi, “Uyo muntu wacita ceeci taaswi muli Lesa mukwiinga taakonkeli mulawo wa bushiku bwakookesha bwa Cibelu.” Sombi bamwi bakaamba ayi, “Ino ono mucita shibi inga wacikonsha buyani kucita shaankamiko mbuli sheeshi?” Aboobo bakapansaana beene abeene.

¹⁷ Lyalo baFalisi bakeepusha musankwa uyo wakalinga moofu alimwi ayi, “Ino webo utooyeeya buyani shamuntu uyo bulya mbwaakushilika meenso?” Lakwe wakakumbula ayi, “Ngumulaluki.”

¹⁸ Sombi baFalisi tabakwe kushoma ayi musankwa uyo wakalinga moofu alimwi watalika kubona kushikila ndibakeeta bashali bakwe.

¹⁹ Lyalo bakabeepusha ayi, “Sa musankwa uyu ngomwanaanu ulya ngomwaamba ayi wakashalwa kaali moofu? Ino ono watalika buyani kubona?”

²⁰ Bashali bakakumbula ayi, “Tulishi kwaamba ayi uyu ngumwaneesu alimwi wakashalwa kaali moofu.

²¹ Sombi tatwishi mbwaatalika kubona nabi wooyo wamushilika meenso. Ono amumwiipushe mwiine utoomulwiita mukwiinga ngumunene.”

²² Bashali ba musankwa uyo bakaamba boobo mukwiinga bakalinga kuloonda bamaloba ba baJuda abo bakalinga bapangana kale ayi uyo woonse eshi akashome ayi Jesu ngoUsalitwe wakwe Lesa, nkumutanda mucoonde cabo.

²³ Anu nceceeco bashali bakwe ncibakaambila ayi, “Amumwiipushe mwiine mukwiinga ngumunene!”

²⁴ Bakamwiita lwabili musankwa uyo wakashalwa kaali moofu akumwaambila ayi, “Lemeka Lesa, waambe calushinisho mukwiinga swebo tulishi kwaamba ayi muntu uyo wakakushilika ngumucita shibi.”

²⁵ Musankwa uyo wakakumbula ayi, “Nebo nshishi na ngumucita shibi nabi tau. Nebo cintu comwi ncenshibo, ncakwaamba ayi ndalinga moofu, ono ndaboona.”

²⁶ Bakamwiipusha ayi, “Wakucita buyani? Ino wakushilika buyani meenso?”

²⁷ Mpeeke wakabakumbula ayi, “Ndamulwiitawo kale ono tamukwe kunyumfwa. Ino ncemusunini kwaamba ayi mboosheewo alimwi nciinshi? Sa mutooyanda kuba bashikwiiya bakwe amwebo?”

²⁸ Mpomunyaawo bakamutukana akwaamba ayi, “Webo ndiwe shikwiiya wakwe, sombi swebo tuli bashikwiiya bakwe Mose.

²⁹ Tulishi kwaamba ayi Lesa wakalinga kwaamba aMose, sombi uyo muntu lakwe tatwishi ankwaaswa.”

³⁰ Musankwa uyo wakabakumbula ayi, “Cilakankamika abuumbi! Tamwishi ankwaaswa, sombi nebo wanshilika ndaboona.

³¹ Tulishi kwaamba ayi Lesa taakutiki bamucita shibi, sombi bantu bamulemeka akucita mbwaasuni.

³² Kuswa kumatalikilo a cishi, taaku muntu nabi womwi ngomwakanyumfwa ayi washilika muntu wakashalwa kaali moofu.

³³ Muntu uyu naatakwe kuswa kuli Lesa, naakwiinga taaku ncaacita.”

³⁴ Lyalo bakamukumbula ayi, “Webo wakashalwa akukula mushibiibi, ino inga watwiishanshi?” Mpomunyaawo bakamutanda mucoonde.

Boofu bwa kumushimu

³⁵ Jesu wakanyumfwa ayi bamutanda mucoonde. Lyalo ndyaakamucana musankwa uyo wakamwiipusha ayi, “Sa ulashoma muMwanaaMuntu?”

³⁶ Lakwe wakakumbula ayi, “Ino MwanaaMuntu ngani? Amundwiite Nkambo, kwaamba ayi nshome muli nguwe.”

³⁷ Jesu wakaamba ayi, “Wamubona kale alimwi ngowooyo utokwaamba awebo.”

³⁸ Mpomunyaawo wakaamba ayi, “Nkambo, ndashooma.” Mpeeke wakamulambila.

³⁹ Lyalo Jesu wakaamba ayi, “Ndakesa pacishi ca panshi mukoombolosha ayi abo boofu babone, abaabo babona bapofole.”

⁴⁰ BaFalisi bamwi abo mbaakalingaabo ndibakanyumfwa boobo, bakeepusha ayi, “Sa aswebo tuli boofu?”

⁴¹ Jesu wakabaambila ayi, “Nemwalinga boofu naakwiinga kamutacite mulandu ceebo ca shibiibi shanu. Ono mukwiinga mutokwaamba ayi, ‘Tulabona,’ nkokwaamba ayi munanoolibo amulandu wanu.”