Joni 6 - Baibo Busansulushi Bwa Libuku Ili

Jesu mbwaakapa shakulya basankwa bali shuulu shosanwe

¹ Kuswawaawo Jesu wakasubukila kwitala lya Lweenge lwa Galili (Ulo ndoLweenge lwa Tibelyasi.)

² Bantu baanji baanji bakamukonkela mukwiinga bakalinga babonaawo kale shaankamiko ndyaakashilika balwashi.

³ Lyalo Jesu wakatanta pakalundu akwikala panshi abashikwiiya bakwe.

⁴ Paciindi ico bushiku bwa Pasika bwakwiibaluka kusotokela bwakalinga pafwaafwi.

⁵ Lyalo Jesu ndyaakalangalanga wakabona bantu baanji kabesa kuli nguwe, wakeepusha Filipo ayi, “Ino nkuli nkweenga twoola shinkwa ayi bantu aba balye?”

⁶ (Jesu wakeepusha cakumweelesha, sombi mumoyo wakwe mwiine keeshi kale bwakucita.)

⁷ Filipo wakamukumbula ayi, “Nabi twoola shinkwa wa myaanda yobilo ya maali asilifa inga taukwani kwaamba ayi muntu uli woonse alye nakaceyi.”

⁸ Aumwi womwi wa bashikwiiya bakwe wiitwa ayi Andulu, mukwabo Simoni Pita wakaamba ayi,

⁹ “Kuli mwanike musankwa kuno ucite shinkwa osanwe atuswi tobilo. Ino inga shacitanshi kubantu baanji bobulya?”

¹⁰ Jesu wakaamba ayi, “Amwaambile bantu bekale panshi.” Pamusena apo pakalinga bwiisu buunji. Lyalo bantu boonse bakekala. Basankwa bakalinga mpashi shuulu shosanwe.

¹¹ Jesu wakabwesa shinkwa uyo akulumba Lesa. Mpeeke wakaabila bantu abo bakalinga kushiite. Tuswi atwalo wakacita bweenka ubo, boonse bakalya bakuta.

¹² Lyalo boonse ndibakakuta, Jesu wakaambila bashikwiiya bakwe ayi, “Amubwese shoonse nshebashiyaako kwaamba ayi kutanyonyooki nakaceyi.”

¹³ Aboobo bakashibwesa akwisusha tutundu likumi atobilo twa bunsebunse bwa shinkwa ngobakashiyaako bantu kuswa kushinkwa osanwe uyo.

¹⁴ Bantu ndibakabona caankamiko cakacita Jesu, bakaamba ayi, “Ncakwiila uyu ngomulaluki wakalinga kulangilwa mucishi ca panshi!”

¹⁵ Jesu wakeshiba ayi bantu batooyanda kumubika pabwaami cakumukakatisha. Aboobo wakanyamuka akuya alimwi kutulundu eenkabo.

Jesu mbwaakeenda pamaanshi

¹⁶ Macolesha, bashikwiiya bakwe Jesu bakaya kulweenge.

¹⁷ Bakenjila mubwaato kwaamba ayi basubukile kwitala lya lweenge kuya kuKapenaumu. Mpeeke kwakashiya Jesu kaatana kuya kuli mbabo.

¹⁸ Paciindi ico kwakalinga cipuupu cinene, aboobo kwakaba maaba pamaanshi.

¹⁹ Bashikwiiya abo ndibakeenda makilomita mpashi osanwe akwiindilila, bakabona Jesu kaaenda pamaanshi keesa kubwaato. Mpeeke bakaloonda.

²⁰ Sombi wakabaambila ayi, “Ndime, mutaloondi.”

²¹ Lyalo bakasumina ayi enjile mubwaato. Paciindi ceenka ico bwaato bwakashika kwitala lya lweenge nkubakalinga kuya.

Bantu mbobakayandoola Jesu

²² Ono bushiku bwakaboolaawo, bantu baanji bakacaala kwitala lya lweenge, bakeshiba ayi pamusena uyo pakalingabo bwaato bomwi. Bakeshiba alimwi ayi Jesu taakwe kuya abashikwiiya bakwe mubwaato ubo, sombi ayi bashikwiiya bakaya beenkabo.

²³ Lyalo maato amwi akaswa kuTibelyasi akashika pafwaafwi ampobakalita shinkwa bantu, Mwaami Jesu ndyaakamana kulumba Lesa.

²⁴ Mpeeke bantu baanji abo ndibakabona ayi Jesu nabi bashikwiiya tabapo pamusena apo, balo bakenjila mumaato ayo akuya kuKapenaumu kunooya ciyandoola Jesu.

Jesu ncecakulya ca buumi

²⁵ Lyalo bantu ndibakamucana kwitala limwi lya lweenge bakamwiipusha ayi, “Bafundishi, mwakesa lili kuno?”

²⁶ Jesu wakakumbula ayi, “Ntoomulwiita calushinisho ayi tamutoonangoola ceebo mwakabona shaankamiko shindakacita, sombi mukwiinga mwakalya shinkwa akukuta.

²⁷ Mutanoosebensela cakulya cimana, sombi amusebensele cakulya cikalilila kushikila kubuumi butamaani. Ico ncecakulya MwanaaMuntu nceshi akamupe mukwiinga baTa baLesa mpobakabika cishibilo cakusuminisha kwabo.”

²⁸ Lyalo bakamwiipusha ayi, “Ino tulyeelete kucita buyani kwaamba ayi tucite nshiyanda Lesa?”

²⁹ Jesu wakabakumbula ayi, “Incito yakwe Lesa nkushomabo muli wooyo ngwaakatuma.”

³⁰ Mpeeke bakamwiipusha ayi, “Ino ncaankamikonshi nceshi mucite kwaamba ayi tubone akumushoma? Mutoocita mulimonshi?

³¹ Bakulukulu bakalya mana muluyanga. Bweenka mbuli mbocilembetwe ayi, ‘Wakabapa shakulya kuswa kwiculu ayi balye.’ ”

³² Jesu wakaamba ayi, “Ntoomulwiita calushinisho ayi teshi Mose wakamupa cakulya ciswa kwiculu, sombi baTa mbobapa cakulya cancinencine ciswa kwiculu.

³³ Mukwiinga cakulya Lesa ncaapa ngooyo uswa kwiculu, lakwe ngoopa buumi kubantu boonse bamucishi ca panshi.”

³⁴ Mpomunyaawo bakasenga ayi, “Nkambo, kamutupa cakulya ico lyoonse.”

³⁵ Jesu wakabaambila ayi, “Ndi cakulya cipa buumi. Uyo woonse wisa kuli ndime teshi akafwewo nsala. Ncakwiila uyo woonse ushoma muli ndime teshi akanyumfwewo nyotwa.

³⁶ Ono mbuli mbondakamwaambila kale, nakubi kwaamba ayi mwamboona, tamushomi.

³⁷ Abo boonse mbobampa baTa, balesa kuli ndime alimwi uyo woonse wisa kuli ndime, teshi nkamutandeewo.

³⁸ Mukwiinga ndakaswa kwiculu kwisa mukucita sheesho shiyanda wooyo wakantuma, kuteshi shiyanda ndime nemwiine, sobwe.

³⁹ Nkuyanda kwakwe uyo wakantuma kwaamba ayi ntasoowi nabi womwi pabaabo mbwaakampa, sombi kwaamba ayi boonse nkababuushe kuswa kubafu pabushiku bwakweelaako.

⁴⁰ Mukwiinga baTa ncebasuni nkwaamba ayi uyo woonse wabona Mwaana akumushoma, abe abuumi butamaani alimwi ndaakumubusha kuswa kubafu pabushiku bwakweelaako.”

⁴¹ Ndibakanyumfwa boobo baJuda, bakatalika kumutongooka mukwiinga wakalyaamba ayi, “Ndi cakulya cakaswa kwiculu.”

⁴² Paceebo ceeco bakaamba ayi, “Sa te nguJesu mwanaakwe Josefu? Baishi abanyina tulibeshi, ino ono inga waamba buyani ayi, ‘Wakaswa kwiculu?’ ”

⁴³ Jesu wakakumbula ayi, “Mutatongooki,

⁴⁴ taaku muntu ukonsha kwisa kuli ndime, sombi baTa abo bakantuma bamusenya kuli ndime. Anebo ndaakumubusha kuswa kubafu pabushiku bwakweelaako.

⁴⁵ Cililembetwe muMalembo akwe Lesa akalemba balaluki bakulukulu ayi, ‘Bantu boonse balaakwiishikwa aLesa.’ Uyo woonse ukutika baTa akwiiya kuli mbabo, ulesa kuli ndime.

⁴⁶ Taaku muntu wakabonaawo kale baTa, sombibo eenka uyo wakaswa kuli Lesa ngowakababona.

⁴⁷ Ntoomulwiita calushinisho ayi uyo woonse ushoma muli ndime ulicite buumi butamaani.

⁴⁸ Ndi cakulya cipa buumi.

⁴⁹ Bamashali banu bakulukulu bakalya mana muluyanga, sombi bakafwa.

⁵⁰ Sombi cakulya ciswa kwiculu, ncino nceenga muntu walya wabula kufwitilila.

⁵¹ Ndi cakulya cipa buumi cakaswa kwiculu. Na muntu uli woonse walya cakulya ici, ulaakuba abuumi butamaani. Cakulya ico nceshi nkamupe ngumubili wangu, uyo ngweshi nkape ayi bantu boonse ba mucishi ca panshi babe abuumi.”

⁵² Mpomunyaawo baJuda bakatalika kupikishanya beene abeene kabaamba ayi, “Ino uyu muntu inga watupa buyani mubili wakwe ayi tulye?”

⁵³ Jesu wakabaambila ayi, “Ntoomulwiita calushinisho ayi, na mwabula kulya mubili wa MwanaaMuntu akunwa bulowa bwakwe, inga tamubi abuumi muli ndimwe.

⁵⁴ Uyo woonse ulya mubili wangu akunwa bulowa bwangu, ulicite buumi butamaani alimwi ndaakumubusha kuswa kubafu pabushiku bwakweelaako.

⁵⁵ Mukwiinga mubili wangu ncecakulya cancinencine abulowa bwangu ncecakunwa cancinencine.

⁵⁶ Uyo woonse ulya mubili wangu akunwa bulowa bwangu ulekala muli ndime, anebo ndekala muli nguwe.

⁵⁷ Bweenka mbuli baTa bakantuma mbobali boomi, anebo ndimuumi ceebo ca baTa. Mbweeke ubo alakwe uyo ulya ndime, ulaakuba abuumi ceebo ca ndime.

⁵⁸ Ici anu ncecakulya cakaswa kwiculu. Tacibete mbuli mana bamashali banu bakulukulu ngobakalya, nakubi boobo bakafwa. Sombi ulya cakulya ici ciswa kwiculu ulaakunooli abuumi lyoonse.”

⁵⁹ Jesu wakaamba makani aya ndyaakalinga kwiisha mucoonde ca baJuda kuKapenaumu.

Maswi apa buumi butamaani

⁶⁰ Bashikwiiya bakwe baanji ndibakanyumfwa kwiisha uku bakaamba ayi, “Kwiisha uku nkuyumu, ngani weenga wakunyumfwishisha?”

⁶¹ Jesu wakalinga kwishi ayi bashikwiiya bakwe bakalinga kutongooka pamakani aya. Mpeeke wakabaambila ayi, “Sa mutooyanda kutyongola ceebo ca makani aya?

⁶² Ino inga caba buyani na mwabonabo MwanaaMuntu waboolela kwiculu nkwaakalinga kataanshi?

⁶³ Cipa buumi nguMushimu Usalashi. Nkusu sha muntu mwiine taaku mboshibete napaceyi. Maswi ngondamulwiita alaleta Mushimu Usalashi upa buumi.

⁶⁴ Nakubi boobo nobamwi tamushomi.” Mukwiinga Jesu wakalinga kwishi kuswabo kumatalikilo, abo beshi bakabule kumushome alimwi awooyo weshi akamwaabe.

⁶⁵ Lyalo wakeelikaawo ayi, “Ici nceceeco ncendakamulwiitila ayi taaku muntu weenga wesa kuli ndime na baTa babula kumupa nkusu.”

⁶⁶ Abo bakalinga kumukonkela baanji bakashiya Jesu akucileka kumukonkela ceebo ca makani ngomunya aya.

⁶⁷ Lyalo wakeepusha bashikwiiya abo bali likumi abobilo ayi, “Sa amwebo mutooyanda kunshiya?”

⁶⁸ Simoni Pita wakamukumbula ayi, “Nkambo, inga twaya kuli ni? Mwebo ndimwe mucite maswi abuumi butamaani.

⁶⁹ Swebo tulashoma alimwi tulishi ayi ndimwe wooyo Usalalite uswa kuli Lesa.”

⁷⁰ Jesu wakaamba ayi, “Sa teshi ndime ndakamusala mwebo nomuli likumi abobilo? Ee, Sombi womwi pakati kanu ngumulwani.”

⁷¹ Jesu wakalinga kwaamba Judasi mwanaakwe Simoni Isikalyoti mukwiinga Judasi, nabi wakalinga womwi wa bashikwiiya bali likumi abobilo, ngowakesa mukumwaaba.