Joni 5 - Baibo Busansulushi Bwa Libuku Ili

Jesu mbwaakashilika musankwa kuBetesida

¹ Pesule Jesu wakaya kuJelusalemu uko kwakalinga kusekelela kwa baJuda.

² Ono muJelusalemu, pafwaafwi aMulyango wa Mbelele, kwakalinga lishiba liitwa ayi Betesida muciEbulu. Mweela lishiba ili mwakalinga kuyakitwe twaanda tosanwe.

³ Mutwaanda umo mwakalinga koona balwashi baanji mbuli boofu, balema abakalinga kuyuminite mibili. [Aba bakalinga kulindila maanshi kufundoolwa.

⁴ Mukwiinga ciindi cimwi munjelo wakwe Lesa wakalinga kwisa mukwinjila mulishiba akufundoola maanshi. Aboobo mulwashi uli woonse wakalinga kutaanguna kwinjila mumaanshi, wakalinga kuba kabotu kubulwashi buli boonse mbweenga kaacite.]

⁵ Ono pabantu balwashi abo, pakalinga musankwa umwi wakalinga mulwashi myaaka makumi otatwe ayosanwe alimwi ayotatwe.

⁶ Sombi Jesu ndyaakamubona wakeshiba kwaamba ayi uyo musankwa wakatalika kale kale kuciswa. Mpomunyaawo wakamwiipusha ayi, “Sa ulisuni kuba kabotu?”

⁷ Mulwashi uyo wakakumbula ayi, “Nkambo, taaku muntu wakuntola mumaanshi na afundoolwa. Ndacita ayi njile kucana umwi wanyindila kale.”

⁸ Jesu wakamwaambila ayi, “Nyamuka, bwesa mpasa yako, unooya.”

⁹ Mpomunyaawo musankwa uyo wakaba kabotu. Lyalo wakanyamuna mpasa kaaya. Bushiku mbocakacitika ici bwakalinga bwakookesha bwa Cibelu.

¹⁰ Mpeeke bamaloba ba baJuda bakaambila musankwa wakaba kabotu uyo ayi, “Sunu mbushiku bwakookesha bwa Cibelu. Tooelete kunyamuna mpasa yako.”

¹¹ Lakwe wakakumbula ayi, “Uyo muntu wanshilika waŋambila ayi, ‘Bwesa mpasa yako, unooya!’ ”

¹² Bakamwiipusha ayi, “Ino ngani muntu uyo wakwaambila ayi bwesa mpasa yako, unooya?”

¹³ Sombi musankwa wakaba kabotu uyo, taakwe kumwishiba mukwiinga Jesu wakashiminganabo mulikoto lya bantu lyakalingaawo.

¹⁴ Kuswawaawo Jesu wakamucana musankwa uyo muŊanda yakwe Lesa akumwaambila ayi, “Bona waba kabotu ono, anu ucileeke kubisha mukwiinga cimwi cibiibi kwiinda cecilya inga caakukucitikila.”

¹⁵ Mpeeke musankwa uyo wakaya mukwaambila bamaloba ba baJuda ayi nguJesu wamushilika.

¹⁶ Paceebo ceeco bamaloba ba baJuda bakatalika kupensha Jesu ceebo wakashilika pabushika bwakookesha bwa Cibelu.

¹⁷ Jesu wakabakumbula ayi, “BaTa balasebensa ciindi coonsebo, aboobo anebo ndyeelete kusebensa.”

¹⁸ Makani aya akalenga kwaamba ayi bamaloba ba baJuda beendeewo kupinga kucaya Jesu. Teshibo kwaamba ayi wakatyola mulawo wa bushiku bwakookesha, sombi alimwi wakaamba ayi nguMwanaakwe Lesa. Mukwaamba boobo wakalyeelanya aLesa.

Nkusu sha mwanaakwe Lesa

¹⁹ Mpomunyaawo wakabakumbula ayi, “Ntoomulwiita calushinisho ayi Mwaana taaku nceenga wacita palwaakwe mwiine. Sombi ulacitabo ncaabona baIshi kabacita. Shicita baIshi alakwe Mwaana nshaacita.

²⁰ Mukwiinga baIshi balisuni Mwaana, aboobo balamutondesha shoonse nshebacita. Balaakutondesha Mwanaabo ashimwi shiinda waawa, lyalo mulaakukankamana.

²¹ Bweenka baIshi mbobabusha bafu akubapa buumi, alakwe Mwaana ulapa buumi kubaabo mbaasuni kupa.

²² BaIshi taboomboloshi muntu, sobwe. Nkusu shoonse sha boomboloshi bakashipa Mwanaabo,

²³ kwaamba ayi bantu boonse balemeke Mwaana mbobalemeka baIshi. Uyo woonse utalemeki Mwaana taalemeki abaIshi abo bakamutuma.

²⁴ “Ntoomwaambila calushinisho ayi uyo woonse unyumfwa maswi angu akushoma wooyo wakantuma ulicite buumi butamaani. Teshi akoomboloshekwe, sombi waswa kale mulufu kuya mubuumi butamaani.

²⁵ Ntoomulwiita calushinisho ayi ciindi cilaakushikila alimwi cashikila kale, bafu ndyeshi bakanyumfwe liswi lya Mwanaakwe Lesa alimwi abo beshi bakalinyuumfwe balaakuba abuumi butamaani.

²⁶ Bweenka baIshi mbobali matalikilo a buumi, alakwe Mwaana bamupa nkusu sha kuba matalikilo a buumi.

²⁷ Mwaana wakamupa ankusu shakoombolosha mukwiinga ngoMwanaaMuntu.

²⁸ Mutakankamani acikani ici mukwiinga ciindi cilaakushikila bafu boonse ndyeshi bakanyumfwe liswi lyakwe

²⁹ akuswa mushuumbwe. Lyalo abo bakalinga kucita buyanda Lesa balaakubuka akuba abuumi butamaani, abalo abo bakalinga kucita shibiibi balaakubuka akoomboloshekwa.

Bukamboni bwapali Jesu

³⁰ “Nebo taaku nceenga ndaciita palwaangu nemwiine. Ndoombolosha bweenka Lesa mbwaandwiita. Aboobo koombolosha kwangu kuliluleme mukwiinga nshikakatili kucita nsheensuni, sombi shiyanda wooyo wakantuma.

³¹ “Na ndalicitila bukamboni nemwiine, ingayi bukamboni bwangu tabwishi bwalushinisho.

³² Sombi nkwaali umwi uncitila bukamboni alimwi ndishi kwaamba ayi nshaamba pali ndime nshalushinisho.

³³ Mwakatuma batumwi kuli Joni Mubombeki alimwi wakacita bukamboni bwalushinisho.

³⁴ Teshi kwaamba ayi ndisuni bukamboni kuswa kubantu, sombi ntokwaamba shintu ishi ayi mupulushikwe.

³⁵ Joni Mubombeki wakalinga mbuli lilampi lyakalinga kumunika, alimwi mwakakondwa kwaciindi ciniini mumumuni wakwe.

³⁶ Sombi ndicite bukamboni bunene kwiinda boobo Joni Mubombeki mbwaakancitila. Shintu nsheencita isho nshaakampa Lesa ayi ncite, nshesheesho shitondesha ayi baTa mbobakantuma.

³⁷ Abalo baTa bakantuma balancitila bukamboni. Liswi lyabo tamukwe kulinyumfwaawo nabi kubona ciwa cabo.

³⁸ Ncakwiila maswi abo teekali muli ndimwe mukwiinga tamushomi wooyo ngobakatuma.

³⁹ Mulabelengesha Malembo akwe Lesa kuyeeya ayi muli ngawo inga mwacana buumi butamaani. Sombi Malembo akwe Lesa eenka aya, ngaancitila bukamboni.

⁴⁰ Sombi mwebo mulakaka kwisa kuli ndime ayi mucane buumi butamaani.

⁴¹ “Nebo nshisuni kulumbaishikwa kubantu.

⁴² Sombi ndimwishi kwaamba ayi mwebo tamusuni Lesa.

⁴³ Nebo ndakesa muliina lya baTa, nakubi boobo tamukwe kuntambula. Sombi umwi na akese muliina lyakwe mwiine, mulaakumutambula.

⁴⁴ Ino ono inga mwashoma buyani na mulisunibo kulilumbaisha nobeene, sombi kamutasuni ayi mulumbaishikwe kuli Lesa womwibo eenka?

⁴⁵ Ono mutayeeyi kwaamba ayi nebo ndaakumushinina pameenso a baTa. Sombi eshi akamushinine nguMose eenka uyo ngomucinkiteemo manungo.

⁴⁶ Na mwakalinga mwashoma Mose cancinencine, anebo naakwiinga mwanshooma mukwiinga Mose wakalemba shapali ndime.

⁴⁷ Ono na kamutashomi shakalemba Mose, ino inga mwashoma buyani maswi angu?”