Joni 3 - Baibo Busansulushi Bwa Libuku Ili

Jesu aNikodemasi

¹ Kwakalinga muntu wa mulikoto lya baFalisi wiitwa ayi Nikodemasi uyo wakalinga mweendeleshi umwi wa baJuda.

² Uyu muntu wakaya kuli Jesu mashiku akumwaambila ayi, “Bafundishi, tulishi kwaamba ayi mwebo muli bafundishi bakaswa kuli Lesa mukwiinga taaku muntu weenga wacita shaankamiko isho nshemucita, na Lesa taabete anguwe.”

³ Jesu wakakumbula ayi, “Ncakwiila, ntookulwiita calushinisho ayi taaku muntu eshi akabone Bweene bwakwe Lesa na taana kushalwa cipya.”

⁴ Nikodemasi wakeepusha Jesu ayi, “Ino muntu munene kale inga washalwa buyani cipya? Sa inga wenjila alimwi mumala muli banyina akushalwa cipya?”

⁵ Jesu wakakumbula ayi, “Ncakwiila ntookulwiita ayi taaku muntu utana kushalwa mumaanshi alimwi aMushimu Usalashi weshi akenjile muBweene bwakwe Lesa.

⁶ Ushalwa kumuntu ngumuntu, sombi uyo ushalwa kuMushimu Usalashi ngumushimu.

⁷ Utakankamani mukwiinga ndakwaambila ayi, ‘Ulyeelete kushalwa cipya.’

⁸ Muuwo ulapupila kuli koonse nkoosuni alimwi mulanyumfwa koopupa, sombi tamwishibi nkowaswita nabi nkootooya. Mbweeke ubo mbocibete kumuntu woonse washalwa kuMushimu Usalashi.”

⁹ Nikodemasi wakeepusha ayi, “Ino ici inga cacitika buyani?”

¹⁰ Jesu wakamukumbula ayi, “Sa te webo uli mufundishi wa bene Isilaeli? Ino ono toocishi buyani cikani ici?

¹¹ Ntookulwiita calushinisho ayi tulaamba nshetwishi akupa bukamboni bwa shintu nshetwakabona, sombi mwebo tamusumini maswi esu, sobwe.

¹² Na tamushomi ndimwaambila shintu sha pacishi ca panshi, ino inga mwashoma buyani na ndamwaambila shintu sha kwiculu?

¹³ Taaku muntu wakayaako kale kwiculu, sombibo MwanaaMuntu eenka uyo wakaswa kwiculu.

¹⁴ “Ono bweenka mbuli Mose mbwaakaanjika nsoka ya bulonse muluyanga, mbweeke ubo MwanaaMuntu alakwe mbweshi akaanjikwe

¹⁵ kwaamba ayi uyo woonse ushoma muli nguwe abe abuumi butamaani.

¹⁶ Lesa wakasunisha bantu boonse ba mucishi ca panshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.

¹⁷ Lesa taakwe kutuma Mwanaakwe mucishi kwaamba ayi oomboloshe bantu, sombi ayi bapulushikwe kwiinda muli nguwe.

¹⁸ Nkokwaamba ayi uyo woonse ushoma muli nguwe taomboloshekwi, sombi uyo woonse utashomi woomboloshekwa kale mukwiinga taakwe kushoma Mwanaakwe Lesa uyo wakashalwa eenkabo.

¹⁹ Bupingushi mboobu, mumuni wakesa mucishi, sombi bantu bakasuna munshinshe kwiinda mumuni mukwiinga micito yabo njibiibi.

²⁰ Kulilabo muntu ucita shibiibi ulipatite mumuni. Teesi kumumuni kuloonda kwaamba ayi micito yakwe inga yabonekela patuba.

²¹ Sombi ucita shintu sha lushinisho ulesa kumumuni kwaamba ayi micito yakwe iboneke ayi ilacitikwa mukunyumfwila Lesa.”

Bukamboni bwabili bwakwe Joni

²² Kuswawaawo Jesu abashikwiiya bakwe bakaya kucishi ca Judeya uko nkwaakekala nshiku shiniini ambabo, kaabombeka.

²³ Joni alakwe wakalinga kubombeka kuEnoni, pafwaafwi aSalimu, mukwiinga nkokwakalinga maanshi aanji. Mpeeke bantu bakalinga kuya kuli nguwe mukubombekwa.

²⁴ (Paciindi ici Joni kaatana kubikwa muntolongo.)

²⁵ Bashikwiiya bakwe Joni bamwi bakatalika kupikishanya amuJuda umwi pamulawo wakusamba kumaansa kweelana akwishibila kwa baJuda.

²⁶ Mpeeke bakaya kuli Joni akumwaambila ayi, “Bafundishi, muntu ulya ngomwakalingaakwe petala lya Mulonga wa Joodani, ulya ngomwakaambaawo, alakwe sunu utoobombeka alimwi bantu baanji batooya kuli nguwe!”

²⁷ Joni wakakumbula ayi, “Taaku cintu muntu nceenga wacana na Lesa taakwe kumupa.

²⁸ Mwebo nobeene inga mwambeta bakamboni mucikani ncendakaamba ayi, ‘Teshi ndime Usalitwe wakwe Lesa, sombi ndakatumwabo kunembo lyakwe.’

²⁹ Uyo ucite nabwiinga ngushibwiinga. Nakubi boobo mubye shibwiinga uleemikana pafwaafwi akumukutika. Na wanyumfwa liswi lyakwe ulasangalala abuumbi. Mbweeke ubo anebo ndasangalala abuumbi.

³⁰ Aboobo ulyeelete kuba abulemu kwiinda ndime.

³¹ “Uyo uswa kwiculu uleenda pabantu boonse. Uyo uswa mucishi ca panshi ngwa panshi alimwi ulaambabo sha mucishi ca panshi. Sombi uyo uswa kwiculu uleenda pabantu boonse.

³² Lakwe ulaamba shintu nshaakabona akunyumfwa mwiine, nakubi boobo taakuuwo muntu ushoma nshaamba.

³³ Sombi muntu ushoma nshaamba ulashinisha ayi Lesa ngwalushinisho.

³⁴ Ee, uyo Lesa ngwaakatuma ulaamba maswi akwe Lesa ceebo ulamupa Mushimu Usalashi cakuteeleka.

³⁵ Ishi ulimusuni Mwanaakwe alimwi shintu shoonse wakashibika mumaansaakwe.

³⁶ Aboobo uyo woonse ushoma Mwaana, ulicite buumi butamaani. Sombi uyo woonse utashomi Mwanaakwe Lesa, teshi akabe abuumi butamaani alimwi bukali bwakwe Lesa mbobuli pali nguwe.”