Joni 20 - Baibo Busansulushi Bwa Libuku Ili

Jesu mbwaakabuka kuswa kubafu

¹ Macuunsacuunsa paSondo, kapacishiyabo, Maliya wa kuMagadala wakaya kucuumbwe akucana ayi libwe lyakunkulushikwaawo pamulyango.

² Mpomunyaawo wakacica kuya kuli Simoni Pita ashikwiiya umwi, uyo Jesu ngwaakalinga kusunishi, wabaambila ayi, “Bamukushaamo Mwaami mucuumbwe alimwi tatwishi nkobamubika!”

³ Lyalo Pita ashikwiiyanyina umwi uyo bakanyamuka akuya kucuumbwe.

⁴ Boonse bobilo bakalinga kuya cicica, sombi shikwiiya umwi uyo wakashiyaamo Pita, aboobo wakataanguna kushika.

⁵ Lyalo wakakotama akusondela mucuumbwe akubonabo shisani nshaakalinga kupombeletweemo. Nakubi boobo taakwe kwinjila.

⁶ Lyalo pesule alakwe Pita wakashika akwiindililabo kwinjila mukati. Mpeeke wakabonabo shisani kashibungene apo mpaakalinga

⁷ acisani ncaakalinga kupombeletwe kumutwi. Cisani ico tecakalinga pantu pomwi ashisani shimwi shoonse, sombi cakalinga kupetetwe ceenka palubasu.

⁸ Mpomunyaawo shikwiiya umwi uyo wakataanguna kushika kucuumbwe, wakenjila mukati alakwe. Wakashibona shintu ishi akushoma.

⁹ (Paciindi ici kabatana kushoma Malembo akwe Lesa aamba ayi ulyeelete kubuka kuswa kubafu.)

¹⁰ Lyalo abo bashikwiiya bakaboolela kumaandaabo.

Jesu mbwaakaboneka kuli Maliya wa kuMagadala

¹¹ Sombi Maliya wakalinga kwiimfwi pafwaafwi acuumbwe kaalila. Kaacilila, wakakotama akusondela mucuumbwe.

¹² Mpeeke wakabona baanjelo bobilo kabafwete shituba. Bakalinga kushiite pakalinga mutuntu wakwe Jesu, umwi kumitwi aumwi kumitandabilo.

¹³ Mpomunyaawo bakamwiipusha ayi, “Owalutundu, ino utoolilanshi?” Lakwe wakakumbula ayi, “Bantu bakusha Baami bangu mucuumbwe alimwi nshishi nkobabatola.”

¹⁴ Ndyaakamana kwaamba boobo, wakacebuka akubona Jesu kaaimfwi, nakubi boobo taakwe kumwishiba.

¹⁵ Jesu wakeepusha Maliya ayi, “Owalutundu, ino utoolilanshi? Ngani ngotoolangoola?” Maliya wakayeeya ayi ngushikulama muunda. Aboobo wakamwaambila ayi, “Mwebo ta, na ndimwe mwabakushaamo, amundwiite nkomwabatola kwaamba ayi nkababwese.”

¹⁶ Mpomunyaawo Jesu wakaamba ayi, “Maliya!” Lyalo Maliya wakapiluluka akwaamba muciEbulu ayi, “Laboni!” (Nkokwaamba ayi “Mufundishi.”)

¹⁷ Jesu wakamwaambila ayi, “Utancatilili ceebo nshina kuya kuli baTa. Sombi koya ukaambile bashikwiiya bangu ayi, ‘Ntooya kuli baTa alimwi mbobaishiwanu amwebo, nguLesa wangu amwebo nguLesa wanu.’ ”

¹⁸ Maliya wa kuMagadala wakaya walwiita bashikwiiya ayi wabona Mwaami alimwi akubalwiita nshaakaamba.

Jesu mbwaakaboneka kubashikwiiya bakwe

¹⁹ PaSondo bushiku bweenka ubo macolesha, bashikwiiya bakalinga kubungene muŋanda ashisasa kashicalitwe cakutanjila muntu ceebo bakalinga kuloonda baJuda. Mpomunyaawo Jesu wakaboneka pakati kabo akwaamba ayi, “Luumuno lube amwebo.”

²⁰ Ndyaakamana kwaamba boobo, wakabatondesha maansaakwe akumbafu nkwaakayaswa. Bashikwiiya bakasangalala abuumbi kubona Mwaami wabo.

²¹ Jesu wakabaambila alimwi ayi, “Luumuno lube amwebo! Ono bweenka baTa mbobakantuma, anebo ntoomutuma mbweeke ubo.”

²² Lyalo wakabayoyela akubaambila ayi, “Amutambule Mushimu Usalashi.

²³ Na mwalekelela muntu uli woonse shibiibi shakwe, ingayi ndushinisho walekelelwa. Ono na mwabula kumulekelela, ingayi ncakwiila teshi akalekelelwe.”

Shakutashoma kwakwe Tomasi

²⁴ Ono Tomasi (wakalinga kwiitwa ayi Mpuundu,) womwi wa bashikwiiya, taakalingaawo Jesu ndyaakaboneka kubashikwiiya bakwe bamwi boonse.

²⁵ Aboobo bashikwiiya bamwi abo bakamulwiita ayi, “Twababona Baami!” Tomasi wakabakumbula ayi, “Inga nshisuminiiwo, sombibo nkabone shilonda sha misipikili mumaansaakwe akwinjisha munwe wangu mushilonda isho alimwi alyaansa lyangu kumbafu nkwaakayaswa lisumo.”

²⁶ Ndipakeenda nsondo, bashikwiiya alimwi bakalinga kubungene muŋanda. Tomasi alakwe wakalingaamo. Shisasa shakalinga kucalitwe, sombi Jesu wakesa weemikana pakati kabo akwaamba ayi, “Luumuno lube amwebo!”

²⁷ Lyalo wakaambila Tomasi ayi, “Njisha munwe wako apa alimwi ubone amaansaangu. Fungulula lyaansa lyako unjishe kumbafu shangu. Ono cileke kutonsha, ushome.”

²⁸ Tomasi wakaambila Jesu ayi, “NoBaami bangu, nobaLesa bangu!”

²⁹ Jesu wakamwiipusha ayi, “Sa washooma ceebo wamboona? Balicite coolwe abo bashoma kabatana kubona.”

Ceebo cinene ca libuku ili

³⁰ Nshiinji shaankamiko nshaakacita Jesu pameenso abashikwiiya bakwe, shitalembetwe mulibuku ili.

³¹ Sombi ishi shakalembwa kwaamba ayi mushome ayi Jesu ngoUsalitwe, Mwanaakwe Lesa alimwi ayi kwiinda mukumushoma, mube abuumi butamaani.