Joni 2 - Baibo Busansulushi Bwa Libuku Ili

Bwiinga bwa kuKana

¹ Ndipakeenda nshiku shobilo kwakaba bwiinga mundabala ya Kana mucishi ca Galili. Banyina Jesu bakalingaako.

² Alakwe Jesu abashikwiiya bakwe bakeetwa kubwiinga.

³ Mpeeke waini ndiwakamana, banyina Jesu bakamulwiita ayi, “Waini wabamanina.”

⁴ Jesu wakakumbula ayi, “Ma, ino mutooyanda ayi ncite buyani nebo? Ciindi cangu tacina kushikila.”

⁵ Nakubi boobo banyina Jesu bakalwiita basebenshi ba pabwiinga ayi, “Mucite cili coonse nceshi amwaambile.”

⁶ Ono palya pakalinga nongo sha mabwe shosanwe ayomwi, umo mwakalinga maanshi akusamba ayi balisalashe kweelana aMilawo ya baJuda. Nongo yomwi yakalinga kutola mingomo yosanwe kwaamba ayi isule.

⁷ Mpeeke Jesu wakaambila basebenshi ayi, “Amushisushe maanshi nongo ishi.” Abalo bakashisusha apamilomo.

⁸ Lyalo wakabaambila ayi, “Ono amutekule, mutole kumunene wa bwiinga.” Abalo bakamutolela.

⁹ Ono ndyaakanyumfwa maanshi ayo akasandulwa waini, taakwe kwishiba kwakaswa waini uyo. (Sombi basebenshi bakateka maanshi bakalinga kwishi.) Aboobo wakeeta shibwiinga

¹⁰ akumwaambila ayi, “Bantu boonse balataanguna kwaaba waini ubotu, kuswawaawo nkokunwa waini utabete kabotu, sombi webo walinga kubikitebo waini ubotu kushikila cino ciindi.”

¹¹ Ici, ncaankamiko citaanshi Jesu ncaakacita mucishi ca Galili, wakatondesha nkusu sha bulemu bwakwe, aboobo bashikwiiya bakwe bakamushoma.

¹² Kuswawaawo Jesu abanyina, banandumi shakwe alimwi abashikwiiya bakwe bakaya kuKapenaumu, uko nkobakekala nshiku shiniini.

Jesu mbwaakatanda basambashi muŊanda yakwe Lesa

¹³ Paciindi ico, bushiku bwa Pasika bwakwiibaluka kusotokela bwakalinga pafwaafwi, aboobo Jesu wakaya kuJelusalemu.

¹⁴ Ndyaakenjila muŊanda yakwe Lesa, wakacana bantu bamwi kaboolisha ŋombe, mbelele ampolobe. Bamwi bakalinga kushiite kumatebulu kabashinta maali.

¹⁵ Mpomunyaawo wakapanga ciswepu ca looshi akubatandila pansengwe boonse, pantu pomwi ambelele aŋombe shabo. Wakapinoona matebulu abeshikushinta maali akupalanganya maali.

¹⁶ Mpeeke wakalwiita bakalinga kuulisha mpolobe ayi, “Amutole mpolobe ishi pansengwe! Tamweelete kusandula ŋanda ya baTa ayi ibe musena wakuulishisha!”

¹⁷ Lyalo bashikwiiya bakeebaluka Malembo akwe Lesa aamba ayi, “Lusuno lwangu lwa ŋanda yanu nobaLesa, lulancata kumoyo.”

¹⁸ Mpeeke baJuda bakeepusha ayi, “Ncaankamikonshi nceshi ucite kwaamba ayi tushibe ayi ulicite nkusu shakucita bobulya?”

¹⁹ Jesu wakabakumbula ayi, “Amumwayulule Ŋanda yakwe Lesa iyi, nebo ndaakwiiyaka alimwi munshiku shotatwe.”

²⁰ Lyalo baJuda bakaamba ayi, “Ŋanda iyi yakatola myaaka makumi one ayosanwe awomwi kwaamba ayi iyakwe. Ono sa ncakwiila inga waiyaka munshiku shotatwe?”

²¹ Sombi Ŋanda yakwe Lesa njaakalinga kwaamba, ngumubili wakwe.

²² Aboobo Jesu ndyaakabushikwa kuswa kubafu, bashikwiiya bakwe bakeebaluka ayi ici wakacaambaawo kale. Mpeeke bakashoma Malembo akwe Lesa amaswi ngaakaamba Jesu.

Jesu ulishi bantu boonse mbobabete

²³ Jesu ndyaakalinga muJelusalemu, pabushiku bwa Pasika bwakwiibaluka kusotokela, bantu baanji bakamushoma ndibakabona shaankamiko nshaakacita.

²⁴ Sombi lakwe Jesu taakwe kubashoma mukwiinga wakalinga kwishi miyeeyo ya bantu.

²⁵ Taakalinga kulindila ayi umwi muntu amulwiite shabuumi bwa bantu mukwiinga wakalinga kwishi mwiine shili mumyoyo yabo.