Joni 19 - Baibo Busansulushi Bwa Libuku Ili

¹ Mpomunyaawo Pilato wakaambila bashilumamba ayi batole Jesu mukumukwipa.

² Abalo bashilumamba bakapanga mushini wa myuumfwa, bamufwalika kumutwi akumufwalika cisani cifubelafubela.

³ Mpeeke bakaya kuli nguwe akumwaansha ayi, “Waboneka oMwaami wa baJuda!” Kuswawaawo bakamuuma mpaka.

⁴ Pilato wakaswita pansengwe alimwi akwaambila baJuda ayi, “Amubone, ntoomukusha pansengwe kuli ndimwe kwaamba ayi mwishibe ayi taaku mulandu ngondacanina muntu uyu.”

⁵ Ono Jesu ndibakamukusha pansengwe kaafwete mushini wa myuumfwa acisani cifubelafubela, Pilato wakabaambila ayi, “Ngooyu muntu wanu.”

⁶ Bapailishi banene abeshikulindilila kuŊanda yakwe Lesa ndibakamubona, bakoolobesha ayi, “Aapopwe pamucilingano, aapopwe pamucilingano!” Mpomunyaawo Pilato wakabaambila ayi, “Amumubwese nobeene muye mukamupoope. Nebo taaku mulandu ngondamucanina.”

⁷ Mpeeke balo bakamukumbula ayi, “Tulicite mulawo alimwi kweelana amulawo uyo, uyu muntu ulyeelete kufwa ceebo walinga kulibanda ayi nguMwanaakwe Lesa.”

⁸ Ingayi Pilato anyumfwe boobo, boowa bwakamucata abuumbi.

⁹ Lyalo wakenjila alimwi muŋanda yakwe akwiipusha Jesu ayi, “Anu webo kumishaanu nkuli?” Sombi Jesu taakwe kumukumbula.

¹⁰ Mpomunyaawo Pilato wakamwiipusha ayi, “Sa teshi unkumbule? Sa tooshi kwaamba ayi ndicite nkusu shakukwaangulula nabi shakwaamba ayi upopwe pamucilingano?”

¹¹ Jesu lyalo wakakumbula ayi, “Nootakwe kupekwa nkusu kuswa kuli baTa, naakwiinga toocite nkusu pali ndime. Nakubi boobo uyo wakangaba kuli ndiwe ngoocite cibiibi cinene.”

¹² Ndyaakanyumfwa boobo, Pilato wakalinga kusuni kwaangulula Jesu, sombi baJuda bakoolobesha ayi, “Na mwaangulule muntu uyo, ingayi tamubete shicibusa wakwe Sisa muleli munene wa kuLoma. Uyo woonse ulipa bwaami, ingayi ngumulwani wa muleli munene wa kuLoma.”

¹³ Pilato ndyaakanyumfwa makani aya, wakakusha Jesu pansengwe akwikala pacuuna ca boomboloshi pamusena wakalinga kwiitwa ayi, “Lubansa lwa mabwe.” (MuciEbulu balaamba ayi, “Gabata.”)

¹⁴ Bwakalinga bushiku bwakulibambila shaPasika alimwi lisuba lyakalinga kuya pakati ka mutwi, Pilato ndyaakaambila baJuda ayi, “Ngooyu mwaami wanu!”

¹⁵ Balo bakoolobesha ayi, “Aacaikwe, aacaikwe, aapopwe pamucilingano!” Pilato wakabeepusha ayi, “Sa mulisuni ayi mpope mwaami wanu pamucilingano?” Bamatanjilili ba bapailishi bakakumbula ayi, “Taaku aumwi mwaami ngotucite, eenkabo muleli munene wa kuLoma.”

¹⁶ Mpomunyaawo Pilato wakabika Jesu mumaansaabo kwaamba ayi bakamupoope pamucilingano. Paceebo ceeco bashilumamba bakatola Jesu.

Jesu mbwaakapopwa pamucilingano

¹⁷ Wakaswa mundabala ilya kaayumwite mucilingano wakwe kuya kumusena wiitwa ayi, “Cifuwa ca mutwi.” (MuciEbulu balaamba ayi, “Gologota.”)

¹⁸ Pamusena uyo mpobakamupopela pamucilingano. Bakapopa abamwi basankwa bobilo, umwi kululyo aumwi kucipiko, Jesu pakati.

¹⁹ Pilato wakalemba cishibisho akucibika pamucilingano wakwe Jesu cakalinga kulembetwe ayi, “Jesu wa kuNasaleti, mwaami wa baJuda.”

²⁰ BaJuda baanji bakabelengaawo ceebo kumusena nkobakamupopela kwakalinga pafwaafwi andabala ya Jelusalemu. Cishibisho ico cakalinga kulembetwe muciEbulu, ciLatini aciGiliki.

²¹ Mpomunyaawo bamatanjilili ba bapailishi ba baJuda bakaambila Pilato ayi, “Mutalembi ayi, ‘Mwaami wa baJuda,’ sombi mulembe ayi, ‘Uyu muntu wakalinga kulibanda ayi ndi mwaami wa baJuda.’ ”

²² Pilato wakakumbula ayi, “Ncendalemba ndaleemba, camana.”

²³ Bashilumamba ndibakamana kupopa Jesu pamucilingano, bakanyamuna shakufwala shakwe akushikwamuna mushipansha shone, waya cipansha comwi. Bakabwesa amwinjila wakwe uyo wakalinga kweensenebo kuswa peculu kushikila apanshi, kootacite mukunko.

²⁴ Paceebo ceeco bashilumamba bakaambooshanya beene ayi, “Tutakwamuni mwinjila uyu. Atuume cisolo kwaamba ayi tubone weshi autole.” Ico cakacitika kwaamba ayi Malembo akwe Lesa acitike cancinencine akwaamba ayi, “Bakaabana shakufwala shangu alimwi bakoomina cisolo mwiinjila wangu.” Ncakwiila abalo bashilumamba ncebakacita ici.

²⁵ Pafwaafwi amucilingano wakwe Jesu pakalinga kwiimfwi banyina, mukwababo mwanakashi, Maliya muka Kilopasi alimwi aMaliya wa kuMagadala.

²⁶ Jesu ndyaakabona banyina ashikwiiya ngwaakalinga kusunishi kabeemfwi pafwaafwi, wakaambila banyina ayi, “Ma, ngooyu mwanaanu.”

²⁷ Kuswawaawo wakaambila shikwiiya uyo ayi, “Mba banyoko.” Kuswa paciindi ico shikwiiya uyo wakatola banyina Jesu kuŋanda yakwe mukwikala.

Lufu lwakwe Jesu

²⁸ Jesu wakashiba ayi shoonse shacitika. Ono kwaamba ayi Malembo akwe Lesa acitike cancinencine, wakaamba ayi, “Ndafwa nyotwa.”

²⁹ Apo pakalinga nongo yakalinga kuswite waini usashite. Mpeeke bakasumpaamo mweepu, baubika kukasamu akucinka Jesu kumulomo.

³⁰ Jesu ndyaakamana kunwaako maanshi wakaamba ayi, “Camana.” Amanebo kwaamba boobo, wakakotamika mutwi wafwa.

Jesu mbwaakayaswa kumbafu

³¹ Ceebo bwakalinga bushiku bwakulibambila bushiku bwakookesha bwa Cibelu, beendeleshi ba baJuda bakasenga Pilato ayi bantu bakalinga kupopetwe pamicilingano batyoloolwe myeendo, akwaangulwa kabutana kushikila bushiku bwakookesha. Bakacita boobo mukwiinga bushiku ubo bwakalinga bunene kuli mbabo.

³² Aboobo bashilumamba bakaya batyola myeendo ya musankwa mutaanshi alimwi awabili abo bakapopwa pantu pomwi aJesu.

³³ Ono ndibaakashika pakalinga Jesu, bakacana wafwa kale, aboobo tabakwe kumutyola myeendo.

³⁴ Sombi umwi wa bashilumamba wakayasa Jesu lisumo kumbafu. Mpeeke bulowa amaanshi shakeendililabo kuswa.

³⁵ Ono musankwa wakabona sheeshi ngootoopa bukamboni alimwi bukamboni bwakwe mbwalushinisho. Ulishi kwaamba ayi nshaatokwaamba nshalushinisho ayi amwebo mushome.

³⁶ Ishi shintu shakacitika kweelana abwaamba Malembo akwe Lesa ayi, “Taaku cifuwa cakwe nabi comwi ceshi cikatyoke”

³⁷ aMalembo amwi aamba ayi, “Bantu balaakulanga kuli wooyo ngobakayasa.”

Jesu mbwaakabikwa

³⁸ Pesule, Josefu wa kuAlimateya wakasenga Pilato ayi amusuminishe kubwesa mutuntu wakwe Jesu kuswa pamucilingano. (Josefu wakalinga kushoma muli Jesu alakwe, sombi wakalinga kuyubayuba kuloonda bamaloba ba baJuda.) Mpeeke Pilato wakamusuminisha, lyalo wakoobwesa.

³⁹ Alakwe Nikodemasi uyo wakalinga waya kuli Jesu mashiku kataanshi, wakaya aJosefu kaanyamwite mafuta anunkila kabotu asenkene amule aaloyi aanji.

⁴⁰ Basankwa bobilo abo bakabwesa mutuntu akuupombela mucisani amafuta anunkila kabotu. Bakacita boobo kweelana akwishibila kwa baJuda pakubika muntu.

⁴¹ Uko kumusena kwakapopelwa Jesu kwakalinga muunda. Mumuunda umo mwakalinga cuumbwe cipya citakwe koonamo kale muntu.

⁴² Ono ceebo cakwaamba ayi cuumbwe cakalinga pafwaafwi alimwi bwakalinga bushiku bwa kulibambila shabushiku bwakookesha bwa Cibelu, bakanyamuna mutuntu akuubika mucuumbwe.